ខេត្តបន្ទាយមានជ័យ ៖ បក្ខពួកបង្កហិង្សាវាយជនរងគ្រោះដល់មុខបន្ទប់របួសធ្ងន់ម្នាក់កាលពីវេលាទាបភ្លឺ ថ្ងៃទី12 ខែតុលា ឆ្នាំ2018 ត្រូវសមត្ថកិច្ចចាប់ខ្លួនបាន2នាក់ហើយ ។ ជនសង្ស័យទាំង2ម្នាក់ឈ្មោះ ឡោះ សាអី ភេទប្រុស អាយុ18ឆ្នាំ និងម្នាក់ឈ្មោះ យ៉េង យិន ភេទប្រុស អាយុ16ឆ្នាំ ពួកគេទាំង2នាក់រស់នៅភូមិមិត្តភាព សង្កាត់-ក្រុងប៉ោយប៉ែត ។
ក្រោយឃាត់ខ្លួនជនសង្ស័យទាំង2និយាយថា ពួកគេមិនបានវាយតប់លើជនរងគ្រោះទេ ប៉ុន្តែទទួលស្គាល់ថា ជាអ្នករួមដំណើរហើយឈ្មោះ យ៉េង យិន ទទួលស្គាល់ថា ខ្លួនជាអ្នកមានកាំបិតបុ័ងតោពិតប្រាកដមែន ។ ជនសង្ស័យទាំង2ប្រាប់ថា ជនដៃដល់ដែលវាយជនរងគ្រោះឈ្មោះ ជៀន សុជា ភេទប្រុស អាយុ17ឆ្នាំ ឲ្យរបួសធ្ងន់គឺឈ្មោះ ម៉ី ភេទប្រុស ។
ជនសង្ស័យឈ្មោះ ឡោះ សាអី និយាយថា តាមពិតរឿងរ៉ាងខាងលើផ្តើមចេញពីរឿងបកតែមម៉ូតូ កាលពីថ្ងៃមុនរវល់ធ្វើការស្រាប់តែមានគេលួចបកតែមម៉ូតូពេលសួរនាំឈ្មោះ ម៉ី ប្រាប់ថា ជនរងគ្រោះខាងលើជាអ្នកបកហើយថា កន្លងមកក៏ធ្លាប់មានជម្លោះនៅកន្លែងធ្វើការជុំគ្នារវាងជនរងគ្រោះ និងឈ្មោះ ម៉ី នោះផងដែរ ។
ឈ្មោះ ឡោះ សាអី បន្តទៀតថា នៅយប់កើតហេតុខ្លួនគ្រាន់តែចង់ចូលទៅសួរជនរងគ្រោះថា តើបានបកតែមម៉ូតូមែនឬទេដឹងអីឈ្មោះ ម៉ី ទាញ់ដំបងវាយជនរងគ្រោះទៅវិញ ។
លោកវរសេនីយ៌ឯក ធិន ស៊ិនដេត អធិការនគរបាលក្រុងប៉ោយប៉ែតប្រាប់ថា យោងចម្លើយសួរនាំក្រោយធ្វើកំណត់ហេតុ និងកសាងសំណុំរឿងបញ្ជូនជនសង្ស័យទាំង2ទៅស្នងការដ្ឋាននគរបាលខេត្តដើម្បីចាត់ការបន្តតាមនីតិវិធីច្បាប់ ហើយជនសង្ស័យម្នាក់ទៀតដែលកំពុងគេចខ្លួនសមត្ថកិច្ចកំពុងស្រាវជ្រាវរកផងដែរ ៕
ចែករំលែកព័តមាននេះ