ទីក្រុងសេអ៊ូល ៖ តម្លៃដីនៅជិតតំបន់គ្មានកងទ័ព (Demilitarized Zone) ឬហៅថាDMZ ដែលកាត់ផ្តាច់កូរ៉េខាងជើង និងខាងត្បូងបានកើនឡើងយ៉ាងលឿននៅឆ្នាំនេះ ព្រោះតែវិនិយោគិនដែលរំពឹងលើដំណោះស្រាយបញ្ហាអាវុធនុយក្លេអ៊ែរជាមួយកូរ៉េខាងជើងដើម្បីជំរុញដល់ការអភិវឌ្ឍសេដ្ឋកិច្ច ។
អ្នកស្រី Kim Jong-soon នាយកប្រតិបត្តិរបស់ក្រុមហ៊ុនអចលនទ្រព្យមួយនៅទីក្រុង Paju បានឲ្យដឹងថា ដីប្រមាណ២០០កន្លែងត្រូវបានលក់ចេញនៅក្នុង និងជុំវិញភូមិ Unification Village ។
ចំណែកឯលោក Lee Kong-song នាយកក្រុមហ៊ុនអចលនទ្រព្យមួយទៀតនៅក្នុងតំបន់តែមួយបានឲ្យដឹងថា ៖« អ្នកដែលទិញដីនៅម្តុំនេះគឺមានអាយុខ្ទង់៤០ទៅ៥០ឆ្នាំ»។ លោកថា ៖« ការទិញទាំងនេះមិនដូចការទិញអចលនទ្រព្យរយៈពេលខ្លីដូចដែលបានឃើញនៅសេអ៊ូលទេ វាជាការវិនិយោគរយៈពេលវែងដែលពួកគេអាចរកប្រាក់ចំណេញបានច្រើន »។
សក្តានុពលនៃកំណើនតម្លៃដីបានធ្វើឲ្យវិនិយោគិនកាន់តែចាប់អារម្មណ៍ក្នុងការទិញអចលនទ្រព្យ ។ លោក Lee បានឲ្យដឹងដែរថាតម្លៃដីបានកើនឡើងទ្វេដងឯណោះនៅឆ្នាំនេះ ។
លោក Lee បានបន្ថែមថា ការវិនិយោគបានកើនឡើងយ៉ាងខ្លាំងនៅខែមេសាដែលជាពេលលោកប្រធានាធិបតី Moon Jae-in ចូលរួមកិច្ចប្រជុំដំបូងរបស់លោកជាមួយមេដឹកនាំរបស់កូរ៉េខាងជើង ។ ការទិញលក់បានធ្លាក់ចុះបន្តិចនៅខែកក្កដា និងសីហា ខណៈដែលកូរ៉េខាងជើងនិងសហរដ្ឋអាមេរិកនៅមិនទាន់អាចព្រមព្រៀងគ្នាលើបញ្ហារំសាយអាវុធនុយក្លេអ៊ែរ ប៉ុន្តែចំណាប់អារម្មណ៍បានកើនឡើងសាជាថ្មីកាលពីខែមុន ព្រោះតែកិច្ចប្រជុំទីបីរវាងលោក Moon និងលោក Kim Jong-un ។
គួរបញ្ជាក់ថា ក្រុមហ៊ុន Samsung Electronics និងក្រុមហ៊ុនធំៗជាច្រើនទៀតមានការិយាល័យធំនៅ Suwon ប៉ែកខាងត្បូងនៃទីក្រុងសេអ៊ូល ប៉ុន្តែនៅប៉ែកខាងជើងវិញពុំសូវមានរោងចក្រធំៗឡើយ ក្រៅពីរោងចក្រ LG Display ។
វិសមភាពនៃការអភិវឌ្ឍ បានធ្វើឲ្យតំបន់ប៉ែកខាងជើងទាមទារជំនួយពីរដ្ឋាភិបាលដើម្បីជំរុញដល់ការវិនិយោគក្នុងស្រុក ។ ប្រសិនបើអង្គការសហប្រជាជាតិដកការដាក់ទណ្ឌកម្មលើកូរ៉េខាងជើងនោះ តំបន់នៅជិត DMZ អាចអភិវឌ្ឍន៍ខ្លាំងជាងមុន ៕
ចែករំលែកព័តមាននេះ