Jadon Sancho ដាច់ចិត្តប្រាប់ពីមូលហេតុចាកចេញពី Man City
តាមប្រភពព័ត៌មាន Manchester Evening News បានឲ្យដឹងថា កីឡាករវ័យ១៨ឆ្នាំ Jadon Sancho បានប្រាប់ពីមូលហេតុចាកចេញពី Manchester…
តាមប្រភពព័ត៌មាន Manchester Evening News បានឲ្យដឹងថា កីឡាករវ័យ១៨ឆ្នាំ Jadon Sancho បានប្រាប់ពីមូលហេតុចាកចេញពី Manchester City ទៅលេងឲ្យក្លិប Borussia Dortmund ។
កីឡាករវ័យក្មេងរូបនេះ បានចាកចេញទៅកាន់ Budesliga កាលពីឆ្នាំមុន ក្រោយពីលេងឲ្យ City បានពីរឆ្នាំ បើទោះបីជាបានជាប់មាត់នៅបន្តជាមួយនឹង Man City ក៏ដោយ។ នៅពេល Sancho ចាកចេញ គ្រូបង្វឹក Pep Guardiola បាននិយាយថា ៖«ពួកយើងបានធ្វើអ្វីៗគ្រប់អស់ហើយ តែខ្ញុំមិនគិតថានេះមកពីបញ្ហាប្រាក់ខែទេ តែនេះប្រហែលមកពីរឿងផ្សេង។ ខ្ញុំក៏អាចយល់ដែរ។ គាត់ត្រូវតែដឹង គ្រួសារត្រូវតែដឹង ហើយជាពិសេសអ្នកចាត់ការក្លិបត្រូវតែដឹង។ ពួកយើងមានទំនុកចិត្តលើគាត់»។
Man City នៅពេលនោះបានហ៊ានជះលុយលើ Sancho ឲ្យក្លាយទៅជាកីឡាករស៊ីលុយច្រើនជាងគេនៅក្លិប តែចុងក្រោយគេនៅតែសម្រេចចិត្តចាកចេញទៅលេងឲ្យ Dortmund ក្នុងទឹកប្រាក់ ៨លានផោន ។
នៅថ្ងៃពុធកន្លងមកនេះ Sancho បានប្រាប់ពីមូលហេតុនៅពីក្រោយការចាកចេញ នៅក្នុងសន្និសីទកាសែតមួយរបស់អង់គ្លេសថា៖«ការចាកចេញពីផ្ទះធ្លាប់នៅ គឺជារឿងត្រូវជំនះមួយដ៏ធំ។ ការដែលចាកចេញពីម្តាយនិងបងប្អូនស្រីរបស់ខ្ញុំ គឺធ្វើឲ្យខ្ញុំនឹកពួកគេយ៉ាងខ្លាំង។ តែខ្ញុំចង់ធ្វើអ្វីដែលល្អបំផុតសម្រាប់ខ្ញុំ ហើយនេះគឺជាអ្វីដែលខ្ញុំបានធ្វើ»។
កីឡាកររូបនេះបានបន្តថា៖ «វាពិតជាពិបាកណាស់ ជាពិសេសបែកពីម្តាយខ្ញុំ។ តែប្រសិនបើអ្នកជឿលើខ្លួនឯង អ្នកត្រូវតែធ្វើអ្វីក៏ដោយ ដើម្បីឲ្យកាន់តែប្រសើរសម្រាប់ខ្លួនឯង។ ខ្ញុំនៅពេលនេះរស់នៅជាមួយឪពុករបស់ខ្ញុំនៅអាល្លឺម៉ង់។ គ្មាននរណាម្នាក់ស្រួលខ្លួនពេលនៅឆ្ងាយពីផ្ទះទេ។ ប្រសិនបើអ្នកសម្រេចចិត្តទៅលេងនៅប្រទេសក្រៅហើយ អ្នកត្រូវតែជឿជាក់លើខ្លួនឯង»៕
ចែករំលែកព័តមាននេះ