រាជធានីភ្នំពេញ ៖ ដើម្បីចូលរួមលុបបំបាច់ការជួញដូរសត្វព្រៃខុសច្បាប់នោះភាគីកម្ពុជាបានលើកវិធានការ៥ចំណុច ដើម្បីទប់ស្កាត់ការជួញដូរសត្វព្រៃខុសច្បាប់ ក្នុងសន្និសីទស្តីពីការជួញដូរសត្វព្រៃខុសច្បាប់ លើកទី៤នៃចក្រភពអង់គ្លេស ។
សម្តេចក្រឡាហោម ស ខេង ឧបកនាយករដ្ឋមន្ត្រីរដ្ឋមន្ត្រីក្រសួងមហាផ្ទៃបានបញ្ជាក់ជូនអង្គសន្និសីទ កាលពីថ្ងៃទី១១ តុលានេះយ៉ាងដូច្នេះថា កម្ពុជាមិនមែនជាប្រទេសដែលអនុញ្ញាតឲ្យមានការជួញដូរផលិតផលសត្វព្រៃស្របច្បាប់នោះទេ ហើយក៏មិនមែនជាប្រទេសដែលមានតម្រូវការផលិតផលសត្វព្រៃសម្រាប់ការប្រើប្រាស់ក្នុងជីវភាពរស់នៅប្រចាំថ្ងៃនោះដែរ ប៉ុន្តែការវិវត្តន៍នៃស្ថានភាពសកលលោកនាពេលបច្ចុប្បន្ននេះក៏បានរុញច្រានកម្ពុជាទៅជាប្រទេសឆ្លងកាត់សម្រាប់ឧក្រិដ្ឋជនក្នុងការដឹកជញ្ជូន និងចរាចរណ៍ផលិតផលសត្វព្រៃខុសច្បាប់ ។
សម្តេចក្រឡាហោមមានប្រសាសន៍ថា «បទល្មើសជួញដូរសត្វព្រៃខុសច្បាប់មិនត្រឹមតែនាំមកនូវមហន្តរាយដល់និរន្តរភាពបរិស្ថាន និងធនធានធម្មជាតិនៃភពផែនដីប៉ុណ្ណោះទេ ប៉ុន្តែថវិកាដែលទទួលបានពីការប្រព្រឹត្តបទល្មើសនេះក៏បាននាំដល់ការបង្កើតនូវបញ្ហាដ៏ស្មុគស្មាញជាច្រើនក្នុងសង្គម និងសកលលោកជាពិសេសបទល្មើសពាក់ព័ន្ធដទៃទៀតដូចជា ការសម្អាតប្រាក់អំពើភេរវកម្មការជួញដូរមនុស្ស ការជួញដូរគ្រឿងញៀន ការជួញដូរអាវុធខុសច្បាប់ ។
សម្តេចគូសបញ្ជាក់បន្ថែមថា ក្នុងស្មារតីរួមចំណែកដល់សន្និសីទប្រឆាំងការជួញដូរសត្វព្រៃខុសច្បាប់លើកទី៤នេះក្នុងនាមរាជរដ្ឋាភិបាលកម្ពុជាសម្តេចក្រឡាហោមបានលើកពីការប្តេជ្ញាចិត្តបន្តអនុវត្តនូវគោលការណ៍ និងវិធានការសំខាន់ៗមួយចំនួនដែលរាជរដ្ឋាភិបាលកម្ពុជា និងសន្និសីទលើកទី៣ កន្លងមកបានដាក់ចេញដូចជាទី១- បន្តកែលំអលិខិតបទដ្ឋានគតិយុត្តដែលមានស្រាប់តាមរយៈការធ្វើវិសោធនកម្ម និងការបង្កើតលិខិតបទដ្ឋានគតិយុទ្ធថ្មីៗបន្ថែមតាមការចាំបាច់ ដើម្បីបម្រើដល់ការរៀបចំគោលនយោបាយគាំពារ និងការគ្រប់គ្រងថែរក្សាអភិរក្សសត្វព្រៃឲ្យកាន់តែទទួលបានប្រសិទ្ធភាពខ្ពស់សំដៅឆ្លើយតបជាក់ស្តែងចំពោះស្ថានការណ៍វិវត្តជាសកលនៃការគ្រប់គ្រងធនធានធម្មជាតិ ។ ទី២- បន្តពង្រឹងការអនុវត្តន៍ច្បាប់ឲ្យកាន់តែតឹងរឹង តាមរយៈការរឹតបន្តឹងការដាក់ទោសទណ្ឌ ឬការផ្តន្ទាទោសចំពោះសកម្មភាពល្មើសច្បាប់ពាក់ព័ន្ធនឹងការជួញដូរសត្វព្រៃខុសច្បាប់ ។ ទី៣ – សហការកៀរគរការចូលរួមពីគ្រប់សមាសភាពពាក់ព័ន្ធទាំងនៅថ្នាក់ជាតិ និងអន្តរជាតិ ព្រមទាំងស្ថាប័នរដ្ឋាភិបាលគ្រឹះស្ថានឯកជនអង្គការសង្គមស៊ីវិលដៃគូពាក់ព័ន្ធជាតិ-អន្តរជាតិ ។
ដើម្បីចូលរួមអនុវត្ត និងប្រមូលផ្តុំការគាំទ្រក្នុងសកម្មភាពប្រយុទ្ធប្រឆាំងការជួញដូរសត្វព្រៃខុសច្បាប់នៅកម្ពុជាក្នុងតំបន់ និងសកលលោក ។ ទី៤- បន្តផ្សព្វផ្សាយបង្កើនការយល់ដឹង តាមរយៈការអប់រំណែនាំសាធារណៈជនទូទៅឲ្យយល់ដឹងអំពីតម្លៃ និងសារៈសំខាន់នៃធនធានធម្មជាតិ និងសត្វព្រៃដែលជាសមាសធាតុដ៏ចាំបាច់នៃប្រព័ន្ធអេកូឡូហ្ស៊ីសំដៅរួមគ្នាចូលរួមកាត់បន្ថយឲ្យបានជាអតិបរមានូវតម្រូវការទីផ្សារសត្វព្រៃដូចជា ការបរិភោគ ការប្រើប្រាស់ក្នុងជីវភាពប្រចាំថ្ងៃ និងការធ្វើពាណិជ្ជកម្មជាដើម ។ និងទី៥- បន្តផ្សារភ្ជាប់ទំនាក់ទំនង និងកិច្ចសហប្រតិបត្តិការជិតស្និទ្ធជាមួយស្ថាប័នអនុវត្តច្បាប់ក្នុងការចែករំលែកបទពិសោធន៍ និងព័ត៌មានក្នុងកិច្ចប្រតិបត្តិការបង្ការទប់ស្កាត់ និងបង្ក្រាបបទល្មើសជួញដូរសត្វព្រៃឆ្លងដែនគ្រប់ទម្រង់ ព្រមទាំងគាំទ្រគ្នាទៅវិញទៅមកលើការពង្រឹងសមត្ថភាពកងកម្លាំងអនុវត្តច្បាប់ឲ្យកាន់តែមានប្រសិទ្ធភាពខ្ពស់ ។
សូមជម្រាបថា សម្តេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃបានដឹកនាំគណៈប្រតិភូជាន់ខ្ពស់របស់រាជរដ្ឋាភិបាលកម្ពុជាចូលរួមសន្និសីទស្តីពីការជួញដូរសត្វព្រៃខុសច្បាប់លើកទី៤ នៅទីក្រុងឡុងដ៍ចក្រភពអង់គ្លេសដែលមានប្រទេសចូលរួមជាង៨០ប្រទេស (ថ្នាក់ប្រធានាធីបតី នាយករដ្ឋមន្ត្រី រដ្ឋមន្ត្រី និងមន្ត្រីជាន់ខ្ពស់ សង្គមស៊ីវិល និងវិស័យឯកជនជាង១០០០នាក់ចូលរួម) ៕
ចែករំលែកព័តមាននេះ