ខេត្តប៉ៃលិន ៖ នារីស្រស់ស្អាតម្នាក់បានស្លាប់នៅពាក់កណ្តាលផ្លូវ ខណ:ក្រុមគ្រួសារបញ្ជូនទៅសង្គ្រោះនៅមន្ទីរពេទ្យខេត្តបាត់ដំបង ដោយសារគ្រោះថ្នាក់ចរាចរណ៍រវាងម៉ូតូបុកជាមួយនឹងម៉ូតូ ខណ:ជិះម៉ូតូឆ្លងផ្លូវបត់អត់មើលឆ្វេងស្តាំ ត្រូវបានម៉ូតូ១គ្រឿងទៀត បើកបរផ្លូវត្រង់បុកចំពីក្រោយពេញទំហឹង បណ្តាលឱ្យស្លាប់និងរងរបួសតែម្តង ។
ហេតុការណ៍ខាងលើនេះបានកើតឡើងកាលពីវេលាម៉ោង៧និង១៥នាទីយប់ថ្ងៃទី១៩ ខែតុលា ឆ្នាំ២០១៨ ស្ថិតនៅក្នុងភូមិបឌិននៀវ សង្កាត់ប៉ៃលិន ក្រុងប៉ៃលិន ខេត្តប៉ៃលិន ។
ប្រភពព័ត៌មានបានឱ្យដឹងថា ជនរងគ្រោះទាំង៣នាក់រួមមាន១-ឈ្មោះ ជន ចាន់ធូរ ភេទស្រី អាយុ១៨ឆ្នាំ មុខរបរកសិករ បានស្លាប់តាមផ្លូវពេលបញ្ជូនទៅសង្គ្រោះនៅមន្ទីរពេទ្យខេត្តបាត់ដំបង និងជាអ្នកបើកបរម៉ូតូម៉ាក ហុងដា គ្លីក ពាក់ស្លាកលេខ ប៉ៃលិន ១B-០៦៣៩ រងការខូចខាតស្រាល ។
២-ឈ្មោះ អី ឡុងរ៉ាលី ភេទប្រុស អាយុ២៦ឆ្នាំ ដោយបើកបរម៉ូតូម៉ាក ហុងដា ឌ្រីម ពណ៌ខ្មៅ ពាក់ស្លាកលេខប៉ៃលិន ១C-៥៩៩១ រងការខូចខាតធ្ងន់ ជនរងគ្រោះទាំងពីរនាក់រស់នៅភូមិឃុំកើតហេតុខាងលើ ។
ទី៣-ឈ្មោះ រី រ៉ា ភេទស្រី អាយុ៣០ឆ្នាំ រស់នៅ ខេត្តបាត់ដំបង រងរបួសធ្ងន់ ជាអ្នករួមដំណើរ ។
ប្រភពបន្តទៀតថា មុនពេលកើតហេតុ គេឃើញនារីរងគ្រោះជិះម៉ូតូតែម្នាក់ឯងក្នុងទិសដៅពីត្បូងទៅជើ ងដោយឆ្លងផ្លូវបម្រុងទៅទិញផ្លែក្រូចនៅលើសួនកុមារទល់មុខសាលាខេត្តប៉ៃលិន លុះមិនទាន់ដល់ផង ពេលឆ្លងផ្លូវមិនបានមើលឆ្វេងស្តាំក៏ត្រូវម៉ូតូមួយគ្រឿងជិះគ្នាពីរនាក់បើកបរតាមផ្លូវត្រង់បុកចំពេញទំហឹង បណ្តាលឱ្យរងរបួសធ្ងន់និងស្រាលទាំងអស់គ្នាតែម្តង ។ ភ្លាមៗនោះជនរងគ្រោះដែលរងរបួសទាំងអស់ត្រូវគេបញ្ជូនទៅសង្គ្រោះនៅមន្ទីរពេទ្យបង្អែកខេត្តប៉ៃលិន ។
ចំណែកនារីរងគ្រោះដែលជាអ្នកបើកបរម៉ូតូម៉ាកហុងដា ពាក់ស្លាកលេខ ប៉ៃលិន ១B-០៦៣៩ ដែលរងរបួសធ្ងន់ត្រូវគេបញ្ជូនបន្តទៅសង្គ្រោះនៅមន្ទីរពេទ្យខេត្តបាត់ដំបង តែដោយសាររបួសក្បាលធ្ងន់ពេក ក៏បានស្លាប់តាមផ្លូវ ត្រូវក្រុមគ្រួសារដឹកយកទៅធ្វើបុណ្យតាមប្រពៃណី ។
បច្ចុប្បន្នជនរងគ្រោះផ្សេងទៀត ត្រូវបានសម្រាកព្យាបាលនៅមន្ទីរពេទ្យ ចំណែកម៉ូតូត្រូវបានកម្លាំងជំនាញចរាចរណ៍ផ្លូវគោកនៃស្នងការដ្ឋាននគរបាលខេត្តប៉ៃលិន យកមករក្សាទុករង់ចាំធ្វើការដោះស្រាយនៅពេលក្រោយ ៕
ចែករំលែកព័តមាននេះ