ទីក្រុងវ៉ាស៊ីនតោន ៖ ប្រធានាធិបតីអាមេរិកលោកដូណាល់ ត្រាំ (Donald Trump) បាននិយាយថា ប្រទេសចិនមិនទាន់ត្រៀមខ្លួនរួចក្នុងការសម្រេចបានកិច្ចព្រមព្រៀងពាណិជ្ជកម្មមួយជាមួយនឹងសហរដ្ឋអាមេរិកទេ និងបានលើកឡើងសាជាថ្មីថា លោកត្រៀមខ្លួនរួចជាស្រេចក្នុងការដាក់ពន្ធបន្ថែមលើប្រទេសចិន…
ទីក្រុងវ៉ាស៊ីនតោន ៖ ប្រធានាធិបតីអាមេរិកលោកដូណាល់ ត្រាំ (Donald Trump) បាននិយាយថា ប្រទេសចិនមិនទាន់ត្រៀមខ្លួនរួចក្នុងការសម្រេចបានកិច្ចព្រមព្រៀងពាណិជ្ជកម្មមួយជាមួយនឹងសហរដ្ឋអាមេរិកទេ និងបានលើកឡើងសាជាថ្មីថា លោកត្រៀមខ្លួនរួចជាស្រេចក្នុងការដាក់ពន្ធបន្ថែមលើប្រទេសចិន ។
លោកប្រធានាធិបតីរូបនេះបានប្រាប់ដល់អ្នកសារព័ត៌មាននៅ White House កាលពីថ្ងៃអង្គារមកថា ៖« ប្រទេសចិនចង់បានការព្រមព្រៀងមួយ ហើយខ្ញុំគិតថាពួកគេមិនទាន់ត្រៀមខ្លួនរួចទេ »។
សង្គ្រាមពាណិជ្ជកម្មរវាងប្រទេសចិននិងសហរដ្ឋអាមេរិកមិនបានបង្ហាញមុខសញ្ញាថាអាចនឹងបញ្ចប់ក្នុងពេលឆាប់ៗនេះទេ ដែលបង្កជាការព្រួយបារម្ភថានឹងប៉ះពាល់ដល់ការលូតលាស់សេដ្ឋកិច្ចពិភពលោកនៅឆ្នាំនេះ និងឆ្នាំ២០១៩ ។
លោកត្រាំបានមានប្រសាសន៍ដូចខាងលើប៉ុន្មានថ្ងៃបន្ទាប់ពីឯកអគ្គរដ្ឋទូតចិននៅសហរដ្ឋអាមេរិកលោក Cui Tiankai និយាយថាប្រទេសរបស់លោកបានត្រៀមខ្លួនរួចក្នុងការសម្រេចបានការព្រមព្រៀងដើម្បីបញ្ចប់ជម្លោះពាណិជ្ជកម្ម ។
លោកបានបន្តថា ៖« គោលជំហររបស់សហរដ្ឋអាមេរិកផ្លាស់ប្តូរម្តងហើយម្តងទៀត ដូច្នេះពួកយើងមិនដឹងឡើយថាសហរដ្ឋអាមេរិកចង់ផ្តោតសំខាន់លើអ្វីជាងគេ »។
លោក Cui បានឲ្យដឹងទៀតថា ប្រទេសចិនប្តេជ្ញាចេញវិធានការកាត់បន្ថយឱនភាពពាណិជ្ជកម្មរបស់អាមេរិកជាមួយនឹងប្រទេសចិន និងកែទម្រង់សេដ្ឋកិច្ចផងដែរ ប៉ុន្តែលោកបានបន្តថាសហរដ្ឋអាមេរិកត្រូវតែបញ្ជាក់សាជាថ្មីពីអ្វីដែលពួកគេចង់បាន ។
គួរបញ្ជាក់ដែរថា ប្រទេសចិនបានចោទប្រកាន់សហរដ្ឋអាមេរិកថា កំពុងបង្ខំខ្លួនឲ្យចុះចាញ់ បន្ទាប់ពីរដ្ឋាភិបាលលោកត្រាំប្រកាសពីពន្ធថ្មីកាលពីចុងខែកញ្ញាលើផលិតផលចិនប្រមាណ២០០ប៊ីលានដុល្លារ។
ជាការឆ្លើយតប ប្រទេសចិនបានប្រកាសថាពួកគេនឹងដាក់ពន្ធ៥%ទៅ១០% លើផលិតផលអាមេរិកប្រមាណ៦០ប៊ីលានដុល្លារវិញ ។
លោកត្រាំបានបន្ថែមថា លោកបានត្រៀមខ្លួនជាស្រេចក្នុងការដាក់ពន្ធលើផលិតផលចិន ២៦៧ប៊ីលានដុល្លារបន្ថែមទៀត ប្រសិនបើប្រទេសចិនចេញសកម្មភាពឆ្លើយតបលើកសិករនិងឧស្សាហកម្មរបស់ពួកគេ ៕
ចែករំលែកព័តមាននេះ