ឆ្នាំងមិនទាន់ក្តៅផង បែរជាគម្រប់ក្តៅមុន ចង់ជម្រះបញ្ជីឱ្យកូនមានអីផ្អើលភូមិ៨នាក់ដេកពេទ្យទាំងអស់
- ស្វាយរៀង
ខេត្តស្វាយរៀង ៖ យ៉ាងហោចណាស់មានមនុស្សប្រុសស្រី០៨នាក់រងរបួសធ្ងន់ស្រាលបណ្តាលមកពីអំពើហិង្សាដោយចេតនាកើតឡើងដោយអំណាចស្រាបង្កជាភ្លើងគំនុំសងសឹកជំនួសកូនដែលត្រូវក្រុមភាគីម្ខាងវាយគ្នាកាលពីឆ្នាំមុនមកទូទាត់គ្នានៅពេលសែនជូនដូនតាក្នុងរដូវភ្ជុំបិណ្ឌលទ្ធផលក្រុមជនបង្ក០៤នាក់ត្រូវសមត្ថកិច្ចចាប់ខ្លួនពីបទហិង្សាដោយចេតនា ។ តែអ្វីគួឲ្យអាសង្វេគនោះជនបង្ករងរបួស០៣នាក់ត្រូវសាច់ញាតិបញ្ជូនមកមន្ទីរពេទ្យខេត្តស្វាយរៀងដើម្បីសង្គ្រោះនោះត្រូវសមត្ថកិច្ចតាមមកចាប់ឃាត់ខ្លួនដល់មន្ទីរពេទ្យក៏ប៉ុន្តែទុកឲ្យគ្រូពេទ្យព្យាបាលរបួសសិន រីឯក្រុមជនរងគ្រោះ៥នាក់ ធ្ងន់២នាក់ ស្រាល៣នាក់ ត្រូវក្រុមគ្រួសារបញ្ជូនទៅមន្ទីរពេទ្យរាជធានីភ្នំពេញដើម្បីសង្គ្រោះ ។…
ទាក់ទិនករណីហិង្សានេះសមត្ថកិច្ចស្រុកស្វាយជ្រំបានឲ្យដឹងថា មុនកើតហេតុនៅផ្ទះឈ្មោះ ហ៊ាង សារិន ភេទប្រុស អាយុ៣៥ឆ្នាំ នៅភូមិក្រសាំងជ្រំ ស្រុកស្វាយជ្រំ មានការផឹកស៊ីក្នុងនោះមានឈ្មោះ សុខ ជា ភេទប្រុស អាយុ៣៤ឆ្នាំ ឈ្មោះ ហ៊ាង រ៉ា ភេទប្រុស អាយុ២៧ឆ្នាំ នៅភូមិក្រសាំងជ្រំ និងឈ្មោះ ឌី សូត ភេទប្រុស អាយុ២៧ឆ្នាំ នៅភូមិត្រោក ឃុំក្រួស ស្រុកស្វាយជ្រំ បានផឹកស៊ីជាមួយគ្នាបន្ទាប់ពីត្រូវស្រាមកឈ្មោះ ហ៊ាង សារិន បានបបួលបក្សពួក០៣នាក់ជិះម៉ូតូទៅផ្ទះឈ្មោះ គង់ សឿន ភេទស្រី អាយុ២៦ឆ្នាំ ដែលជាអ្នកលក់ដូរក្នុងតូបមុខផ្ទះសួររកឈ្មោះ ធី (ដែលជាសត្រូវវាយកូនឈ្មោះ ហ៊ាង សារិន) ជនរងគ្រោះឈ្មោះ គង់ សឿន ក៏បានឆ្លើយថា ឈ្មោះ ធី ទៅកៀនស្វាយបាត់ហើយ ។
ខណៈនោះស្រាប់តែឈ្មោះ សុខ ជា ស្ទុះទៅចូលវាយឈ្មោះ គង់ សឿន ទាំងកម្រោលនៅក្នុងតូបតែម្តងហាក់ដូចជាឆ្នាំងមិនទាន់ក្តៅផងទៅក្តៅគម្រប់ទៅវិញ ។ ពេលនោះជនរងគ្រោះស្រែកឆោឡោហៅប្តីឲ្យជួយ និងស្រែកថា ចោរ ចោរ ចោរប្លន់ ខណៈនោះប្តីជនរងគ្រោះឈ្មោះ ស៊ុំ ជាន អាយុ២៩ឆ្នាំ ឈ្មោះ ស៊ុំ សំអូន អាយុ២៧ឆ្នាំ និងឪពុកឈ្មោះ ស៊ុំ ថា អាយុ៥៧ឆ្នាំ ព្រមទាំងកូនស្រីឈ្មោះ ស៊ុំ សំអាត អាយុ៣១ឆ្នាំ នាំគ្នារត់មកជួយក៏ត្រូវបក្សពួកឈ្មោះ ហ៊ាង សារិន យកដាវសាម៉ូរ៉ៃកាប់ទៅលើបុរសឈ្មោះ ស៊ុំ ថា ជាឪពុករបួសធ្ងន់ក៏កើតប្រតាយប្រតប់គ្នា ប្តីជនរងគ្រោះឈ្មោះ ស៊ុំ ជាន ឃើញគេកាប់ឪពុកក៏ស្ទុះទៅទាញបានកាំបិតកាចែតមួយក៏កាប់តបតទៅក្រុមជនបង្កកាប់ទៅកាប់មករបួសទាំងសងខាង០៨នាក់ ធ្ងន់០៥នាក់ ស្រាល០៣នាក់ ។ ក្រុមជនបង្ករបួសធ្ងន់០៣នាក់ ក្រុមជនរងគ្រោះរបួស ធ្ងន់២នាក់ ស្រាល០៣នាក់ ។
មូលហេតុអំណាចស្រាឪពុកចង់ជម្រះបញ្ជីសងសឹកឲ្យកូនគឺ កូនរបស់ឈ្មោះ ហ៊ាង សារិន ត្រូវឈ្មោះ ធី វាយកាលពីឆ្នាំមុនតែមករកមិនឃើញបែរជាអ្នកគ្មានគំនុំ ចូលទៅបង្ករឿងវាយម្ចាស់ផ្ទះអ្នកលក់ដូរ ផ្ទុះហិង្សាតែម្តង ។ លទ្ធផលជនសង្ស័យម្នាក់ត្រូវឃុំខ្លួន និង០៣នាក់ទៀតចេញពីមន្ទីរពេទ្យក៏ត្រូវឃុំខ្លួនដែរ ក្រុមជនរងគ្រោះ៥នាក់ក៏ចូលពេទ្យដែរ ៕
ចែករំលែកព័តមាននេះ