ពលរដ្ឋថាសង្ស័យមកពីកាណូតបូមខ្សាច់ ទើបបាក់ផែឯកជនចូលទៅក្នុងទន្លេមេគង្គ
- ត្បូងឃ្មុំ
ខេត្តត្បូងឃ្មុំ ៖ ផែឯកជនមួយកន្លែងមានម្ចាស់ដីឈ្មោះ សុខ ជាតិ ភេទប្រុស អាយុ៤៦ឆ្នាំ ត្រង់ទីតាំង ភូមិដូនម៉ៅលើ ឃុំទន្លេបិទ…
ខេត្តត្បូងឃ្មុំ ៖ ផែឯកជនមួយកន្លែងមានម្ចាស់ដីឈ្មោះ សុខ ជាតិ ភេទប្រុស អាយុ៤៦ឆ្នាំ ត្រង់ទីតាំង ភូមិដូនម៉ៅលើ ឃុំទន្លេបិទ ស្រុកត្បូងឃ្មុំ បានបាក់ប្រវែង៣០ម៉ែត្រចូលទៅក្នុងទឹកទន្លេរួមទាំងជើងរ៉ៃដឹកទំនិញ កាលវេលាម៉ោង៣រសៀល ថ្ងៃទី១៥ តុលា ២០១៨។ រហូតមកដល់ព្រឹក ថ្ងៃទី១៦ តុលា ក៏ពលរដ្ឋរស់នៅក្បែរនោះ នាំគ្នាព្រួយបារម្ភខ្លាចបាក់ដល់ផ្ទះរបស់ពួកគាត់ថែមទៀតផង។ មូលហេតុបាក់នេះត្រូវបានដាក់ការសង្ស័យ ដោយសារតែមានការលួចបូមយកខ្សាច់ នៅក្បែរច្រាំងនោះតែម្តង។
ស្ត្រីចំណាស់ម្នាក់ឈ្មោះ ឆេង លាង អាយុ៦៥ឆ្នាំ បានឲ្យដឹងថា កាលពីថ្ងៃទី១៤ តុលា ២០១៨ មានកាណូតធំៗមកបូមយកខ្សាច់នៅក្រោយភូមិ ដែលមើលទៅនៅមិនឆ្ងាយប៉ុន្មានពីច្រាំងទន្លេនោះទេ។ លុះមកដល់រសៀលថ្ងៃទី១៥ តុលា ស្រាប់តែបាក់ច្រាំងទន្លេ ដោយយកទាំងទីតាំងផែសម្រាប់លើកដាក់ទំនិញទៅបាត់ចូលទឹកទន្លេរួមទាំងឫស្សីមួយគុម្ពធំនៅក្រោយផ្ទះគាត់ ក៏ត្រូវបានបាក់ស្រុតយកទៅផងដែរ។ លោក គឺន ផល អាយុ៥៥ឆ្នាំ ប្រាប់ថា គាត់បានមករត់នៅភូមិដូនម៉ៅលើនេះ តាំងតាំងពីឆ្នាំ១៩៨៩មកម្លេះ មិនដែលបាក់ច្រាំងនោះទេ ដីក្រោយផ្ទះមានចម្ងាយប្រមាណ១៥០ម៉ែត្រ ត្រូវបានបាក់ចូលទៅក្នុងទន្លេជាបន្តបន្ទាប់។
កន្លងមកមានកាណូតធំៗបានធ្វើសកម្មភាពលួចបូមខ្សាច់ នៅពេលយប់ទៀបភ្លឺនៅកៀកនឹងច្រាំងក្រោយផ្ទះ លុះពេលដែលមេឃភ្លឺបានបើកចុះទៅក្រោយទៀត បូមខ្សាច់ចៀសវាងកុំឲ្យពលរដ្ឋស្តីបន្ទោស។ កាលពី២ទៅ៣ថ្ងៃមុន បាក់ផែក៏មានកាណូតមកបូមខ្សាច់ នៅមិនឆ្ងាយប៉ុន្មានពីច្រាំងទន្លេនោះទេ ហើយនៅថ្ងៃទី១៤ តុលា សាឡង់ដឹកគ្រាប់ពោតធុនធំ០១គ្រឿង បានឃើញបេតុងនៅកំពង់ផែញែកហែកសាច់បេតុង។ ដឹងមិនស្រួលបានបើកសាឡង់ចេញទៅចតជិត កណ្តាលទន្លេ បាន១ថ្ងៃក៏ផែបានបាក់ចូលទន្លេរួមទាំងជើងរ៉ៃ សម្រាប់លើកដាក់ទំនិញក៏បាក់ធ្លាក់ចូល ទៅអណ្តែតតែចុងចេញពីផ្ទៃទឹកប៉ឹមៗប៉ុណ្ណោះ។
ពួកគាត់សំណូមពរដល់ស្ថាប័នជំនាញ និងលោក លី ឡេង អភិបាលនៃគណៈអភិបាលខេត្តមេត្តាមានវិធានការជួយអន្តរាគមន៍ដល់ពួកគាត់ធ្វើយ៉ាងណាកុំឲ្យកាណូតមកបូមខ្សាច់ នៅកៀកច្រាំងបន្តទៀត បើពុំនោះទេនឹងបន្តបាក់ដល់លំនៅឋានរបស់ពួកគាត់ហើយ។ លោក ប៊ុន ធឿន ប្រធានមន្ទីររ៉ែ និងថាមពលខេត្តប្រាប់ឲ្យដឹងដែរថា កន្លងមករូបលោកធ្លាប់បានណែនាំដល់ពលរដ្ឋក្នុងឃុំទន្លេបិទ ស្រុកត្បូងឃ្មុំ បើសិនជាមានកាណូតណាមកបូមខ្សាច់នៅកៀកនឹងច្រាំងទន្លេត្រូវរាយការណ៍មកស្ថាប័នជំនាញ។
ចំពោះទីតាំងដែលបាក់ផែរបស់ឯកជនខាងលើ មិនមានអាជ្ញាប័ណ្ណរបស់ក្រុមហ៊ុនណាមួយមកបូមខ្សាច់ ត្រើយទន្លេបិទនោះទេ។ គឺមានច្បាប់ដែលត្រូវបានបូមនៅត្រើយខាងខេត្តកំពង់ចាម ហើយខ្សាច់នៅខាងទន្លេបិទ ជាប្រភេទខ្សាច់ហ្មត់មិនអាចយកមកប្រើការលើវិស័យសំណង់កើតទេព្រោះមានលាយភក់ច្រើន៕
https://www.youtube.com/watch?v=6ifeWct5cUw
ចែករំលែកព័តមាននេះ