ខេត្តបន្ទាយមានជ័យ ៖ នៅក្រុងប៉ោយប៉ែតកាលពីវេលាម៉ោងជិត5ទាបភ្លឺព្រឹក ថ្ងៃទី11 តុលា មនុស្ស3នាក់បានរងរបួសដោយសារក្រុមជនមិនស្គាល់មុខតាមកាប់នឹងដាវសាំម៉ូរ៉ៃ2កន្លែងផ្សេងគ្នានៅភូមិចាន់គិរី និងភូមិបាលិលេយ្យ2 សង្កាត់ប៉ោយប៉ែត ។
ជនរងគ្រោះទាំង3រួមមានទី1-ឈ្មោះ សុខ តារា ហៅបឿក ភេទប្រុស អាយុ17ឆ្នាំ របួស.កខាងក្រោយ និងក្បាល, ទី2-ឈ្មោះ គង់ ជីវ៉ា ភេទប្រុស អាយុ16ឆ្នាំ របួសប្រអប់ដៃស្តាំ អ្នកទាំង2នាក់ខាងលើរស់នៅភូមិបាល័ង្គ ឃុំតាគង់ ស្រុកម៉ាឡៃ ខេត្តបន្ទាយមានជ័យ និងទី3-ឈ្មោះ សុវណ្ណ ចន្ធូ ភេទប្រុស អាយុ21ឆ្នាំ របួសប្រអប់ដៃស្តាំ និងមានទីលំនៅភូមិទំនប់ដាច់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ។
តាមប្រភពពីជនរងគ្រោះទី1 និងទី2អះអាងថា ពេលដែលពួកគេកំពុងជិះម៉ូតូម៉ាក Zoomer-X ស៊េរីឆ្នាំ2017 ចេញពីក្រុងប៉ោយប៉ែតបំណងទៅផ្ទះវិញ លុះដល់ចំណុចឡធ្យូងក្នុង ភូមិបាលិលេយ្យ2 ស្រាប់តែមានជនសង្ស័យមួយក្រុមមានគ្នា4ទៅ5ម៉ូតូកាន់កាំបិតសាំម៉ូរ៉ៃដេញកាប់ឲ្យរបួស ។
ដោយឡែកជនរងគ្រោះទី3អះអាងថា ពេលកំពុងជិះម៉ូតូម៉ាកសង់សេ125 ពណ៌ខ្មៅ ជាមួយមិត្តភក្តិពីកើតទៅលិចដល់ចំណុចភូមិចាន់គិរី សង្កាត់ប៉ោយប៉ែត ក្បែរមន្ទីរពេទ្យបង្អែកក្រុងប៉ោយប៉ែតនៅម៉ោងជិត5ទាបភ្លឺព្រឹកថ្ងៃទី11 តុលា ស្រាប់តែមានជនសង្ស័យប្រដាប់ដោយកាំបិតសាំម៉ូរ៉ៃជិះ ម៉ូតូ4ទៅ5គ្រឿង ដេញកាប់បណ្តាលឲ្យរបួសតែម្តង ។
ទាំង2ករណីនេះក្រុមជនសង្ស័យបានគេចខ្លួនបាត់ដោយសុវត្ថិភាព ហើយករណីនេះលោកវរសេនីយ៌ឯក ធិន ស៊ិនដេត អធិការនគរបាលក្រុងប៉ោយប៉ែតប្រាប់តាមប្រព័ន្ធ WhatsApp ថាកំពុងដុតដៃដុតជើងស្រាវជ្រៀវរកជនសង្ស័យដើម្បីចាត់ការតាមផ្លូវច្បាប់ហើយ ៕
ចែករំលែកព័តមាននេះ