ទីក្រុងតូក្យូ ៖ ប្រភពមួយចំនួនបានឲ្យដឹងកាលពីថ្ងៃអាទិត្យមកថា រដ្ឋាភិបាលជប៉ុននឹងបង្កើតឲ្យមានប្រព័ន្ធអេឡិចត្រូនិកសម្រាប់ស្នើសុំទិដ្ឋាការនៅខែមេសា ឆ្នាំ២០២០ ដើម្បីអាចសម្រេចគោលដៅទទួលភ្ញៀវទេសចរបាន៤០លាននាក់ក្នុងឆ្នាំនោះ ។
ប្រព័ន្ធលើអ៊ីនធើរណេត នឹងមានសម្រាប់ភ្ញៀវទេសចរជនជាតិចិនជាមុនសិនសម្រាប់រាល់ការស្នើសុំទិដ្ឋាការចេញចូលប្រទេសម្តង បន្ទាប់មកនឹងមានសម្រាប់ភ្ញៀវទេសចរមកពីប្រទេសដទៃនាពេលក្រោយ ។
យោងតាមក្រសួងការបរទេសជប៉ុនបានឲ្យដឹងថា ទិដ្ឋាការសម្រាប់ភ្ញៀវទេសចរចិនស្មើជិត៦០%នៃទិដ្ឋាការដែលបានចេញកាលពីឆ្នាំ២០១៧ ។ ទន្ទឹមនឹងនេះ រដ្ឋាភិបាលមានគម្រោងបន្ថែមប្រភេទទិដ្ឋាការដទៃចូលក្នុងប្រព័ន្ធនេះដែរ ។
ទិដ្ឋាការអេឡិចត្រូនិកត្រូវបានបង្កើតឡើងដើម្បីធ្វើឲ្យដំណើរការស្នើសុំកាន់តែមានភាពងាយស្រួល កាត់បន្ថយកិច្ចការងារ និងរឹតបន្តឹងការគ្រប់គ្រងផ្នែកអន្តោប្រវេសន៍ជាដើម មុនពេលការប្រកួតកីឡាអូឡាំពិកនៅទីក្រុងតូក្យូនាឆ្នាំ២០២០ ដោយទិន្នន័យទិដ្ឋាការទាំងនេះនឹងត្រូវបានចែករំលែកជាមួយនឹងក្រុមហ៊ុនអាកាសចរណ៍ផងដែរ ។
អ្នកដំណើរនឹងអាចដាក់ពាក្យស្នើសុំទិដ្ឋាការទេសចរណ៍លើអ៊ីនធើរណេតតាមភ្នាក់ងារទេសចរណ៍បាន ។
គួរបញ្ជាក់ដែរថា ប្រទេសជប៉ុនទទួលភ្ញៀវទេសចរបរទេសប្រមាណ២៨,៧លាននាក់កាលពីឆ្នាំ២០១៧ ច្រើនជាងឆ្នាំ២០១៦ដល់ទៅ ១៩,៣% ហើយការចំណាយរបស់ពួកគេក៏បានកើនឡើង១៧,៨%ផងដែរកាលពីឆ្នាំមុន ឬស្មើប្រមាណ៣៩ប៊ីលានដុល្លារ ។
ដោយរដ្ឋាភិបាលចង់លើកកម្ពស់វិស័យទេសចរណ៍ជាសសរទ្រូងនៃយុទ្ធសាស្ត្រលូតលាស់សេដ្ឋកិច្ចរបស់ប្រទេស ជប៉ុនមានគោលដៅទាក់ទាញភ្ញៀវទេសចរឲ្យធ្វើដំណើរទៅកាន់ប្រទេសខ្លួនក្នុងចំនួនប្រមាណ៤០លាននាក់នៅឆ្នាំ២០២០ និង៦០លាននាក់នៅឆ្នាំ២០៣០ ។
ភ្ញៀវទេសចរជនជាតិចិនគឺជាភ្ញៀវទេសចរបរទេសភាគច្រើនដែលទៅកាន់ជប៉ុន ។ ក្នុងការស្ទង់មតិនាពេលថ្មីៗនេះបានឲ្យដឹងថា ទស្សនៈរបស់ជនជាតិចិនទៅលើប្រទេសជប៉ុនបានល្អប្រសើរជាងមុន បន្ទាប់ពីទំនាក់ទំនងបានចុះខ្សោយ ព្រោះតែជម្លោះលើដែនដី និងប្រវត្តិសាស្ត្រ ៕
ចែករំលែកព័តមាននេះ