ទីក្រុងសិង្ហបុរី ៖ តម្លៃលក់ខុនដូឯកជនបន្តបានធ្លាក់ចុះសាជាថ្មីកាលពីខែមុន ខណៈដែលវិធានការទប់ស្កាត់ហានិភ័យចាប់ផ្តើមមានប្រសិទ្ធភាព ។
យោងតាមការព្យាកររបស់ SRX Property ដែលបានចេញកាលពីថ្ងៃអង្គារបានឲ្យដឹងថា តម្លៃខុនដូ និងអាផាតម៉ិនឯកជនបានធ្លាក់ចុះ ០,២% បើធៀបនឹងខែសីហា ។ វាកើតឡើងបន្ទាប់ពីតម្លៃលក់បន្តនេះធ្លាក់ចុះអស់០,៣% នៅខែសីហា ។
បើធៀបនឹងខែកក្កដាដែលជាពេលវិធានការទប់ស្កាត់ហានិភ័យត្រូវបានប្រកាស តម្លៃលក់ខុនដូបន្តបានធ្លាក់ចុះ០,៥%ទៅហើយ ។ ទោះយ៉ាងនេះក្ដី វានៅតែខ្ពស់ជាងខែកញ្ញាឆ្នាំមុនដល់ទៅ១០,៨%ដដែល ។
ចំណែកតម្លៃលក់បន្តនៅតំបន់ក្រៅក្រុងបែរជាកើនឡើង០,៥%ទៅវិញកាលពខែមុន ប៉ុន្តែតម្លៃលក់បន្តនៅតំបន់កណ្តាលក្រុង និងជាយក្រុងបានធ្លាក់ចុះ ១,២% និង០,៨% ។ វិធានការទប់ស្កាត់ហានិភ័យបានប៉ះពាល់ដល់ការលក់ខុនដូ ដែលខែមុនមានការលក់ខុនដូឯកជនបន្តបានតែ៧០២យូនីតប៉ុណ្ណោះ ។
ចំនួនលក់វិញបានធ្លាក់ចុះយ៉ាងខ្លាំង បើធៀបនឹងឆ្នាំមុន ដោយចំនួនលក់បន្តធ្លាក់ចុះអស់ ៤៤,៣% ពី១,២៦០យូនីតកាលពីឆ្នាំមុន ។
អ្នកស្រី Christine Sun ប្រធានផ្នែកស្រាវជ្រាវនិងប្រឹក្សាយោបល់នៅក្រុមហ៊ុន Orange Tee & Tie បានប្រាប់មកថា ការធ្លាក់ចុះនៃតម្រូវការអាចមកពីចំនួនលក់បានធ្លាក់ចុះក្នុងអំឡុងបុណ្យប្រពៃណីជាតិ វិធានការទប់ស្កាត់ហានិភ័យ និងខ្វែងគំនិតគ្នាលើតម្លៃរវាងអតិថិជននិងអ្នកលក់ជាដើម ។
អ្នកស្រីបានឲ្យដឹងថា ៖« អតិថិជនអាចគិតថាមានតម្លៃមធ្យម ប៉ុន្តែអ្នកលក់វិញបែរជាមិនចង់ទម្លាក់តម្លៃ ព្រោះសេដ្ឋកិច្ចនៅរឹងមាំ ហើយទីផ្សារការងារនៅមានលំនឹងល្អ »។ អ្នកស្រីបានបន្តថា ជាធម្មតា ការលក់អន់ថយនៅចុងឆ្នាំព្រោះប្រជាជនឈប់សម្រាក ៕
ចែករំលែកព័តមាននេះ