ខេត្តក្រចេះ ៖ សេចក្តីរាយការណ៍បឋមឱ្យដឹងថា ប្តី-ប្រពន្ធ១គូ ត្រូវកម្លាំងសមត្ថកិច្ចស្ទាក់ចាប់បានតាមផ្លូវ ក្រោយធ្វើសកម្មភាពយកក្រដាសប្រាក់ដុល្លារក្លែងក្លាយ(លុយសែនខ្មោច) ទៅចាយយ៉ាងគគ្លើននៅកន្លែងចាក់សាំងមួយកន្លែង កាលពីវេលាម៉ោង១១ និង៣០នាទីព្រឹកថ្ងៃទី១៨ តុលា…
ខេត្តក្រចេះ ៖ សេចក្តីរាយការណ៍បឋមឱ្យដឹងថា ប្តី-ប្រពន្ធ១គូ ត្រូវកម្លាំងសមត្ថកិច្ចស្ទាក់ចាប់បានតាមផ្លូវ ក្រោយធ្វើសកម្មភាពយកក្រដាសប្រាក់ដុល្លារក្លែងក្លាយ(លុយសែនខ្មោច) ទៅចាយយ៉ាងគគ្លើននៅកន្លែងចាក់សាំងមួយកន្លែង កាលពីវេលាម៉ោង១១ និង៣០នាទីព្រឹកថ្ងៃទី១៨ តុលា ។
សេចក្តីរាយការណ៍បន្តថា ជនសង្ស័យទាំង២ ប្តីឈ្មោះយ៉ន សំ អាយុ៣៩ឆ្នាំ និងប្រពន្ធឈ្មោះផាន ឡែន អាយុ៣៣ឆ្នាំ ជាអ្នកធ្វើចំការ រស់នៅភូមិខ្សាក ឃុំពពេល ស្រុកពញាក្រែក ខេត្តត្បូងឃ្មុំ ។ ជនសង្ស័យទាំង២នាក់ ត្រូវបានឆែករកឃើញនៅជាប់ខ្លួន មានប្រាក់ដុល្លារអាមេរិចក្លែងក្លាយដ៏ច្រើនសន្ធឹក ចំនួន5415$ (ប្រាំពាន់បួនរយដប់ប្រាំដុល្លារ) ។
ប្រភពបន្តថា នៅមុនពេលកើតហេតុ ពួកគេជិះម៉ូតូមួយគ្រឿង អត់មានស្លាកលេខទៅឈប់ចាក់សាំងនៅមុខផ្ទះអ្នកភូមិ ឈ្មោះឈាន ចាន់ថន ភេទប្រុស អាយុ៤០ឆ្នាំ ជាអ្នកលក់សាំងនៅចំណុចភូមិកសាង ឃុំចង្ក្រង់ ស្រុកចិត្របុរី ខេត្តក្រចេះ ហើយបានហុចក្រដាសដុល្លារប្រភេទ20$មួយសន្លឹកទៅអ្នកលក់សាំង រួចជិះគេចខ្លួន ។
ក្រោយមក អ្នកលក់សាំងដឹងទាន់ ក៏រាយការណ៍ភ្លាមៗមកកំលាំងនគរបាលប៉ុស្តិ៍រដ្ឋបាលចង្ក្រង់ និងកម្លាំងប្រជាការពារ ក៏បានចាំស្ទាក់ជនសង្ស័យបានទាំង២នាក់ នាំមកកាន់អធិការដ្ឋាននគរបាលស្រុកបុរី ដើម្បីសាកសួរតែម្តង ។
ចែករំលែកព័តមាននេះ