ខេត្តបន្ទាយមានជ័យ ៖ នគរបាលប៉ុស្តិ៍រដ្ឋបាល និងប្រជាការពារភូមិ4នាក់នៅស្រុកព្រះនេត្រព្រះត្រូវបានក្រុមក្មេង និងចាស់ទំនើងព្រួតគ្នាវាយ កាលពីថ្ងៃទី9 ខែតុលា ឆ្នាំ2018 ។ ករណីនេះកើតឡើងនៅចំណុចវត្តទម្លាប់រង្សី ភូមិទម្លាប់ ឃុំប្រាសាទ កាលពីរសៀលថ្ងៃទី9 តុលា ។
តាមប្រភពពីកន្លែងកើតហេតុបានឲ្យដឹងថា ដំបូងកើតឡើងដោយសារទូកស្មាច់2គ្រឿងបុកគ្នាពេលកំពុងបើកបរក្នុងប្រឡាយមួយបញ្ច្រាសទិសគ្នាជិតវត្តទម្លាប់រង្សី ក្រោយពីបញ្ហាខាងលើកើតឡើងនគរបាលប៉ុស្តិ៍រដ្ឋបាលប្រាសាទ និងប្រជាការពារភូមិដែលកំពុងរក្សាសណ្តាប់ធ្នាប់ និងការពារសន្តិសុខនៅក្នុងបរិវេណវត្តជិតនោះបានទៅជួយធ្វើអន្តរាគមន៌ដើម្បីកុំឲ្យមានជម្លោះកើតឡើង ។
ប្រភពបន្តថា ក្រោយការសម្របសម្រួលចប់ភាគីម្ខាងឈ្មោះ ចាន់ ឈឿម អាយុ53ឆ្នាំ រស់នៅភូមិថ្មី ឃុំប្រាសាទ បានបើកទូកស្មាច់ចេញទៅបាត់នៅឡើយភាគីម្ខាងទៀតឈ្មោះ បឿន ថី ភេទប្រុស អាយុ52ឆ្នាំ រស់នៅភូមិកៀនបន្ទាយ ឃុំប្រាសាទ ព្រោះទូចស្មាច់របស់គាត់ធ្លាយហើយទឹកចូលច្រើន ។
មួយសន្ទុះក្រោយមកស្រាប់តែឈ្មោះ ចាន់ ឈឿម បើកទូកស្មាច់ត្រឡប់មកវិញស្រែកជេរប្រមាថ និងវាយនគរបាលម្នាក់ឈ្មោះ អ៊ុយ ពិ 2ទៅ3ដៃបន្ទាប់មកក៏មានទូកបក្ខពួក និងកូនរបស់ជនដៃដល់ខាងលើមកបន្ថែមទៀតដោយស្រែកថា «អាណាកាក់ទូកឪអញ?» ហើយក៏ស្ទុះឡើងពីទូកខ្លះកាន់កៅអីជ័រ ខ្លះកាន់ក្តាឈើ និងខ្លះកាន់ដុំឥដ្ឋ ហើយមួយចំនួនចាប់ឱបមន្ត្រីនគរបាលប៉ុស្តិ៍ម្នាក់ទៀតឈ្មោះ វ៉ាន់ សុផា វាយតប់ជាច្រើនដៃ ។
ដោយឃើញក្រុមក្មេង និងចាស់ទំនើងវាយសមត្ថកិច្ចខាងលើប្រជាការពារភូមិម្នាក់ឈ្មោះ ញឹប ថូ ស្ទុះទៅជួយឃាត់ តែត្រូវក្រុមជនដៃដល់វាយរបួសក្បាល និងដៃស្តាំហើយប្រជាការពារម្នាក់ទៀតឈ្មោះ កិ ក៏ត្រូវជនសង្ស័យឆក់យកវិទ្យុទាក់ទងវាយរបួសក្បាល និងបែកវិទ្យុទាក់ទងខូចអស់ទៀតផង ។
យ៉ាងណាក៏ដោយករណីខាងលើក្រោយកើតហេតុសមត្ថកិច្ចស្រុកព្រះនេត្រព្រះដឹកនាំដោយលោក មាស រឹទ្ធី អធិការនគរបាលស្រុកបានដឹកនាំកម្លាំងចុះបង្ក្រាប និងឃាត់ខ្លួនជនសង្ស័យបានជាបន្តបន្ទាប់ចំនួន5នាក់រួមមានទី1-ឈ្មោះ ចាន់ ឈឿម ភេទប្រុស អាយុ53ឆ្នាំ, ទី2-ឈ្មោះ ព្រំ សំណាង ហៅចេក ភេទប្រុស អាយុ47ឆ្នាំ (កំពុងគេចខ្លួន), ទី3-ឈ្មោះ ឈឿម ដួង ភេទប្រុស អាយុ17ឆ្នាំ, ទី4-ឈ្មោះ ព្រំ ចរិយ៉ា ភេទប្រុស អាយុ19ឆ្នាំ និងទី5-ឈ្មោះ ដូង ម៉ៅ ភេទប្រុស អាយុ24ឆ្នាំ បញ្ជូនទៅស្នងការដ្ឋាននករបាលខេត្តដើម្បីចាត់ការបន្តតាមនីតិវិធីច្បាប់ ៕
ចែករំលែកព័តមាននេះ