ខេត្តប៉ៃលិន ៖ សេចក្តីរាយការណ៍បានឱ្យដឹងថា ក្រោយពីទទួលពាក្យបណ្ដឹងពីជនរងគ្រោះម្នាក់កាលពីថ្ងៃទី១៧ ខែកញ្ញា ពីករណីបាត់ម៉ូតូមួយគ្រឿង ភ្លាមៗជំនាញព្រហ្មទណ្ឌ នៃអធិការដ្ឋាន នគរបាលក្រុងប៉ៃលិន បានធ្វើការតាមដានស្រាវជ្រាវរហូតមកដល់ម៉ោង១និង៣០នាទី ថ្ងៃទី១៣ ខែតុលា ឆ្នាំ២០១៨ ទើបដឹងតម្រុយជនសង្ស័យ ។
សេចក្តីរាយការណ៍បន្តថា ជនរងគ្រោះខាងលើឈ្មោះ រិន វីរះ ភេទប្រុស អាយុ១៨ឆ្នាំ រស់នៅភូមិថ្មី សង្កាត់ទួលល្វា ក្រុងប៉ៃលិន ខេត្តប៉ៃលិន បានបាត់ម៉ូតូមួយគ្រឿងម៉ាកហុងដាឌ្រីម (HONDA DREAM) សេ125 ស៊េរីឆ្នាំ២០១៤ ពណ៌ខ្មៅ ពាក់ស្លាកលេខ ប៉ៃលិន 1B-2201 ។ ចំណែកជនសង្ស័យឈ្មោះ ប៉ាត ភន ភេទប្រុស អាយុ៣៧ឆ្នាំ ជាអ្នកធ្វើចំការ រស់នៅភូមិថ្មី សង្កាត់ទួលល្វា ខេត្តប៉ៃលិន រួមជាមួយនឹងម៉ូតូមួយគ្រឿងដែលលួចបានកាលពីថ្ងៃមុន។
ក្រោយពីមានការរាយការណ៍ លោកវរសេនីយ៍ត្រី យ៉ែម សារិទ្ធ អធិការនគរបាលក្រុងប៉ៃលិន ដឹកនាំកម្លាំងនគរបាលប៉ុស្តិ៍ទួលល្វា និងនគរបាលប៉ុស្តិ៍អូរតាវ៉ៅ ព្រមជាមួយប្រជាការពារភូមិព្រៃមង្គល ទើបចុះទៅឃាត់ខ្លួនជនសង្ស័យម្នាក់នៅចំណុចភូមិព្រៃមង្គល សង្កាត់អូរតាវ៉ៅ រួមជាមួយនឹងម៉ូតូមួយគ្រឿងដែលជនសង្ស័យបានលួចកាលពីថ្ងៃមុន ។ ក្រោយចាប់ឃាត់ខ្លួនតាមផ្លូវ នគរបាលនាំខ្លួនជនសង្ស័យ និងម៉ូតូទៅកាន់អធិការដ្ឋាននគបាលក្រុងប៉ៃលិន ដើម្បីកសាងសំណុំរឿង បញ្ជូនបន្តទៅតុលាការខេត្តឱ្យចាត់ការតាមនីតិវិធីច្បាប់ ។
ចំណែកប្រជាពលរដ្ឋរស់នៅក្នុងក្រុងប៉ៃលិន បង្ហើបឱ្យដឹងថា ម៉ូតូដែលពលរដ្ឋជិះទៅផ្សារ ហើយចតទុក ខណ:ជាប់រវល់ចូលទិញម្ហូប លុះចេញមកវិញ ស្រាប់តែបាត់ម៉ូតូតែម្តង ។ ជាពិសេសម៉ូតូដែលគេជិះមកផ្សារសាមគ្គី និងផ្សារត្រី ដែលទើបនឹងបង្កើតថ្មីក៏តែងតែបាត់បង់ជាញឹកញាប់ផងដែរ ដោយជួនកាលគេអត់ដាក់ពាក្យបណ្តឹងទៅនគរបាលនោះទេ ព្រោះគ្មានសង្ឃឹមថា នឹងរកឃើញវិញ ។
ចំណែកនៅឯភូមិផ្សារព្រំ ឃុំស្ទឹងកាច់ ក៏មានករណីចោរដើរលួចម៉ូតូអស់ច្រើនដែរ កាលពីថ្មីៗកន្លងទៅនេះ សូម្បីតែថ្ងៃត្រង់ក៏ពួកគេហ៊ានធ្វើសកម្មភាពដើរលួច ដោយ មិនខ្លាចញញើតនោះឡើយ ៕
ចែករំលែកព័តមាននេះ