ទីក្រុងតូក្យូ ៖ សេដ្ឋវិទូបានឲ្យដឹងថា សហរដ្ឋអាមេរិកប្រហែលជាមិនបង្កើនពន្ធលើរថយន្តនាំចូលពីប្រទេសជប៉ុនទេ ព្រោះប្រទេសទាំងពីរបានព្រមព្រៀងថានឹងចាប់ផ្តើមការចរចាពាណិជ្ជកម្មថ្មី ប៉ុន្តែសេដ្ឋវិទូភាគច្រើនគិតថាជម្លោះពាណិជ្ជកម្មរវាងអាមេរិកនិងចិន និងប្រទេសដទៃ នឹងប៉ះពាល់យ៉ាងខ្លាំងដល់ប្រទេសជប៉ុន ។
សហរដ្ឋអាមេរិកបានគំរាមថា នឹងដាក់ពន្ធ ២៥%លើរថយន្តនាំចូលពីប្រទេសជប៉ុន ប៉ុន្តែអាមេរិកបានព្រមព្រៀងថានឹងមិនធ្វើដូច្នេះ ខណៈដែលកំពុងចរចាពាណិជ្ជកម្មជាមួយជប៉ុន ។
លោកប្រធានាធិបតីដូណាល់ ត្រាំ (Donald Trump) បានឲ្យដឹងច្បាស់ថា លោកមិនសប្បាយចិត្តនឹងអតិរេកពាណិជ្ជកម្មប្រមាណ ៦៩ប៊ីលានដុល្លាររបស់ជប៉ុនជាមួយនឹងសហរដ្ឋអាមេរិកឡើយ ។
យោងតាមការស្ទង់មតិមួយបានឲ្យដឹងថា មានអ្នកវិភាគ ២៧នាក់ក្នុងចំណោម៣៥នាក់គិតថា លទ្ធភាពដែលសហរដ្ឋអាមេរិកអាចដាក់ពន្ធលើរថយន្តជប៉ុនបានធ្លាក់ចុះយ៉ាងខ្លាំង ឬមធ្យម ។ ប៉ុន្តែអ្នកវិភាគជាច្រើនព្យាករណ៍ថាសហរដ្ឋអាមេរិកអាចនឹងបង្កើនពន្ធដែលបច្ចុប្បន្នស្មើ ២,៥% លើរថយន្តជប៉ុន និង២៥%លើរថយន្តដឹកទំនិញ ។
លោក Atsushi Takeda ប្រធានសេដ្ឋវិទូននៅវិទ្យាស្ថាន Itochu Economic Research Institute បានឲ្យដឹងថា ៖« គោលជំហររបស់សហរដ្ឋអាមេរិកមិនផ្លាស់ប្តូរទេ ហើយពួកគេនៅតែទាមទារឲ្យជប៉ុនកាត់បន្ថយអតិរេកពាណិជ្ជកម្មរបស់ខ្លួនជាមួយនឹងសហរដ្ឋអាមេរិក។ ដូច្នេះ សហរដ្ឋអាមេរិកនៅតែអាចអនុម័តការហាមឃាត់មួយចំនួនលើការនាំចេញយានយន្តជប៉ុនទៅកាន់សហរដ្ឋអាមេរិកដែលរួមមានបង្កើនពន្ធជាដើម »។
ទាក់ទិននឹងផលប៉ះពាល់នៃជម្លោះពាណិជ្ជកម្មរវាងសហរដ្ឋអាមេរិក និងប្រទេសចិនទៅលើជប៉ុនវិញ អ្នកវិភាគចំនួន២៥នាក់ក្នុងចំណោម ៣៤នាក់គិតថា វានឹងមានការប៉ះពាល់យ៉ាងខ្លាំងក្លាឬច្រើន ។
គួររំឭកថា សហរដ្ឋអាមេរិក និងប្រទេសជប៉ុន បានចរចាជាជំហានដំបូងម្ដងរួចហើយ ជុំវិញផែនការដាក់ពន្ធលើយានយន្ដរបស់ជប៉ុនពីសំណាក់រដ្ឋាភិបាលលោកដូណាល់ ត្រាំ ប៉ុន្ដែការចរចានោះ ពុំទទួលបានលទ្ធផលផ្លែផ្កាឡើយ ដោយហេតុថា ប្រទេសជប៉ុនចង់ដោះស្រាយជម្លោះពាណិជ្ជកម្មក្នុងវេទិកាដូចជា កិច្ចព្រមព្រៀងដៃគូពាណិជ្ជកម្មអន្តរប៉ាស៊ីហ្វិក ប៉ុន្តែសហរដ្ឋអាមេរិកចង់បានកិច្ចព្រមព្រៀងទ្វេភាគីទៅវិញ ។
យ៉ាងណាក្តី ប្រទេសជប៉ុនអាចនឹងព្រមទទួលកិច្ចព្រមព្រៀងទ្វេភាគី ប្រសិនបើសហរដ្ឋអាមេរិក មិនដាក់ពន្ធបន្ថែមលើវិស័យយានយន្ត។ អ្នកវិភាគបានឲ្យដឹងថា លោកប្រធានាធិបតីត្រាំ អាចនឹងងាកមកចាប់អារម្មណ៍លើជប៉ុន បន្ទាប់ពីលោកដោះស្រាយបញ្ហាជាមួយនឹងចិន និងការចរចាលើកិច្ចព្រមព្រៀង NAFTA ៕
ចែករំលែកព័តមាននេះ