ខេត្តពោធិ៍សាត់ ៖ ផ្ទះមួយខ្នងបានក្លាយជាផេះក្នុងរយៈពេលតែមួយប៉ប្រិចភ្នែកប៉ុណ្ណោះ ដោយសាររាលដាលភ្លើងចង្ក្រាន ខណៈដែលម្ចាស់ផ្ទះមិននៅ ។ គ្រោះអគ្គីភ័យនេះបានកើតឡើងកាលពីវេលាម៉ោង១០ព្រឹក ថ្ងៃទី១១ ខែតុលា ឆ្នាំ២០១៨ នៅចំណុចអូរត្រាវ ស្ថិតក្នុងភូមិរំលេច ឃុំក្រពើពីរ ស្រុកវាលវែង ។
សមត្ថកិច្ចឲ្យដឹងថា ផ្ទះនេះជាផ្ទះស្ថិតក្នុងដីចំការមានទំហំ ៧មx៨ម ធ្វើអំពីឈើប្រក់ស័ង្កសី ជញ្ជាំងក្ដារ ដែលមានម្ចាស់ឈ្មោះ ឡេង ណៃ ភេទប្រុស អាយុ៥៦ឆ្នាំ ជាអ្នកធ្វើចំការ រស់នៅភូមិប្រមោយ ឃុំប្រមោយ ស្រុកវាលវែង ទាក់ទិននឹងករណីភ្លើងឆេះផ្ទះនេះបើតាមការសាកសួរពីម្ចាស់ផ្ទះអាចបណ្ដាលមកពីរាលដាលភ្លើងចង្ក្រានដែលមិនបានពន្លត់ឲ្យរលត់អស់បន្ទាប់ពីចម្អិនអាហាររួចហើយម្ចាស់មិននៅផ្ទះ ។
ផ្ទះបានឆេះខូចទាំងស្រុង ហើយទ្រព្យសម្បត្តិដែលមានក្នុងផ្ទះទាំងប៉ុន្មានក៏ត្រូវបាត់បង់ទាំងអស់ដែរ ក្នុងនោះទ្រព្យសម្បត្តិដែលសំខាន់ៗមាន ត្រាក់ទ័រ១គ្រឿង, ម៉ាស៊ីនត្រង់ស៊ីន័រ២គ្រឿង, ម៉ាស៊ីនកាត់ស្មៅ២គ្រឿង និងឈើគ្រឿងផ្ទះប្រមាណ៥ម៉ែត្រគូបទៀត ៕
ចែករំលែកព័តមាននេះ