ក្រុមហ៊ុន Apple បានប្រកាសបរិច្ចាគនាឡិកា Apple Watch ចំនួន១ពាន់គ្រឿងដើម្បីជួយដល់អ្នកស្រាវជ្រាវនៅសាកលវិទ្យាល័យក្នុងការឈ្វេងយល់បន្ថែមពីវិបត្តិបរិភោគអាហារដូចជា ការបរិភោគអាហារច្រើនលើសលប់ជាដើម ។ សារព័ត៌មានបានរាយការណ៍មកថា សាកលវិទ្យាល័យ…
ក្រុមហ៊ុន Apple បានប្រកាសបរិច្ចាគនាឡិកា Apple Watch ចំនួន១ពាន់គ្រឿងដើម្បីជួយដល់អ្នកស្រាវជ្រាវនៅសាកលវិទ្យាល័យក្នុងការឈ្វេងយល់បន្ថែមពីវិបត្តិបរិភោគអាហារដូចជា ការបរិភោគអាហារច្រើនលើសលប់ជាដើម ។
សារព័ត៌មានបានរាយការណ៍មកថា សាកលវិទ្យាល័យ University of North Carolina កំពុងតែធ្វើការសិក្សាពីវិបត្តិនេះដែលការសិក្សានេះមានឈ្មោះថា BEGIN ឬ Binge Eating Genetics Initiative ដើម្បីឈ្វេងយល់បន្ថែមពីការបរិភោគអាហារលើសលប់ ។ អ្នកដែលជួបវិបត្តិនេះតែងតែទទួលទានអាហារច្រើនដោយមិនអាចគ្រប់គ្រងបានក្នុងរយៈពេលខ្លីណាមួយ ។
សាកលវិទ្យាល័យនេះមានគោលដៅរកអ្នកស្ម័គ្រចិត្តចំនួន១ពាន់នាក់ដែលមានវិបត្តិបរិភោគ ហើយអ្នកស្រាវជ្រាវនឹងប្រមូលទិន្នន័យពីការគិត និងអារម្មណ៍តាមរយៈកម្មវិធីមួយដែលមានឈ្មោះថា Recovery Record។ ប៉ុន្តែអ្នកស្រាវជ្រាវក៏គិតថា ទិន្នន័យចង្វាក់បេះដូងក៏មានសារសំខាន់ដែរ ។
អ្នកស្រាវជ្រាវនឹងតាមដានចង្វាក់បេះដូងដោយប្រើ Sensor របស់នាឡិកាក្នុងរយៈពេល១ខែដើម្បីដឹងថាមានការប្រែប្រួលឬទេ មុនពេលការទទួលទានអាហារលើសលប់ ។
មានមនុស្សប្រមាណ ៣០លាននាក់យ៉ាងតិចនៅសហរដ្ឋអាមេរិកដែលមានវិបត្តិបរិភោគអាហារ ហើយគោលដៅមួយនៃការសិក្សានេះគឺចង់ឈ្វេងយល់ថា តើការដឹងមុនដូចជាការឲ្យនាឡិកាផ្តល់ការព្រមានដល់អ្នកប្រើប្រាស់ អាចជួយបញ្ឈប់ការទទួលទានលើសលប់ឬទេ ។
Apple បានព្យាយាមលើកតម្កើងនាឡិការបស់ពួកគេជាឧបករណ៍សុខភាព និងកីឡា ដែលអាចតាមដានការធ្វើលំហាត់ប្រាណ និងតាមដានចង្វាក់បេះដូងជាដើម ៕
ចែករំលែកព័តមាននេះ