រាជធានីភ្នំពេញ ៖ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាលោក អ៊ិត សំហេង បានអះអាងបញ្ហាប្រឈមនានានៃពាណិជ្ជកម្មលើពិភពលោកមិនប៉ះពាល់ដល់ការបញ្ជាទិញទំនិញនៅកម្ពុជានោះទេ ។
រដ្ឋមន្ដ្រីក្រសួងបានលើកឡើងទៀតថា មូលហេតុបញ្ហាប្រឈមនានានៃពាណិជ្ជកម្មលើពិភពលោកមិនប៉ះពាល់ដល់ការបញ្ជាទិញនៅកម្ពុជានោះទេ ដោយសារដៃគូរបញ្ជាទិញទំនិញពីកម្ពុជានៅតែបន្ដកិច្ចសហប្រតិបត្ដិការជាមួយគ្នាដដែល ។ ការអះអាងរបស់លោករដ្ឋមន្ត្រីប្រាប់អ្នកសារព័ត៌មាន ក្រោយបញ្ចប់ជំនួបពិភ្សាការងារជាមួយសមាគមអ្នកបញ្ជាទិញ ដឹកនាំដោយលោក Mechael Posner ប្រធានក្រុមប្រឹក្សាភិបាលនៃសមាគមយុត្ដិធម៌ការងាររបស់សហរដ្ឋអាមេរិក (FLI) និងរួមទាំងក្រុមអ្នកបញ្ជាទិញផលិតផលសំលៀកបំពាក់ និងស្បែកជើងសម្រាប់នាំចេញទៅសហរដ្ឋអាមេរិក និងសហគមអ៊ឺរ៉ុបនាព្រឹកថ្ងៃទី១៩ ខែតុលា នៅទីស្ដីការក្រសួង ។
លោកអ៊ិត សំហេង រដ្ឋមន្ដ្រីក្រសួងការងារ និងបណ្ដុះបណ្ដាលវិជ្ជាជីវៈក៏បានឲ្យដឹងថា ការពិភាក្សានាពេលនេះក្នុងគោលបំណងពិនិត្យមើលនូវវឌ្ឍនភាពទាក់ទងទៅនឹងលក្ខខណ្ឌការងារការរៀបចំប្រាក់ឈ្នួល យន្ដការដោះស្រាយវិវាទការងារ និងការអនុវត្ដច្បាប់សហជីពជាដើម ។ លោកបញ្ជាក់ថា «ការពិភាក្សានេះក៏បានលើកឡើងពីបញ្ហាប្រឈម និងរួមគ្នា ដើម្បីបន្ដកិច្ចសហប្រតិបត្ដិការទៅមុខបន្ដទៀត» ។ ជាមួយគ្នានោះដែរលោករដ្ឋមន្ត្រីក៏បញ្ជាក់ថា ភាគីទាំងពីរសង្ឃឹមថា បញ្ហាប្រឈមនានានៃពាណិជ្ជកម្មលើពិភពលោកដែលបានកើតឡើងនាពេលបច្ចុប្បន្ននេះ គឺមិនប៉ះពាល់ដល់កិច្ចសហប្រតិបត្ដិការរវាងដៃគូនានាដែលជាអ្នកបញ្ជាទិញផលិតផលសំលៀកបំពាក់ និងស្បែកជើងសម្រាប់នាំចេញទៅសហរដ្ឋអាមេរិក និងសហគមអ៊ឺរ៉ុប និងកម្ពុជានោះទេ ។
លោករដ្ឋមន្ត្រីបានគូសបញ្ជាក់ថា «យើងក៏សង្ឃឹមថា បញ្ហាប្រឈមនានាដែលកើតឡើងនៅក្នុងពេលបច្ចុប្បន្ននេះទាក់ទងនឹងបញ្ហាពាណិជ្ជកម្មរបស់ពិភពលោក គឺនឹងមិនប៉ះពាល់ទៅដល់កិច្ចសហប្រតិបត្តិការរវាងកម្ពុជា និងដៃគូទាំងអស់នោះទេ ហើយដៃគូទាំងអស់ជាមួយយើង គឺសុទ្ធតែមានគំនិតនេះដូចគ្នា» ។ លោកអ៊ិត សំហេង ក៏បានបញ្ជាក់ដែរថា ការជួបពិភាក្សាគ្នាជាមួយសមាគម FLA ខាងលើនេះ គឺដើម្បីពិនិត្យឡើងវិញ ទៅលើវឌ្ឍនភាពលក្ខខណ្ឌការងារ ការរៀបចំប្រាក់ឈ្នួល យន្តការដោះស្រាយវិវាទ និងការអនុវត្តច្បាប់សហជីពជាដើម ហើយក្នុងកិច្ចពិភាក្សានាពេលនេះ ក៏បានលើកឡើងពីវឌ្ឍនភាព និងបញ្ហាប្រឈមនានាផងដែរ ។ តែទោះជាយ៉ាងណាកម្ពុជារួមជាមួយដៃគូនានារបស់ខ្លួននៅតែបន្តដោះស្រាយរួមគ្នា ដើម្បីបន្តកិច្ចសហប្រតិបត្តិការទៅមុខទៀត ។
សូមជម្រាបថា សមាគមយុត្តិធម៌ការងារ (FLA) គឺជាសមាគមធំរបស់សហរដ្ឋអាមេរិកដែលតំណាងឱ្យអ្នកបញ្ជាទិញផលិតផលសម្លៀកបំពាក់ និងស្បែកជើងពីកម្ពុជាទៅកាន់សហរដ្ឋអាមេរិក និងសហគមន៍អឺរ៉ុប ។ សមាគមនេះក៏ជាដៃគូចាស់ដ៏ល្អមួយរបស់កម្ពុជាផងដែរ ។
សូមបញ្ជាក់ថា យោងតាមសេចក្តីប្រកាសព័ត៌មានរបស់គណៈកម្មការអឺរ៉ុបបានបញ្ជាក់ថា ស្នងការពាណិជ្ជកម្មអឺរ៉ុបនឹងធ្វើការតាមដាន និងវាយតម្លៃអំពីស្ថានភាពក្នុងប្រទេសកម្ពុជារយៈពេល៦ខែទៀត ចាប់ពីពេលជូនដំណឹងមុនឈានទៅសម្រេចថា តើគួរបញ្ឈប់នីតិវិធីលុបចោលប្រព័ន្ធអនុគ្រោះពន្ធជាបណ្ដោះអាសន្ន ឬធ្វើការលុបចោលប្រព័ន្ធអនុគ្រោះពន្ធជាបណ្ដោះអាសន្ននេះតែម្ដង ៕
ចែករំលែកព័តមាននេះ