រាជធានីភ្នំពេញ ៖ ក្នុងរយៈពេល៩ខែដើមឆ្នាំ២០១៨នេះ អគារខ្ពស់ៗចាប់ពី៥ជាន់ឡើងទៅបានកើនឡើង៩២អគារ ដែលធ្វើឲ្យចំនួនអគារខ្ពស់ៗនៅរាជធានីភ្នំពេញកើនដល់ជាង១ពាន់អគារ គិតចាប់ពីឆ្នាំ២០០៥មក ។ នេះបើតាមការអះអាងពីមន្ត្រីជាន់ខ្ពស់នៃក្រសួងរៀបចំដែនដី នគរូបនីយកម្ម និងសំណង់…
រាជធានីភ្នំពេញ ៖ ក្នុងរយៈពេល៩ខែដើមឆ្នាំ២០១៨នេះ អគារខ្ពស់ៗចាប់ពី៥ជាន់ឡើងទៅបានកើនឡើង៩២អគារ ដែលធ្វើឲ្យចំនួនអគារខ្ពស់ៗនៅរាជធានីភ្នំពេញកើនដល់ជាង១ពាន់អគារ គិតចាប់ពីឆ្នាំ២០០៥មក ។ នេះបើតាមការអះអាងពីមន្ត្រីជាន់ខ្ពស់នៃក្រសួងរៀបចំដែនដី នគរូបនីយកម្ម និងសំណង់ ។
លោក ឡៅទិព្វ សីហា រដ្ឋលេខាធិការក្រសួងនេះមានប្រសាសន៍ថា ក្នុងរយៈពេល៩ខែឆ្នាំ២០១៨នេះ សំណង់អគារខ្ពស់ៗចាប់ពី៥ជាន់ឡើងទៅនៅក្រុងភ្នំពេញ បានកើនឡើងប្រមាណ៩២អគារ ហើយបើគិតចាប់ពីឆ្នាំ២០០៥រហូតមកដល់បច្ចុប្បន្ននេះ គឺមានសំណង់រហូតដល់ចំនួន១.០៨៨អគារ ។ ដូច្នេះឆ្លុះបញ្ចាំងឲ្យឃើញថា វិស័យសំណង់នៅតែមានសុខភាពល្អរឹងមាំ បើទោះបីទំហំទឹកប្រាក់វិនិយោគលើវិស័យនេះក្នុងរយៈពេល៩ខែដើមឆ្នាំធ្លាក់ចុះបន្ដិចក្ដី ។
លោករដ្ឋលេខាបញ្ជាក់ថា ៖« ស្ថានភាពទីផ្សារវិស័យសំណង់ គឺមានភាពល្អប្រសើរពិសេសទីផ្សារដីធ្លី និងអគារខ្ពស់ៗ។ វិស័យនេះនៅតែរីកចម្រើនយ៉ាងខ្លាំង និងបានចូលរួមចំណែកយ៉ាងសំខាន់នៅក្នុងការទ្រទ្រង់កំណើនសេដ្ឋកិច្ចជាតិ ពិសេសជួយលើកកម្ពស់កម្រិតជីវភាពរបស់ពលរដ្ឋកម្ពុជា »។
លោកបញ្ជាក់ថា ៖« វិស័យនេះបាននិងកំពុងផ្តល់ការងារ និងបទពិសោធន៍ ព្រមទាំងចូលរួមបណ្តុះបណ្តាលការងារបច្ចេកទេសដល់អ្នកជំនាញនៅកម្ពុជាបានមួយកម្រិតធំ»។
អ្នកជំនាញអចលនទ្រព្យអន្តរជាតិដំបូងគេនៅកម្ពុជា និងជាអគ្គនាយកក្រុមហ៊ុន Century21 Fortuna investment បានថ្លែងថា សំណង់អគារខ្ពស់ៗនៅក្នុងភ្នំពេញសព្វថ្ងៃបានចូលរួមចំណែកបង្ហាញពីសក្តានុពលរបស់កម្ពុជាទាំងផ្នែកសេដ្ឋកិច្ច និងសកម្មភាពទិញលក់នៅក្នុងវិស័យអលនទ្រព្យ ។
លោក វ៉ា វីរៈ អ្នកជំនាញអចលនទ្រព្យរូបនេះ បានប្រសាសន៍ថា ការរីកចម្រើននៃសំណង់អគារខ្ពស់ៗ វាចូលរួមបង្ហាញពីសក្តានុពលក្នុងការនៃការរីកចម្រើនផ្នែកសេដ្ឋកិច្ចរបស់ប្រទេសនីមួយៗ អីចឹងនៅកម្ពុជាក៏ដូច្នេះដែរ ។
លោកបញ្ជាក់ថា ៖« មួយរយៈចុងក្រោយនេះ កម្ពុជាមានអគារខ្ពស់ៗកើនឡើងច្រើន ដែលបង្ហាញឱ្យឃើញពីជំនឿទុកចិត្ត ក៏ដូចបង្ហាញពីការទិញលក់ក្នុងវិស័យអចលនទ្រព្យមានសកម្មល្អ។ លើសពីនេះ ក៏បង្ហាញពីការវិនិយោគផ្ទាល់ពីបរទេសមានការកើនឡើងផងដែរ »។
លោកលើកឡើងថា ៖« បន្ទាប់ពីព្រឹត្តិការណ៍បោះឆ្នោតថ្នាក់ជាតិហើយ លទ្ធផលយើងគ្រប់គ្នាឃើញ គ្មានសភាពការណ៍អ្វីខុសប្លែក ហើយកំណើនសេដ្ឋកិច្ចកម្ពុជាត្រូវបានស្ថាប័នហិរញ្ញវត្ថុអន្តរជាតិធំៗដូចជា ធនាគារពិភពលោក និង IMF ជាដើម បានវាយតម្លៃរួចហើយថា នៅឆ្នាំ២០១៨នេះ ក៏ដូចជានៅឆ្នាំបន្ទាប់ នឹងស្ថិតក្នុងរង្វង់៧% ។
លោកមានសុទិដ្ឋិនិយមថា ៖« បើយើងមើលពីឆ្នាំនេះទៅឆ្នាំបន្ទាប់ គឺស្ថានភាពក្នុងវិស័យអចលនវត្ថុកម្ពុជា មិនមានអ្វីជាបញ្ហានោះទេ ព្រោះគម្រោងនានាបាននិងកំពុងបន្តសសកម្មភាពសាងសង់ជាធម្មតា »។
យោងតាមរបាយការណ៍ក្រសួងរៀបចំដែនដី នគរូបនីយកម្ម និងសំណង់ បានបង្ហាញថា គិតត្រឹមរយៈពេល៩ខែឆ្នាំ២០១៨នេះ ក្រសួងបានផ្តល់លិខិតអនុញ្ញាតសាងសង់សរុប២.៥៤១គម្រោង លើផ្ទៃក្រឡាសំណង់សរុប១០,៧៩លានម៉ែត្រការ៉េ និងមានតម្លៃប៉ានស្មានជាង៤.៨២០លានដុល្លារ ធ្លាក់ចុះជាង១៤% បើធៀបរយៈពេលដូចគ្នាក្នុងឆ្នាំ២០១៧ ការផ្ដល់លិខិតអនុញ្ញាតគម្រោងសាងសង់មានចំនួន២.៥២២គម្រោង លើផ្ទៃក្រឡាសំណង់សរុប៩,១៤លានម៉ែត្រការ៉េ និងមានទុនវិនិយោគជាង៥.៦៣៦លានដុល្លារ ។
បើទោះបីជាទំហំទឹកប្រាក់វិនិយោគធ្លាក់ចុះបន្ដិចក្ដី ប៉ុន្ដែបើពិនិត្យមើលការស្នើសុំគម្រោងសាងសង់ និងទំហំផ្ទៃក្រឡាសំណង់ក្នុងរយៈពេល៩ខែដើមឆ្នាំនេះ គឺមានការកើនឡើង ដែលឆ្លុះបញ្ចាំងថាវិស័យនេះនៅតែរឹងមាំដដែល ៕
ចែករំលែកព័តមាននេះ