ឈ្មួញលក់ផ្លែស្វាយថ្ងូរដូចព្រាប រឿងចំណាយប្រាក់តាមដងផ្លូវ (មានវីដេអូ)
- ស្វាយរៀង
ខេត្តស្វាយរៀង ៖ ក្រុមឈ្មួញជួញផ្លែស្វាយទៅលក់នៅប្រទេសវៀតណាម បានត្អូញត្អែរប្រាប់អ្នកសារព័ត៌មានថា ប៉ុន្មានខែចុងក្រោយនេះមុខរបរជួញផ្លែស្វាយទៅប្រទេសវៀតណាមមិនសូវចំណេញទេ ដោយចំណាយច្រើនទៅលើកម្មករលើកដាក់ច្រើនសារ ជាពិសេសចំណាយទៅលើសមត្ថកិច្ចតាមដងផ្លូវ និងសមត្ថកិច្ចនៅប៉ុស្តិ៍ច្រកទ្វារព្រំដែនយកតាមក្បាលឡាន ប្រសិនបើឡានយីឌុបត្រូវបង់៣០ម៉ឺនក្នុង១គ្រឿង ឡាន២៥តោនយក២៥ម៉ឺនរៀល…
ហើយក្រុមឈ្មួញបាននិយាយទៀតថា ពួកគាត់មានចម្ងល់ខ្លាំងណាស់ ពួកគាត់បង់ប្រាក់នៅច្រកព្រំដែនដូងឃុំដូង ស្រុករមាសហែកនេះ មាន៥ស្ថាប័នសរុបទឹកប្រាក់៣០ម៉ឺនរៀល ក៏ប៉ុន្តែមិនដែលឃើញសមត្ថកិច្ចណាមួយឲ្យវិក័យប័ត្របង់ប្រាក់ឡើយ គឺក្រុមសមត្ថកិច្ចទាំងនោះគេមកឡើងមើលលើរថយន្តរួចទារតម្លៃតែម្តង តាមគេប៉ាន់ស្មានថា ប្រហែលប៉ុន្មានតោនគេយកប្រាក់តែម្តង មិនដែលសរសេរវិក័យប័ត្រឡើយ។
បើតាមបុរស់ម្នាក់ឈ្មោះ សួន ម៉ារ៉ា អាយុ២៧ឆ្នាំ ជាអ្នកជួញផ្លែស្វាយបានឲ្យដឹងថា ស្វាយពួកគាត់ទៅម៉ៅតាមចំការនៅខេត្តកំពង់ស្ពឺ មកលក់ឲ្យឈ្មួញវៀតណាមនៅច្រកទ្វារតំបន់ព្រំដែន ដូងនេះ គឺមានបីប្រភេទ ស្វាយលេខ១ លក់បាន១គីឡូ១,១០០រៀលទៅ១,២០០រៀល ស្វាយលេខ២ ក្នុង១គីឡូ៩០០ទៅ១,០០០រៀល និងលេខ៣ក្នុង១គីឡូ៧០០រៀល។
ហើយស្វាយលេខ១ ជួនកាលវៀតណាមទម្លាក់តម្លៃដល់៩០០រៀល១គីឡូក៏មានធ្វើឲ្យខាតដោយសារការចំណាយលើសមត្ថកិច្ចតាមដងផ្លូវច្រើនកន្លែង ហើយមកដល់ព្រំដែនវត្តដូង ភូមិដូង ឃុំដូង ស្រុករមាសហែកនេះ ចំណាយកាន់តែច្រើនទៀត គឺចំណាយលើកម្មករលើកចុះពីឡានដាក់រ៉ឺម៉ក់ និងលើកពីរ៉ឺម៉កដាក់លើឡានវៀតណាមក្នុង១តោន៨,០០០រៀល ឈ្នួលរ៉ឺម៉ក់១គ្រឿង១៦,០០០រៀល (១គ្រឿងដឹកបាន២តោន) ចំណាយឲ្យទាហ៊ានវៀតណាមក្នុងមួយរ៉ឺម៉ក់២ម៉ឺនរៀល និងចំណាយឲ្យសមត្ថកិច្ច៥ស្ថាប័ននៅប្រចាំការច្រកទ្វាព្រំដែនដូងតាមក្បាលឡានចាប់ពី១៥ម៉ឺន ២៥ម៉ឺនទៅ៣០ម៉ឺនរៀល។
ហើយកាលពី៣ខែមុន វៀតណាមឲ្យឡានស្វាយដឹកចូលដល់វៀតណាម គឺចំណាយអស់តិច ពេលសាងដាក់រ៉ឺម៉កចំណាយច្រើន ហើយការចំណាយគ្មានវិក័យប័ត្រ គឺប្រាក់ដែលបង់បានទៅលើហោប៉ៅបុគ្គល ទើបពួកគាត់សំណូមពរឲ្យអាជ្ញាធរមានសមត្ថកិច្ចមេត្តាជួយមើលផងទាន។
ទាក់ទិនករណីខាងលើនេះ មិនអាចសុំការបំភ្លឺពីសមត្ថកិច្ចប៉ុស្តិ៍ច្រកទ្វារតំបន់ព្រំដែនដូង បានទេ ដោយអ្នកយាមប្រាប់ថា មេមិននៅទៅប្រជុំនៅខេត្ត៕
ចែករំលែកព័តមាននេះ