រាជធានីភ្នំពេញ ៖ បន្ទាប់ពីផ្អាកមួយរយៈរាជរដ្ឋាភិបាលកម្ពុជាបានសម្រេចបើកឲ្យសហរដ្ឋអាមេរិកបើកការរុករកអដ្ឋិធាតុខ្លួនដែលបានស្លាប់ ក្នុងសម័យសង្គ្រាមកន្លង ។ នេះបើតាមអ្នកនាំពាក្យគណបក្សប្រជាជនកម្ពុជា ។
លោក សុខ ឥសាន អ្នកនាំពាក្យគណបក្សប្រជាកម្ពុជាបានឲ្យដឹងនៅថ្ងៃទី១៤ តុលាថា ការសម្រេចបើកការរុករកអដ្ឋិធាតុរបស់អាមេរិកនេះ បង្ហាញថា កម្ពុជាគោរពសិទ្ធិមនុស្ស ។ លោកបន្តថា ការរុករកអដ្ឋិធាតុទាហានអាមេរិកបាត់ខ្លួនក្នុងសង្គ្រាមត្រូវបានផ្អាក ក្រោយពេលដែលរបបក្រុងវ៉ាស៊ីងតោនបានរឹតបន្តឹងទិដ្ឋាការដល់មន្ត្រីសំខាន់ៗមួយចំនួននៃក្រសួងការបរទេសកុម្ពុជា ។
លោកបញ្ជាក់ថា« ឥឡូវនេះដោយផ្អែកតាមសំណូមពររបស់ព្រឹទ្ធសមាជិកសរអានៅរដ្ឋវ៉ាស៊ីងតោនរាជរដ្ឋាភិបាលកម្ពុជាក៏បានធ្វើសម្បទានឲ្យមានការប្រតិបត្តិការរុរកអដ្ឋិធាតុទាហ៊ានអាមេរិកបាត់ខ្លួនក្នុងសង្គ្រាមឡើងវិញ ដោយផ្អែកលើមូលដ្ឋានមនុស្សធម៌ និងសិទ្ធិមនុស្សជាពិសេសចំពោះមនោសញ្ចេតនាចំពោះក្រុមគ្រួសាររបស់ជនរងគ្រោះ» ។ លោកបន្ថែមថា ចំពោះកាយវិការរបស់រាជរដ្ឋាភិបាលកម្ពុជាក្នុងការបន្តប្រតិបត្តិការរុករកអដ្ឋិធាតុទាហ៊ានអាមេរិកបាត់ខ្លួនដែលរាជរដ្ឋាភិបាលកម្ពុជាបានសម្រេចឆ្លុះបញ្ចាំងថា នរណាមានមនុស្សធម៌ និងគោរពសិទ្ធិមនុស្សជាង ។
សូមជម្រាបថា កាលពីថ្ងៃទី១៣ តុលានេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានប្រកាសតាមលិខិតឆ្លើយតបថា រាជរដ្ឋាភិបាលកម្ពុជាបានយល់ព្រមបើកឡើងវិញនូវប្រតិបត្តិការរុករកអដ្ឋិធាតុទាហានអាមេរិកនៅក្នុងប្រទេសកម្ពុជា ។ លិខិតរបស់សម្តេចតេជោ ហ៊ុន សែន ផ្ញើជូន និងឆ្លើយតបជាមួយសំណើរបស់សមាជិកព្រឹទ្ធសភា រដ្ឋវ៉ាស៊ីនតោន សហរដ្ឋអាមេរិក លោក ដុក អេរិកសុន (Doug Ericksen) និងតំណាងរាស្ត្រលោក វីនសុន បាយ្ស (Vicent Buys) ។ នៅក្នុងលិខិតខាងលើនេះ សម្តេចតេជោ ហ៊ុន សែន បានបញ្ជាក់យ៉ាងដូច្នេះថា «ដូចដែលយើងបានពិភាក្សាលើកមុន និងឆ្លើយតបចំពោះសំណើរបស់ឯឧត្តម ព្រមទាំងសំណើរបស់អង្គការពាក់ព័ន្ធដទៃទៀតរបស់សហរដ្ឋអាមេរិក រដ្ឋាភិបាលរបស់ខ្ញុំ ដោយក្នុងស្មារតីមេត្តាករុណាដូចកន្លងមកយល់ព្រមចាប់ផ្តើមឡើងវិញ នូវប្រតិបត្តិការរុករកអដ្ឋធាតុ POW/MIA ដ៏សំខាន់នេះ ទោះបីជាការរឹតត្បឹតទិដ្ឋការសហរដ្ឋអាមេរិកនៅតែមានសុពលភាពក៏ដោយ» ។
ក្នុងលិខិតសម្តេចតេជោ ហ៊ុន សែន បានគូសបញ្ជាក់ទៀតថា ជាការពិតយើងតែងតែមានបំណងលើកកម្ពស់ទំនាក់ទំនងទ្វេភាគី និងធ្វើឲ្យកាន់តែស៊ីជម្រៅនូវកិច្ចសហប្រតិបត្តិការលើ គ្រប់វិស័យទាំងអស់ជាមួយសហរដ្ឋអាមេរិកដោយឈរលើមូលដ្ឋានផលប្រយោជន៍រួម និងគោរពគ្នាទៅវិញទៅមក ។ កិច្ចសហប្រតិបត្តិការលើកម្មវិធី POW/MIA តាំងតែពីមុនពេលកម្ពុជា និងសហរដ្ឋអាមេរិកតភ្ជាប់ទំនាក់ទំនងឡើងវិញនៅទស្សវត្ស១៩៩០ គឺជាទាហរណ៍បញ្ជាក់ច្បាស់អំពីការខិតខំរបស់យើង ដើម្បីគោលដៅនេះ ហើយក៏ជាការឆ្លុះបញ្ចាំងនូវការរួមមនោសញ្ចេតនាយ៉ាងជ្រាលជ្រៅជាមួយនឹងក្រុមគ្រួសារឈ្លើយសឹក និងទាហានអាមេរិកបាត់ខ្លួន ដែលបានរងទុក្ខផ្លូវចិត្តយ៉ាងធំធេង ដោយការបាត់បង់របស់គេ ។
គួរឭកថា កិច្ចសហប្រតិបត្តិការរុករកអដ្ឋិធាតុទាហានអាមេរិកនៅកម្ពុជាត្រូវបានប្រកាសផ្អាកជាបណ្តោះអាសន្នដោយសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាចាប់តាំងពីខែកញ្ញា ឆ្នាំ២០១៧មក បន្ទាប់ពីសហរដ្ឋអាមេរិកបានផ្អាកការផ្តល់ទិដ្ឋាការ (Visa) ប្រភេទ B1 និងB2 (ប្រភេទទេសចរ និងជំនួញ) ដល់មន្ត្រីក្រសួងការបរទេសកម្ពុជា ចាប់តាំងពីថ្នាក់អគ្គនាយករហូតដល់ថ្នាក់កំពូល ។ ការប្រឈមមុខដាក់គ្នាក្នុងវិស័យការទូតរវាងកម្ពុជា-អាមេរិក ចាប់ផ្តើមតឹងតែងជាងមុន ។ ជាមួយគ្នានេះ សហរដ្ឋអាមេរិកក៏បានបន្តរឹតត្បិតទិដ្ឋាការបន្ថែមទៀត ដល់មន្ត្រីកម្ពុជាណាដែលពួកគេយល់ថា ធ្វើឱ្យប៉ះពាល់ដល់លទ្ធិប្រជាធិបតេយ្យរបស់កម្ពុជាផងដែរ ។
បើតាមការដឹងនោះគិតរហូតមកដល់ពេលនេះកិច្ចសហប្រតិបត្តិការរុករកអដ្ឋិធាតុទាហានអាមេរិកនៅកម្ពុជាត្រូវបានប្រកាសផ្អាកជាបណ្តោះអាសន្នរយៈពេលជាង១ឆ្នាំមកហើយ ខណៈដែលអដ្ឋិធាតុរបស់ទាហានអាមេរិក ដែលបាត់បង់ជីវិតនៅលើដីកម្ពុជាទាំងអស់មានប្រមាណ ៨០នាក់ ហើយបច្ចុប្បន្នរកឃើញ ៤០នាក់ប៉ុណ្ណោះ ៕
ចែករំលែកព័តមាននេះ