រាជធានីភ្នំពេញ ៖ មន្ត្រីជាន់ខ្ពស់ក្រសួងពាណិជ្ជកម្មបានឱ្យដឹងថា កម្ពុជាបានត្រៀមលក្ខណៈរួចរាល់ដើម្បីពង្រឹងកិច្ចសហប្រតិបត្តិការជាមួយឥណ្ឌូណេស៊ីទៅលើវិស័យអាទិភាពមួយចំនួន ដើម្បីកាត់បន្ថយឱនភាពទំហំពាណិជ្ជកម្មទ្វេភាគី ។
ថ្លែងក្នុងជំនួបពិភាក្សាការងារទ្វេភាគីជាមួយលោក ស៊ូឌីរម៉ាន់ ហាសែង (Sudirman Haseng) ឯកអគ្គរដ្ឋទូតវិសាមញ្ញ និងពេញសមត្ថភាពថ្មីនៃសាធារណរដ្ឋឥណ្ឌូណេស៊ីប្រចាំនៅកម្ពុជា កាលថ្ងៃទី១៦ តុលា លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានមានប្រសាសន៍ថា កម្ពុជាបានត្រៀមលក្ខណៈរួចរាល់ ដើម្បីពង្រឹង និងពង្រីកកិច្ចសហប្រតិបត្តិការ ជាមួយប្រទេសឥណ្ឌូណេស៊ី នៅលើវិស័យអាទិភាពផ្សេងៗ រាប់់តាំងពីពាណិជ្ជកម្ម វប្បធម៌ រហូតដល់បច្ចេកវិទ្យា ដើម្បីកាត់បន្ថយឱនភាពទំហំពាណិជ្ជកម្មប្រចាំឆ្នាំរបស់ប្រទេសទាំងពីរ ។
លោករដ្ឋមន្ត្រីបន្ដថា ៖« រាជរដ្ឋាភិបាលកម្ពុជាកំពុងតែយកចិត្តទុកដាក់ និងធ្វើពិពិធកម្មទៅ លើវិស័យកសិកម្ម ទេចរណ៍ និងឧស្សាហកម្ម ដើម្បីនាំចេញទៅកាន់ទីផ្សារក្នុងតំបន់ និងពិភពលោក »។ នៅក្នុងឱកាសនោះ លោករដ្ឋមន្ត្រីបានស្នើឱ្យមានជើងហោះហើរត្រង់ពីឥណ្ឌូណេស៊ីមកកម្ពុជា ដើម្បីលើកកម្ពស់វិស័យទេសចរណ៍ និងវប្បធម៌ ក៏ដូចជាការពង្រឹងកិច្ចសហការវាងវិស័យឯកជននៃប្រទេសទាំងពីរ ជាពិសេសការផ្លាស់ប្តូរបទពិសោធន៍លើផ្នែកបច្ចេកវិទ្យាទូរគមនាគមន៍ និងនវានុវត្តន៍ ដែលជាគន្លឹះក្នុងការលើកស្ទួយសហគ្រិនភាព សំដៅធ្វើពិពិធកម្មឱកាសការងារ និងជំរុញកំណើនសេដ្ឋកិច្ចជាតិ ។
លោក ស៊ូឌីរម៉ាន់ ហាសែង ឯកអគ្គរដ្ឋទូតឥណ្ឌូណេស៊ីប្រចាំនៅកម្ពុជា មានប្រសាសន៍ថាឥណ្ឌូណេស៊ីមានបំណងពង្រីកកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិស័យអាទិភាពផ្សេងទៀតជាមួយកម្ពុជា ហើយនៅសប្តាហ៍ក្រោយនេះ ក្រសួងពាណិជ្ជកម្មឥណ្ឌូណេស៊ី នឹងសម្របសម្រួលដំណើរទស្សនកិច្ចរបស់ប្រតិភូធុរជនកម្ពុជាដែលស្វែងរកឱកាសអាជីវកម្មនៅទីក្រុង Bandung នៃខេត្តចាវ៉ាខាងលិច ។
លោកបញ្ជាក់ថា ៖« រដ្ឋាភិបាលឥណ្ឌូណេស៊ី កំពុងពិចារណាទិញអង្ករ និងផលិតផលកសិកម្មមួយចំនួនទៀតពីកម្ពុជា និងបានជំរុញពាណិជ្ជករឥណ្ឌូណេស៊ី ចូលរួមព្រឹត្តិការណ៍ពិព័រណ៍ ភូមិ១ ផលិតផល១ ដែលគ្រោងនឹងរៀបចំនៅរាជធានីភ្នំពេញ ចាប់ពីថ្ងៃទី៨ ដល់ថ្ងៃទី១១ ខែធ្នូខាងមុខ ដើម្បីជំរុញកិច្ចសហការ និងកាត់បន្ថយឱនភាពទំហំពាណិជ្ជកម្មទ្វេភាគីឱ្យបានអតិបរមា »។
យោងតាមក្រសួងពាណិជ្ជកម្ម ទំហំពាណិជ្ជកម្មទ្វេភាគីរវាងកម្ពុជា និងឥណ្ឌូណេស៊ី កាលពីឆ្នាំ២០១៧ សម្រេចបានទឹកប្រាក់សរុប៥៣៩លានដុល្លារ ពោលគឺបានកើនឡើងជាង២០% បើធៀបនឹងឆ្នាំ២០១៦ ក្នុងនោះ ការនាំចេញរបស់កម្ពុជា មានទឹកប្រាក់២៦លានដុល្លារ និងនាំចូលមានចំនួន៥១៤លានដុល្លារ ។ ដោយឡែក នៅក្នុងឆមាសទី១នៃឆ្នាំ២០១៨ ទំហំពាណិជ្ជកម្មទ្វេភាគី សម្រេចបានទឹកប្រាក់៣១៨លានដុល្លារអាមេរិក គឺបានកើនឡើង៨% បើធៀបនឹងរយៈពេលដូចគ្នានៃឆ្នាំ២០១៧ ។
អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានថ្លែងនៅពេលថ្មីៗនេះថា ការពិតទំហំពាណិជ្ជកម្មរវាងប្រទេសទាំងពីរនៅមានកម្រិតនៅឡើយ ហើយប្រទេសទាំងពីរអាចពង្រីកបានកាន់តែធំ ដោយសារឥណ្ឌូណេស៊ីមានប្រជាជនច្រើនរហូតដល់ប្រមាណ២៦០លាននាក់ ដែលយើងអាចស្វែងរកឱកាសធ្វើពាណិជ្ជកម្មជាមួយគ្នាបាន ប៉ុន្តែការទាញយកសក្តានុពលពាណិជ្ជកម្មរវាងប្រទេសទាំងពីរហាក់នៅមានកម្រិត ។លោកបន្តថា ៖« បច្ចុប្បន្នទំហំពាណិជ្ជកម្មទេសចរណ៍នៅមានកម្រិត ដែលទាមទារឲ្យប្រទេសយើងទាំងពីរពង្រីកភាពជាដៃគូបន្ថែមទៀត ពិសេសធ្វើយ៉ាងណាឲ្យមានជើងហោះហើរត្រង់រវាងប្រទេសទាំងពីរ »។ ជាថ្មីម្តងហើយម្តងទៀត ដែលឥណ្ឌូណេស៊ីគ្រោងភ្ជាប់ជើងហោះហើរត្រង់មកកម្ពុជា ប៉ុន្តែត្រូវបានពន្យារពេលម្តងហើយម្តងទៀត ។
អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល លោក ស៊ិន ចាន់សិរីវុត្ថា បានថ្លែងថា ក្រុមហ៊ុនLion Airរបស់ឥណ្ឌូណេស៊ី បានសិក្សាពីលទ្ធភាពបើកការហោះហើរត្រង់ពីឥណ្ឌូណេស៊ីមកកម្ពុជា ប៉ុន្តែគម្រោងហោះហើរត្រង់ចាប់ផ្តើមនៅពេលណានោះ នៅមិនទាន់ដឹងនៅឡើយ ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ