រាជធានីភ្នំពេញ ៖ រដ្ឋមន្ត្រីក្រសួងទេសចរណ៍បានអះអាងថា ចំនួនភ្ញៀវទេសចរជាតិ និងអន្តរជាតិប្រមាណ២,៥លាននាក់ បានធ្វើដំណើរកម្សាន្ដតាមរមណីយដ្ឋានានានៅក្នុងឱកាសបុណ្យភ្ជុំបិណ្ឌ ដែលទើបបញ្ចប់ទៅថ្មីៗនេះ ។
យោងតាមរបាយការណ៍ស្ថិតិរបស់មន្ទីរទេសចរណ៍រាជធានី-ខេត្ត ភ្ញៀវទេសចរ និងបងប្អូនប្រជាពលរដ្ឋ ដែលដើរកម្សាន្ដនៅតាមរមណីយដ្ឋានទេសចរណ៍នានាក្នុងឱកាសឈប់សម្រាកពិធីបុណ្យភ្ជុំបិណ្ឌ(៨-១០ ខែតុលា ឆ្នាំ២០១៨) មានចំនួន១.២៦១.៦៩១ កើនឡើង២០,៤២% ក្នុងនោះភ្ញៀវជាតិ១.២១៣.៦៨៧ កើនឡើង២០,២៩% និងភ្ញៀវអន្តរជាតិ៤៨.០០៤នាក់ កើនឡើង២៣.៩៣% បើធៀបនឹងគ្រាដូចគ្នាកាលពីឆ្នាំមុន ។
បើតាមលោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ បានមានប្រសាសន៍តាមទូរស័ព្ទនាព្រឹកថ្ងៃទី១១ តុលា ម្សិលមិញថា តួលេខនៅក្នុងរបាយការណ៍ខាងលើនេះ គឺគិតតែរយៈពេល៣ថ្ងៃប៉ុណ្ណោះ ប៉ុន្តែបើគិតទាំងថ្ងៃសៅរ៍ និងថ្ងៃអាទិត្យវិញ ចំនួនភ្ញៀវគឺកើនរហូតដល់ទ្វេដងឯណោះ ។ លោកបន្តថា ជាទូទៅក្នុងឱកាសបុណ្យភ្ជុំបិណ្ឌនេះ ប្រជាពលរដ្ឋពិតជារីករាយ ដោយបានចេញដំណើរកម្សាន្ដច្រើន ប៉ុន្តែភាគនិរតីមិនសូវមានភ្ញៀវទៅទស្សនាទេ តែភ្ញៀវទេសចរបានទៅកាន់ភូមិភាគពាយ័ព្យ និងភូមិភាគឦសានច្រើន ។
លោកបន្តថា ៖« ខ្ញុំគិតថាប្រជាជនចំណាយច្រើនសម្រាប់ពិធីបុណ្យភ្ជុំបិណ្ឌឆ្នាំនេះ ដោយមនុស្សម្នាក់ចេញដំណើរមួយលើក ចំណាយមិនក្រោម៥០ដុល្លារអាមេរិកនោះទេ »។
តាមរបាយការណ៍របស់មន្ទីររាជធានីខេត្ត ដដែលបានសង្កេតឃើញផងដែរថា ការរៀបចំរមណីយដ្ឋាន និងគោលដៅទេសចរណ៍នានាមានការរីកចម្រើនកាន់តែប្រសើរ ដោយក្នុងនោះ អាចទប់ស្កាត់ការតម្លើងថ្លៃហួសហេតុលើម្ហូបអាហារ និងសេវាកម្មទេសចរណ៍ ដោយមានការបិទតម្លៃជម្រាបជូនភ្ញៀវជាមុនបានត្រឹមត្រូវ ។ ចំពោះបញ្ហាបរិស្ថានអនាម័យល្អប្រសើរជាងមុន ដោយភ្ញៀវទេសចរ និងបងប្អូនប្រជាពលរដ្ឋមានការយល់ដឹងនិងភ្ញាក់រលឹកច្រើន និងដោយមានការចុះអប់រំណែនាំពីមន្ត្រីជំនាញ និងអាជ្ញាធរពាក់ព័ន្ធ ជាពិសេសមន្ទីរទេសចរណ៍ បានចាត់តាំងក្រុមការងារចុះអប់រំផ្ទាល់ដល់រមណីយដ្ឋាន បើទោះបីជាការទុកដាក់សំរាម នៅតែជាបញ្ហាដែលត្រូវយកចិត្តទុកដាក់បន្ថែម ក្ដី តែជារួមគឺមានភាពប្រសើរឡើង ។ ចំណែកបញ្ហាសន្តិសុខ សុវត្ថិភាព ក៏មានភាពល្អប្រសើរ ដោយមន្ទីរទេសចរណ៍បានសហការយ៉ាងជិតស្និតជាមួយកម្លាំងមានសមត្ថកិច្ច ចាត់តាំងក្រុមការងារប្រចាំការនៅតាមគោលដៅទេសចរណ៍សំខាន់ៗ និងមានការលើកស្លាកសញ្ញាគ្រោះថ្នាក់ នៅតាមតំបន់ដែលងាយរងគ្រោះ ។
ទីប្រឹក្សាសមាគមទីភ្នាក់ងារទេសចរណ៍កម្ពុជា លោក ហូ វណ្ឌី បានថ្លែងឲ្យដឹងតាមទូរស័ព្ទផងដែរថា តាមការព្យាកររបស់លោកបានគិតថា ចំនួនភ្ញៀវទេសចរជាតិចេញទៅទស្សនា និងសម្រាកកម្សាន្ដនៅតាមរមណីយដ្ឋានទេសចរណ៍នានាទូទាំងប្រទេស គឺមានចំនួនច្រើនជាងរបាយការណ៍របស់ក្រសួងទេសចរណ៍ទៅទៀត ព្រោះបើគិតពីប្រជាជននៅរាជធានីភ្នំពេញ ប្រមាណ៨០% បានចាកចេញទៅតាមបណ្តាខេត្តនានា ហើយចំនួននេះមិនទាន់គិតបញ្ចូលអ្នកនៅរាជធានីភ្នំពេញ និងអ្នកនៅតាមបណ្តាខេត្តនានា ដែលបានចល័តដើរកម្សាន្ដពីខេត្តមួយ ទៅកាន់ខេត្តមួយនៅឡើយទេ ។ លោកបន្តថា ៖« បើគិតលើការចំណាយវិញ ខ្ញុំគិតថាជាមធ្យមប្រជាជនម្នាក់ចំណាយប្រាក់ចន្លោះពី៧០ទៅ៨០ដុល្លារអាមេរិកក្នុងម្នាក់ ហេតុនេះប្រជាជនទូទាំងប្រទេស អាចចំណាយពី៨៨លានដុល្លារទៅ១០០លានដុល្លារក្នុងពិធីនេះ »។
លោក ហូ វណ្ឌី បានបន្តថា ជាទូទៅការដើរកម្សាន្ដក្នុងរយៈពេល៣ថ្ងៃនេះ មានភាពល្អប្រសើរ ប៉ុន្តែមានបញ្ហាកកស្ទះចរាចរណ៍ បញ្ហាអនាម័យ និងបញ្ហាឡើងថ្លៃម្ហូបអាហារនៅតំបន់មួយចំនួនមានការហក់ខ្ពស់ឡើងវិញ ដែលបញ្ហានេះទាមទារឲ្យមានការយកចិត្តទុកដាក់បន្ថែមទៀត ។
ប្រធាននាយកដ្ឋានអភិវឌ្ឍន៍ទេសចរណ៍នៃក្រសួងទេសចរណ៍ លោក ជុក ជំនោ បានថ្លែងដែរថា ៖« កំណើននៃការធ្វើដំណើរកម្សាន្ដរបស់បងប្អូនប្រជាពលរដ្ឋនៅតាមរមណីយដ្ឋាននានា ដោយសារតែការអភិវឌ្ឍហេដ្ឋារចនាសម្ព័ន្ធតភ្ជាប់ទៅដល់គោលដៅបានល្អ បង្កលក្ខណៈងាយស្រួលក្នុងការធ្វើដំណើរ និងមួយវិញទៀត ដោយសារតែជីវភាពរបស់បងប្អូនកាន់តែប្រសើរឡើងពីមួយឆ្នាំទៅមួយៗ ហើយអ្វីដែលជាកត្តាសំខាន់នោះ គឺប្រទេសជាតិមានសុខសន្ដិភាព និងស្ថិរភាពនយោបាយពេញលេញ ។ ទន្ទឹមនឹងនេះ បណ្តាមន្ទីរទេសចរណ៍រាជធានី-ខេត្ត ភាគច្រើនខិតខំប្រឹងប្រែងបង្កើតផលិតផលទេសចរណ៍ថ្មីៗដើម្បីបំពេញសេចក្ដីត្រូវការរបស់ភ្ញៀវ និងសុទ្ធតែបានធ្វើរបាយការណ៍ជូនក្រសួងដោយបានកត់សម្គាល់ពីការរៀបចំសណ្តាប់ធ្នាប់ មានរបៀបរៀបរយ បញ្ហាបរិស្ថាន សន្តិសុខ និងសេវាកម្មដល់ភ្ញៀវទេសចរនៅតាមតំបន់គោលដៅមានលក្ខណៈកាន់តែល្អប្រសើរឡើងជាលំដាប់ »៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ