ខេត្តក្រចេះ ៖ សេចក្តីរាយការណ៍បឋមឱ្យដឹងថា ពលរដ្ឋជាច្រើននាក់បានពុលធ្ងន់ធ្ងរ រហូតមានអ្នកស្លាប់៣នាក់ និងកំពុងសង្គ្រោះប្រមាណជាង៤០នាក់ ក្រោយពីពួកគេនាំគ្នាហូបសាច់សត្វពស់ និងផឹកជាមួយស្រា.សមក ខណៈពួកគេច្រូតស្រូវនៅស្រែមួយកន្លែង ។ នេះបើយោងតាមការឱ្យដឹងរបស់អ្នកភូមិនៅទីនោះ ។ហេតុការណ៍ពុល កើតឡើងកាលពីយប់ថ្ងៃទី១៨ តុលា ស្ថិតក្នុងភូមិដំរ៉ែ ឃុំបឹងចារស្រុកសំបូរ ។
សេចក្តីរាយការណ៍បន្តថា អ្នកស្លាប់ទាំង៣នាក់ ត្រូវបានស្គាល់១-ឈ្មោះទែន ណេត ភេទប្រុស អាយុ៣៨
ឆ្នាំ (ស្លាប់ពេលមកដល់មណ្ឌលសុខភាពស្រុកសំបូរ) ។ ២-ឈ្មោះនួន ណូយ ភេទប្រុស អាយុ៤៣ឆ្នាំ និង៣-ឈ្មោះគង់ ឡាន់ ភេទស្រី អាយុ៣៨ឆ្នាំ ទាំង២នាក់ (បានស្លាប់ពេលបញ្ជូនដល់មន្ទីរពេទ្យបង្អែកខេត្តក្រចេះ )។ ដោយឡែក អ្នកកំពុងសំរាកព្យាបាលនៅមន្ទីរបង្អែកខេត្តក្រចេះ គឺមានចំនួន៤៤នាក់ (ស្រី១៧នាក់) ។ ជនរងរងគ្រោះទាំងអស់គឺកើតអាការពុលរហូតក្អួតចង្អោ វិលមុខ និងស្រវាំងភ្នែក ។
ប្រភពបន្តទៀតថា ករណីនេះ សមត្ថកិច្ចកំពុងសន្និដ្ឋានបឋមថា អាចបណ្តាលមកពីពុលស្រា.ស តែយ៉ាងណា កម្លាំងកំពុងធ្វើការស្រាវជ្រាវបន្តទៀត ថាបណ្តាលមកពីអ្វីប្រាកដ ។
ទាក់ទិនករណីពុលនេះដែរ ដោយមានការណែនាំពីលោកអភិបាលខេត្ត, លោកឧត្តមសេនីយ៍ស្នងការរង
ទទួលជំនាញ និងលោកកែវ សុជាតិ ព្រះរាជអាជ្ញាអមសាលាដំបូងខេត្ត កម្លាំងជំនាញបានចុះដកហូត
ស្រា.សដែលនៅសល់ពីអ្នកលក់ចំនួន២នាក់ហើយនាំខ្លួនអ្នកផលិតស្រា.ស ឈ្មោះកុច សុហេង ភេទប្រុស អាយុ៣១ឆ្នាំ រស់នៅភូមិកោះដំបង ឃុំបឹងចារ មកកាន់អធិការដ្ឋាន ដើម្បីសាកសួរ និងពិនិត្យផងដែរ ។
ព័ត៌មានលម្អឹតនឹងមានផ្សាយជូនបន្តលើទំព័រកាសែតកោះសន្តិភាព ។
ចែករំលែកព័តមាននេះ