រាជធានីភ្នំពេញ ៖ ការដ្ឋានសាងសង់អគាររដ្ឋាបាលរបស់រដ្ឋាករស្វយ័តដឹកជញ្ជូនសាធារណៈរថយន្តក្រុង និងចំណតរថយន្តរបស់រដ្ឋាករស្វយ័តដឹកជញ្ជូនសាធារណៈរថយន្តក្រុង នៅលើផ្ទៃដី៤ហិកតា ស្ថិតក្នុងសង្កាត់ព្រែកតាសេក ខណ្ឌជ្រោយចង្វា ដែលបានសាងសង់កាលពីថ្ងៃទី៣០ មករា ២០១៨នោះ ពេលនេះជិតរួចរាល់ហើយ ដោយគ្រោងបញ្ចប់នៅថ្ងៃទី១ ខែមករា ឆ្នាំ២០១៩ឆាប់ៗនេះ ។
លោក អ៊ាន សុខឃីម អភិបាលរដ្ឋាករស្វយ័តដឹកជញ្ជូនសាធារណៈរថយន្តក្រុង បានបញ្ជាក់ឲ្យដឹងថា ចំណតរថយន្ត និងអគាររដ្ឋាបាលរបស់រដ្ឋាករស្វយ័តដឹកជញ្ជូនសាធារណៈរថយន្តក្រុង បានសាង់ឡើងលើផ្ទៃដីទំហំ៤ហិកតា ស្ថិតក្នុងសង្កាត់ព្រែកតាសេក ខណ្ឌជ្រោយចង្វារ ក្នុងនោះសម្រាប់អគាររដ្ឋាបាលបានសាងសង់ឡើងទំហំ២៥ម៉ែត្រគុណនឹង៤០ម៉ែត្រ និងអាចចតរថយន្តក្រុងបានចំនួន២៥០គ្រឿង ។
លោកបន្តថា ចំណតរថយន្តនិងអគាររដ្ឋាបាលរបស់រដ្ឋាករស្វយ័តដឹកជញ្ជូនសាធារណៈរថយន្តក្រុង បានចាប់ផ្តើមសាងសង់ឡើងកាលពីថ្ងៃទី៣០ មករាឆ្នាំ២០១៨ ដោយគ្រោងនឹងបញ្ចប់ការស្ថាបនានៅថ្ងៃទី០១ខែមករា២០១៩ខាងមុខ ។
លោកអ៊ាន សុខឃីម បានឲ្យដឹងទៀតថា សម្រាប់រដ្ឋាករស្វយ័តដឹកជញ្ជូនសាធារណៈ ក្រោមជំនួយរបស់ប្រទេសចិន និងជប៉ុន មានរថយន្តសម្រាប់ដឹកអ្នកដំណើរចំនួន២១៥គ្រឿង ហើយនៅពេលដ៏ខ្លីខាងមុខនេះ ប្រទេសជប៉ុននឹងផ្តល់រថយន្តក្រុង មកឲ្យរដ្ឋបាលរាជធានីភ្នំពេញចំនួន៨០គ្រឿងបន្តទៀត សំដៅបំរើលើសេវាដឹកជញ្ជូនតាមរថយន្តក្រុងកាន់តែមានភាពល្អប្រសើរ និងកាន់តែទទួលការពេញនិយមពីប្រជាពលរដ្ឋ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ