វិមានឈ្នះឈ្នះ ! ត្រៀមសម្ពោធនៅចុងឆ្នាំ២០១៨នេះ
- ភ្នំពេញ
រាជធានីភ្នំពេញ ៖ នៅរសៀលថ្ងៃទី១១ តុលានេះ លោក ឃួង ស្រេង អភិបាលរាជធានីភ្នំពេញ រួមជាមួយមន្ត្រីជំនាញពាក់ព័ន្ធ និងអាជ្ញាធរដែនដី…
រាជធានីភ្នំពេញ ៖ នៅរសៀលថ្ងៃទី១១ តុលានេះ លោក ឃួង ស្រេង អភិបាលរាជធានីភ្នំពេញ រួមជាមួយមន្ត្រីជំនាញពាក់ព័ន្ធ និងអាជ្ញាធរដែនដី បានអញ្ជើញទៅពិនិត្យទីតាំងដែលត្រូវកែលម្អ សោភ័ណភាព នៅខាងមុខ និងជុំវិញវិមានឈ្នះឈ្នះ ស្ថិតក្នុងសង្កាត់ព្រែកតាសេក ខណ្ឌជ្រោយចង្វារ ដើម្បីត្រៀមសម្ពោធជាផ្លូវការ នៅថ្ងៃទី២៩,៣០,៣១ ខែធ្នូ ឆ្នាំ២០១៨ខាងមុខនេះ ក្រោមអធិបតីដ៏ខ្ពង់ខ្ពស់ របស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
មន្ត្រីរដ្ឋបាលរាជធានីភ្នំពេញ បានឲ្យដឹងថា ក្នុងនាមអាជ្ញាធរដែនដី លោក ឃួង ស្រេង បានជំរុញ និងដាក់ផែនការឲ្យមន្ត្រី នៃមន្ទីរជំនាញពាក់ព័ន្ធមួយចំនួន និងអាជ្ញាធរដែនដី បង្កើនការយកចិត្តទុកដាក់ លើការរៀបចំកែលម្អ ហេដ្ឋារចនាសម្ព័ន្ធ និងសោភ័ណភាព បរិស្ថានជុំវិញទីតាំងប្រារព្វពិធី, ការកែលម្អផ្លូវចូលឲ្យបានស្អាត ចាប់ពីគល់ស្ពានព្រែកព្នៅដល់ផ្លូវជាតិលេខ៦ កាប់ព្រៃនៅអមសងខាងផ្លូវឲ្យបានទទឹង៣០ម៉ែត្រ ពីចិញ្ចើមផ្លូវ,ដាក់ភ្លើងបំភ្លឺផ្លូវ និងដាក់ភ្លើងហ្វាតាមដើមឈើ, រៀបចំសួនច្បារ,រៀបចំ កន្លែងចតយានយន្តជាដើម។
ចំណែកឯមន្ទីរសុខាភិបាលត្រូវរៀបចំដាក់ស្តង់ពិនិត្យ និងសង្គ្រោះចំនួន២កន្លែង និងដាក់រថយន្តសង្គ្រោះចំនួន២០គ្រឿង សម្រាប់ជួយអន្តរាគមន៍ នៅពេលប្រជាពលរដ្ឋ មានបញ្ហាផ្នែកសុខភាព ដែលកម្មវិធីសម្ពោធនេះ គ្រោងនឹងមានប្រជាពលរដ្ឋ ចូលរួមជាង១ម៉ឺននាក់។ ក្នុងពេលចុះពិនិត្យនោះ លោក ឃួង ស្រេង អភិបាលរាជធានីភ្នំពេញបញ្ជាក់ថា បញ្ហាសំខាន់ចំពោះមុខ គឺរក្សាបាននូវសន្តិសុខ សណ្តាប់ធ្នាប់ សោភ័ណភាពរបៀបរៀបរយ សម្រាប់ពិធីឲ្យបានល្អប្រសើរ សក្តិសមទៅនឹងខ្លឹមសារ ឬអត្ថន័យនៃ នយោបាយ ឈ្នះឈ្នះ របស់សម្តេចអគ្គមហាសេនាបតីតេជោ ហ៊ុន សែន ដែលខ្មែរគ្រប់ភាគីទំនាស់ឈ្នះទាំងអស់គ្នា ហើយប្រទេសជាតិទាំងមូលក៏ឈ្នះទាំងអស់គ្នា។
សម្តេចតេជោ ហ៊ុន សែន គឺជាស្ថាបនិកនៃសន្តិភាព ដែលខ្មែរគ្រប់រូបបានរស់នៅ ក្នុងសុខសន្តិភាព និងការអភិវឌ្ឍន៍ ពេញផ្ទៃប្រទេស។ ពិធីសម្ពោធវិមានឈ្នះ ឈ្នះនេះ ដើម្បីអបអរសាទរ គម្រប់ខួប២០ឆ្នាំ ដែលព្រះរាជាណាចក្រកម្ពុជា បានបញ្ចប់សង្គ្រាមផ្ទៃក្នុង ដ៏រ៉ាំរៃរវាងខ្មែរនឹងខ្មែរ ដែលភាគីទំនាស់ទាំងអស់ បានទម្លាក់អាវុធចុះ រួចចាប់យកការចរចាគ្នាដោយសន្តិវិធី តាមនយោបាយឈ្នះឈ្នះរបស់សម្តេចតេជោ។ ដូច្នេះខ្មែរគ្រប់រូប ត្រូវរក្សាឲ្យបាននូវសន្តិភាព ដែលបានមកដោយលំបាកនេះ កុំឲ្យបាត់បង់នឹងការពារសុខសន្តិភាពឲ្យបានជាដាច់ខាត ទោះក្នុងតម្លៃណាក៏ដោយ។
ចំណែកនាយឧត្តមសេនីយ៍ ណឹម សុវត្ថិ អគ្គនាយក អគ្គនាយកដ្ឋាន នយោបាយ និងកិច្ចការបរទេស នៃក្រសួងការពារជាតិ និងជាប្រជាប្រធាន ក្រុមការងារសាងសង់ វិមានឈ្នះឈ្នះ បានបញ្ជាក់ថា នៅថ្ងៃទី២៩ ខែធ្នូ ឆ្នាំ១៩៩៨ គឺជាថ្ងៃបញ្ចប់សង្គ្រាមស៊ីវិល និងទទួលបានសន្តិភាព ពេញលេញនៅកម្ពុជា តាមរយៈនយោបាយឈ្នះឈ្នះ របស់សម្តេចតេជោ ហ៊ុន សែន ហៅកាត់ថា ទិវានយោបាយឈ្នះឈ្នះ។ តាមរយៈសន្តិភាពរកបានដោយលំបាក នៃនយោបាយឈ្នះឈ្នះនោះហើយ ដែលបង្កើតឱកាសមាស ឱកាសពេជ្រ សម្រាប់ការអភិវឌ្ឍន៍សេដ្ឋកិច្ច និងសង្គមនៅកម្ពុជា។
នាយឧត្ដមសេនីយ៍បន្ថែមថា វិមានឈ្នះឈ្នះ គឺបានរៀបចំចម្លាក់ ស្តីពីចម្លាក់ទិវាចងចាំ ឆ្ពោះទៅការផ្តួលរំលំ របបប្រល័យពូជសាសន៍ និងចម្លាក់ដំណើរជាតិកម្ពុជា នាទសវត្សឆ្នាំ៨០ និងដើមឆ្នាំ៩០ ដាក់តាំងបង្ហាញ នៅជាន់ផ្ទាល់ដីផ្នែកខាងក្រៅវិមាន។ សូមបញ្ជាក់ថា វិមានឈ្នះឈ្នះចាប់ផ្តើម សាងសង់នៅក្នុងខែកុម្ភៈ ឆ្នាំ២០១៦ ដែលសង់នៅផ្ទៃដីចំនួន១៥ហិកតា ដែលវិមានមានកម្ពស់៥៤ម៉ែត្រ ស្ថិតនៅក្នុងតំបន់អភិវឌ្ឍន៍លីយ៉ុងផាត់ ក្នុងសង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ៕
ចែករំលែកព័តមាននេះ