រាជធានីភ្នំពេញ ៖ ប្រមុខដឹកនាំនៃប្រទេសកម្ពុជា និងប្រទេសតួកគីបានសន្យាជំរុញកិច្ចសហប្រតិបត្តិការទ្វេរភាគីឲ្យកាន់តែមានការរីកចម្រើនលើគ្រប់វិស័យ ។ ការសន្យានេះធ្វើក្នុងនួបពិភាក្សាទ្វេរភាគីរវាងសម្តេចតេជោ ហ៊ុន សែន ជាមួយប៊ីណាលី យីដីរីម (Binali Yıldırım)ប្រធានរដ្ឋសភា និងជាអតីតនាយករដ្ឋមន្ត្រីតួកគីនៅរសៀលថ្ងៃទី២០ ខែតុលា ឆ្នាំ២០១៨ ដែលជាថ្ងៃទី១នៃការអញ្ជើញបំពេញទស្សនកិច្ចការងារនៅទីក្រុងអីស្តានប៊ុលសាធារណរដ្ឋតួកគី ។
យោងតាមបណ្តាញសង្គមហ្វេសប៊ុករបស់សម្តេចតេជោបានឲ្យដឹងថាក្នុង ជំនួបសម្តេចតេជោនាយករដ្ឋមន្ត្រី និងលោកប្រធានរដ្ឋសភាតួកគីធ្វើការពិភាក្សាគ្នាយ៉ាងស៊ីជំរៅទាក់ទិនទៅនឹងការរិតចំណងសាមគ្គីភាព និងកិច្ចសហប្រតិបត្តិការនៃប្រទេសទាំងពីរកម្ពុជា-តួកគីឲ្យកាន់តែរឹងមាំ និងរីកចម្រើនទ្វេឡើងថែមទៀត ពិសេសគម្រោងនៃការបើកស្ថានឯកអគ្គរាជទូតរបស់ព្រះរាជាណាចក្រកម្ពុជានៅសាធារណរដ្ឋតួកគីឲ្យបានឆាប់រហ័យបំផុតតាមដែលអាចធ្វើទៅបាន បន្ទាប់ពីប្រទេសតួកកីបានបើកស្ថានឯកអគ្គរដ្ឋទូតរបស់ខ្លួននៅរាជធានីភ្នំពេញកាលបីឆ្នាំ២០១៣ កន្លងទៅ ។
ក្នុងជំនួបទល់មុខគ្នានោះដែរសម្តេចតេជោ និងឯកឧត្តមប្រធានសភាតួកគីបានធ្វើការពិភាក្សាគ្នាយ៉ាងយកចិត្តទុកដាក់ទៅលើការជំរុញទំនាក់ទំនងលើវិស័យការទូតការផ្លាស់ប្តូរយោបល់ទៅលើការជំរុញទំនាក់ទំនងពាណិជ្ជកម្ម វិនិយោគទេសចរណ៍ និងវិស័យផ្សេងៗទៀត ក្នុង នោះ រួមទាំងការជំរុញឲ្យមានការហោះហើរត្រង់ពីតួកគីមកកាន់ព្រះរាជាណាចក្រកម្ពុជា ដើម្បី ជំរុញកំណើនទេសចរណ៍ ពាណិជ្ជកម្ម និងការវិនិយោគ ។ សម្តេចតេជោនាយករដ្ឋមន្ត្រី និងឯកឧត្តមប្រធានសភាតួកគីក៏បានពិភាក្សាគ្នាយ៉ាងយកចិត្តទុកដាក់ទៅកាន់បញ្ហាទ្វេភាគីបញ្ហាពហុភាគីបញ្ហាតំបន់ និងអន្តរជាតិ ពិសេសការបង្កើនជំនឿទុកចិត្ត និងជួយគ្នាទៅវិញទៅមកទាំងក្នុងក្របខណ្ឌទ្វេភាគី ពហុភាគីតំបន់ និងអន្តរជាតិដែលផ្តល់នូវផលប្រយោជន៍ឲ្យគ្នាទៅវិញទៅមក ។ សម្តេចតេជោនាយករដ្ឋមន្ត្រីបានលើកឡើងថា សម្តេចតែងតែចង់មកកាន់ ប្រទេសតួកគីនេះជាយូរមកហើយព្រោះថា តួកគី គឺជាដែនដីនៃការតភ្ជាប់ទ្វីបអាស៊ី និងទ្វីបអឺរ៉ុប និងបានចាត់ទុកថានេះ គឺជាដំណើរទស្សនកិច្ចជាប្រវត្តិសាស្ត្រ និងជាលើកដំបូងបំផុត ក្នុងប្រវត្តិសាស្ត្រនៃមេដឹកនាំកម្ពុជាដំបូងគេដែលបានអញ្ជើញមកធ្វើទស្សនកិច្ចការងារនៅសាធារណរដ្ឋតួកគី ។
ក្នុងជំនួបពិភាក្សាការងារនោះដែរភាគីទាំងពីរបានធ្វើការផ្លាស់ប្តូរទស្សនៈគ្នាក្នុងការជំរុញឲ្យមានការផ្លាស់ប្តូរនូវដំណើរទស្សនកិច្ចពីគ្រប់កម្រិតទាំងអស់នៃប្រទេសទាំងពីរ ដើម្បីធ្វើយ៉ាងណាជំរុញកិច្ចសហប្រតិបត្តិការនៃប្រទេសទាំងពីរកាន់តែមានកម្រិតខ្ពស់ថែមទៀត ។ បន្ទាប់ពីបានចំណាយពេលនៃជំនួបពិភាក្សាទល់មុខគ្នារួចមកសម្តេចតេជោនាយករដ្ឋមន្ត្រី និងលោកប្រធានសភាតួកគីបានអញ្ជើញលំហែកាយក្នុងបរិវេណនៃវិមានរដ្ឋាភិបាលក្នុងទីក្រុងអីស្តានប៊ុល ពិសេសការស្រូបយកខ្យល់អាកាសបរិសុទ្ធ មាត់សមុទ្រ មុន និងពិធីទទួលទានអាហារការងារពេលថ្ងៃ ។
ក្នុងឱកាសនោះដែរលោកប្រធានរដ្ឋសភាតួកគីបានសំដែងនូវការស្វាគមន៍យ៉ាងកក់ក្តៅបំផុត ជូនចំពោះសម្តេចតេជោនាយករដ្ឋមន្ត្រី និងគណៈប្រតិភូជាន់ខ្ពស់រាជរដ្ឋាភិបាលកម្ពុជាដែលបានជ្រើសរើសយកប្រទេសតួកគីសម្រាប់ដំណើរបំពេញទស្សនកិច្ចការងារជាលើកដំបូង ក្នុងប្រវត្តិសាស្ត្រនៃទំនាក់ទំនងរបស់ប្រទេសទាំងពីរដែលទើបមានអាយុ២០ឆ្នាំកន្លងមក ។ លោក ប្រធានសភាបានឯកភាពទៅនឹងទស្សនៈលើកឡើង របស់សម្តេចតេជោនាយករដ្ឋមន្ត្រីក្នុងការជំរុញឲ្យមានការផ្លាស់ប្តូរទស្សនកិច្ចពីគ្រប់កម្រិតទាំងអស់ក្នុងន័យជំរុញកិច្ចសហប្រតិបត្តិការនៃប្រទេសទាំងពីរឲ្យកាន់តែមានការរីកចម្រើនខ្ពង់ខ្ពស់ថែមទៀត ៕
ចែករំលែកព័តមាននេះ