ទីក្រុងឡុងដ៍ ៖ ប្រធានអង្គការពាណិជ្ជកម្មពិភពលោក(WTO) បានព្រមានកាលពីថ្ងៃពុធមកថា ភាពតានតឹងឡើងនៃសង្គ្រាមពាណិជ្ជកម្ម ជាហានិភ័យពិតៗដល់សេដ្ឋកិច្ចពិភពលោក និងអាចផ្តល់ការគំរាមកំហែងដល់ការងាររាប់លានកន្លែងផងដែរ ។ លោក Roberto…
ទីក្រុងឡុងដ៍ ៖ ប្រធានអង្គការពាណិជ្ជកម្មពិភពលោក(WTO) បានព្រមានកាលពីថ្ងៃពុធមកថា ភាពតានតឹងឡើងនៃសង្គ្រាមពាណិជ្ជកម្ម ជាហានិភ័យពិតៗដល់សេដ្ឋកិច្ចពិភពលោក និងអាចផ្តល់ការគំរាមកំហែងដល់ការងាររាប់លានកន្លែងផងដែរ ។
លោក Roberto Azevedo ប្រធានអង្គការនេះ បានបញ្ជាក់ដែរថា លោកប្រធានាធិបតីដូណាល់ត្រាំ (Donald Trump) កំពុងតែជាប់គាំងក្នុងសង្គ្រាមពាណិជ្ជកម្មមួយជាមួយនឹងប្រទេសចិន និងបានដាក់ពន្ធរាប់ប៊ីលានដុល្លារដើម្បីដោះស្រាយបញ្ហាឱនភាពពាណិជ្ជកម្ម និងបញ្ចប់សកម្មភាពពាណិជ្ជកម្មដែលមិនអាចទទួលបានរបស់ប្រទេសចិន ។
លោកត្រាំក៏បានដាក់គោលដៅលើសហភាពអឺរ៉ុប(EU)ដែរ ហើយលោក Azevedo បាននិយាយថា សកម្មភាពទាំងនេះប្រៀបដូចជាគ្មានទីបញ្ចប់សោះឡើយ និងបានស្នើដល់អ្នកដឹកនាំជុំវិញពិភពលោកឲ្យចរចាគ្នា ។
សេដ្ឋវិទូប្រចាំ WTO បានវិភាគថា ការបាក់បែកទាំងស្រុងនៃកិច្ចសហប្រតិបត្តិការពាណិជ្ជកម្មអន្តរជាតិ នឹងបង្កឲ្យមានការដំឡើងពន្ធយ៉ាងខ្ពស់ និងធ្វើឲ្យការលូតលាស់ពាណិជ្ជកម្មពិភពលោកធ្លាកចុះ១៧% និងការលូតលាស់សេដ្ឋកិច្ចជុំវិញពិភពលោកធ្លាក់ចុះ១,៩%។
លោកបានបន្តថា ៖« ឥទ្ធិពលទាំងនេះនឹងបង្កការប៉ះពាល់យ៉ាងធ្ងន់ធ្ងរដល់ពលករ សហគ្រាស និងសហគមន៍ ខណៈដែលពួកគេព្យាយាមសម្របខ្លួនសាជាថ្មី »។ លោកបានបន្ថែមថា ៖« ពលកររាប់លាន នាក់ប្រហែលជាត្រូវស្វែងរកការងារថ្មី សហគ្រាសត្រូវរកផលិតផលនិងទីផ្សារថ្មី និងសហគមន៍ត្រូវរកប្រភពថ្មីសម្រាប់ការលូតលាស់ »។
មកដល់បច្ចុប្បន្ន លោកប្រធានាធិបតីត្រាំបានដាក់ពន្ធលើផលិតផលចិនប្រមាណ២៥០ប៊ីលានដុល្លារទៅហើយដែលនាំចូលទៅកាន់សហរដ្ឋអាមេរិក ហើយលោកបានគម្រាមថានឹងអាចដាក់ពន្ធបន្ថែមទៀត ។
លោកក៏បានបង្កើនជំនួយផ្នែកយោធាដល់ដៃគូប្រកួតប្រជែងរបស់ប្រទេសចិនគឺតៃវ៉ាន់ និងចោទប្រកាន់ដល់ប្រទេសចិនថាជ្រៀតជ្រែកចូលក្នុងការបោះឆ្នោតនៅសហរដ្ឋអាមេ
រិក ។
លើសពីនេះទៅទៀត សហរដ្ឋអាមេរិកចោទប្រកាន់ប្រទេសចិនថាលួចបច្ចេកវិទ្យា និងបង្ខំឲ្យអាជីវកម្មបរទេសសហការជាមួយនឹងដៃគូក្នុងស្រុកដើម្បីធ្វើឲ្យពួកគេផ្ទេរចំណេះដឹង ៕
ចែករំលែកព័តមាននេះ