ខេត្តកំពង់ឆ្នាំង ៖ អំពើឃាតកម្មដ៏ព្រៃផ្សៃយង់ឃ្នងទៅលើកុមារី២នាក់បងប្អូនដោយគ្មានធម៌មេត្តា រួចញាត់ សពចូលកេសដែក (មុននេះថាកេសឈើ) បានធ្វើឱ្យពលរដ្ឋទូទាំងប្រទេសមានការចាប់អារម្មណ៍យ៉ាងខ្លាំង ព្រោះជាសកម្មភាពដ៏សាហាវ គ្រាដែលឪពុកម្តាយក្មេងស្រីមិននៅផ្ទះ។ បន្ទាប់ពីមានការផ្សព្វផ្សាយពីអំពើឃាតកម្ម លើកុមារី២នាក់បងប្អូននេះ ក៏មានបងប្អូនប្រជាពលរដ្ឋដែលមានក្តីមេត្តាអាណិតអាសូរកុមារីរងគ្រោះ បានទៅចូលរួមបុណ្យសព និងខ្លះផ្ញើលុយកាក់ទៅចូលបុណ្យសព ហើយអ្វីដែលសំខាន់ទៀតនោះ គឺសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក៏បានឧបត្ថម្ភក្នុងពិធីបុណ្យសពកុមារីរងគ្រោះដ៏សន្ធឹកសន្ធាប់ផងដែរ ។
នាព្រឹកថ្ងៃទី១៩ ខែតុលា ក្រៅពីសប្បុរសជនជិតឆ្ងាយ គេសង្កេតឃើញមានលោកស្រី ហួន ច័ន្ទបូរ៉ា នាយិកានាយកដ្ឋានទំនាក់ទំនងកាកបាទក្រហមកម្ពុជា តំណាងដ៏ខ្ពង់ខ្ពស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា បាននាំយកថវិកានិងគ្រឿងឧបភោគបរិភោគមួយចំនួនរបស់សម្តេចកិតិ្តព្រឹទ្ធបណ្ឌិត ទៅចូលរួមបុណ្យសពកុមារីរងគ្រោះដល់វត្តធម្មទានវ័ន ស្ថិតក្នុងភូមិថ្មី ឃុំផ្សារ ស្រុកបរិបូណ៌ ។
នៅក្នុងឱកាសនោះ លោកស្រី ហួន ច័ន្ទបូរ៉ាមានប្រសាសន៍ថា ដោយក្តីអាណិតអាសូរចំពោះការបាត់បង់ ជីវិតកុមារីរងគ្រោះទាំង២នាក់បងប្អូន សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធាន កាក បាទ ក្រហមកម្ពុជា បានចាត់តាំងលោកស្រីឲ្យដឹកនាំប្រតិភូនាំយកអំណោយជាគ្រឿងឧបភោគបរិភោគ និងថវិកាមួយចំនួនមកឧបត្ថម្ភដល់ពិធីបុណ្យសព ក្នុងនោះមានអង្ករ២០០គីឡូក្រាម មី៧កេស ត្រីខ៧យួរ ទឹកបរិសុទ្ធ៧កេស និងថវិកាចំនួន២០លានរៀល ។ លោកស្រី សូមពាំនាំនូវបណ្តាំផ្តាំផ្ញើរបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន សូមចូលរួមសោកស្តាយនិងរំលែកទុក្ខដ៏សែនក្រៀមក្រំនេះ និងសូមផ្តាំផ្ញើដល់ឪពុកម្តាយកុមារីរងគ្រោះ ត្រូវពង្រឹងស្មារតីខិតខំតស៊ូក្នុងជីវិតបន្តទៀត និងផ្ចង់ស្មារតីរៀបចំធ្វើបុណ្យសពកូនទៅតាមគន្លងប្រពៃណីផងដែរ ។
នៅក្នុងឱកាសនោះ លោក ប៊ិន សុផាន មេឃុំផ្សារ តាងនាមជំនួសមុខឱ្យក្រុមគ្រួសារ នៃសពកុមារីរងគ្រោះ បានលើកដៃសំពះថ្លែងអំណរគុណដល់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលជានិច្ចកាលតែងយកចិត្តទុកដាក់ដល់ប្រជាពលរដ្ឋរងគ្រោះដោយធម្មជាតិ និងរងគ្រោះដោយកត្តាផ្សេងៗ ។ ជាក់ស្តែងថ្ងៃនេះអំណោយរបស់សម្ដេចកិត្តិព្រឹទ្ធបណ្ឌិត មានចំនួនសន្ធឹកសន្ធាប់ ។ ជាមួយគ្នានេះ ក៏ សូមថ្លែង អំណរគុណសប្បុរសជនជិតឆ្ងាយ ដែលបានមកចូលរួមបុណ្យសពកុមារីរងគ្រោះក្នុងថ្ងៃនេះផងដែរ ។
សូមរំឭកថា កុមារីរងគ្រោះ២នាក់បងប្អូនត្រូវបានឪពុកម្តាយទៅធ្វើការនៅស្រុកឆ្ងាយ ក្នុងនោះឪពុកឈ្មោះ ប្រាក់ ជា ទៅធ្វើការនៅប្រទេសថៃ ឯម្តាយឈ្មោះ អុល ធីតា ទៅធ្វើការនៅភ្នំពេញ ហើយទុកកូនទាំង២នាក់ឲ្យនៅចាំផ្ទះ ដោយគ្រាន់តែផ្តាំផ្ញើមាមីងឲ្យជួយមើលប៉ុណ្ណោះ ។ នៅយប់ថ្ងៃទី១៧ ខែតុលា កុមារីជាបងឈ្មោះ អ៊ុន លក្ខិណា អាយុ១៤ឆ្នាំ និងប្អូនស្រីឈ្មោះ ជន់ មេត្តា អាយុ៧ឆ្នាំ ទាំង២នាក់ត្រូវបានឃាតករមិនស្គាល់មុខឡើងសម្លាប់ដល់លើផ្ទះ រួចញាត់សពចូលក្នុងហិបដែក ។ លុះព្រឹកឡើងថ្ងៃទី១៨ ខែតុលា វេលាម៉ោងជាង១១ព្រឹក ឪពុកមាឈ្មោះ ភី វុទ្ធី បាត់ក្មួយស្រីទាំង២នាក់យូរពេក មានការសង្ស័យក៏តាមរកស្រាប់ឃើញក្មួយស្រីទាំង២នាក់ត្រូវឃាតករសម្លាប់រួចញាត់ចូលក្នុងហិបដែកនៅលើផ្ទះ ទើបបណ្ដាលឲ្យមានការភ្ញាក់ផ្អើលឡើង ។
ជាមួយគ្នានេះ បន្ទាប់ពីមានសារព័ត៌មាននានាបានចុះផ្សាយពីអំពើឃាតកម្មដ៏សាហាវយង់ឃ្នងនេះ ក៏មានសប្បុរសជនជាច្រើនបានទៅជួយឧបត្ថម្ភជាបន្តបន្ទាប់ ដែលតាមលោកមេឃុំផ្សារបានឲ្យថា ថវិកាចូលរួមបុណ្យសពកុមារីរងគ្រោះគិតត្រឹមព្រឹកថ្ងៃទី១៩ តុលា មានចំនួនជាង៣៤លានរៀល ក្នុងនោះ២០លានរៀល ជាអំណោយរបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ។
ព័ត៌មានពីសមត្ថកិច្ចនគរបាលបានបញ្ជាក់ថា អំពើឃាតកម្មដ៏ព្រៃផ្សៃនេះ មានប្តីប្រពន្ធ២នាក់ត្រូវបានសមត្ថកិច្ចហៅមកសាកសួរ ។ អ្នកតាមដានបាននិយាយក្រៅផ្លូវការនៅឡើយថា ការសម្លាប់ក្រោយចាប់រំលោភនាងបងនោះ គឺពិតណាស់បង្កដោយមនុស្សដែលពួកនាងស្គាល់ ទើបឈានដល់ការសម្លាប់បំបិទមាត់ ។ បើបែបនេះមែនមិនយូរទេ ឃាតករឈាមខ្មៅនោះច្បាស់ជាចុះនរកមិនខាន ៕
ចែករំលែកព័តមាននេះ