ខេត្តស្វាយរៀង ៖ ក្នុងថ្ងៃឈប់សម្រាករយៈពេល៥ថ្ងៃ ចាប់ពីថ្ងៃទី៦ ដល់ថ្ងៃទី១០ ខែតុលា ឆ្នាំ២០១៨ នៃពិធីបុណ្យភ្ជុំបិណ្ឌមានភ្ញៀវទេសចរណ៍ជាតិ-អន្តរជាតិ បានដើរលេងកម្សាន្តនៅតាមរមណីយដ្ឋាន ទេសចរណ៍នានាក្នុងខេត្តស្វាយរៀងចំនួន២,៧៦៨នាក់ គឺមានការកើនឡើងជាងឆ្នាំ២០១៧កន្លងទៅ។ បើយោងតាមលោក វ៉ាន់ សារ៉ាត ប្រធានមន្ទីរទេសចរណ៍ខេត្តស្វាយរៀង បានប្រាប់តាមទូរសព្ទ័នៅ រសៀលថ្ងៃទី១២ តុលា ២០១៨នេះ។
លោក វ៉ាន់ សារ៉ាត បានឱ្យដឹងទៀតថា ភ្ញៀវទេសចរណ៍បាន ចាប់ផ្តើមធ្វើដំណើរកម្សាន្ត តាមរមណីយដ្ឋានក្នុងខេត្តស្វាយរៀង នាឱកាសបុណ្យភ្ជុំបិណ្ឌ ចាប់ពីថ្ងៃទី០៦ ដល់ថ្ងៃទី១០ ខែតុលា ឆ្នាំ២០១៨ ដែលមានចំនួនសរុប២,៧៦៨នាក់ មានការកើនទ្បើងជាងឆ្នាំ២០១៧ មានចំនួន១,៩៦៦នាក់ ស្មើនឹង២៤៥.១៣% បើធៀបនឹងឆ្នាំ២០១៧កើនឡើងចំនួន៨០២នាក់។
ក្នុងនោះមានរមណីយដ្ឋានទេសចរណ៍ប្រាសាទបាសាក់ ស្រុកស្វាយជ្រំ រមណីយដ្ឋានធម្មជាតិព្រៃកូនគគីរ ក្រុងបាវិត និងរមណីយដ្ឋានធម្មជាតិទឹកវិល នៅស្រុករមាសហែកជាដើម។ លោកបានបន្តទៀតថា ភ្ញៀវទេសចរណ៍ជាតិ-អន្តរជាតិ ដែលចេញ-ចូលតាមច្រកទ្វារព្រំដែនអន្តរជាតិបាវិត ក៏មានការកើនទ្បើងផងដែរ។ បើយោងតាមរបាយការណ៍របស់ប៉ុស្តិ៍នគរបាលច្រកទ្វារព្រំដែន អន្តរជាតិបាវិតចាប់ពីថ្ងៃទី០៦-១០ ខែតុលា ឆ្នាំ២០១៨ បានឱ្យដឹងថា ភ្ញៀវទេសចរណ៍ជាតិមានចំនួន សរុប១០,៥០៩នាក់ មានការកើនទ្បើងចំនួន៣,៦៣៦នាក់ស្មើនឹង៥២.៩០% បើធៀបនឹងឆ្នាំ២០១៧ មានចំនួន៦,៨៧៣នាក់។
ចំណែកឯភ្ញៀវទេសចរអន្តរជាតិមានចំនួនសរុប១២,៦៧៧នាក់ មានការកើនទ្បើងចំនួន ៥,១៤៣នាក់ ស្មើនឹង៦៨.២៦% បើធៀបនឹងឆ្នាំ២០១៧ មានចំនួន៧,៥៣៤នាក់។ ប្រធានមន្ទីររូបនេះបានបញ្ជាក់ថា ការកើនឡើងភ្ញៀវទេសចរណ៍ដើរកម្សាន្ត តាមរមណីយដ្ឋាននានាក្នុងខេត្តនេះដោយសារការយកចិត្តទុកដាក់ពីរដ្ឋបាលខេត្តស្វាយរៀងក្នុងការអភិវឌ្ឍន៍ហេដ្ឋារចនាសម្ព័ន្ធ ទីតាំងទេសចរណ៍នានាដូចជាប្រាសាទព្រៃបាសាក់ជាដើម… ព្រមទាំងការរៀបចំសណ្តាប់ធ្នាប់ និងការការពារសន្តិសុខបានល្អពីអាជ្ញាធរខេត្តក៏ដូចជា អាជ្ញាធរតាមមូលដ្ឋានផងដែរ៕
ចែករំលែកព័តមាននេះ