រាជធានីភ្នំពេញ ៖ បុរសម្នាក់ជិះម៉ូតូចេញពីផ្ទះឪពុកក្មេកត្រឡប់ទៅបន្ទប់ជួលវិញមិនទាន់ដល់ផងត្រូវរថយន្តស៊េរីទំនើបបុកពីក្រោយអូសជាង២០ម៉ែត្របែកក្បាលស្លាប់នៅក្នុងថ្លុកឈាមយ៉ាងអាណោចអាធ័ម រថយន្តព្យាយាមបើករត់បានជាច្រើនម៉ែត្រ តែបើកទៅមុខមិនរួច អ្នកបើកបរបានរត់ចោលរថយន្តនិងអ្នករួមដំណើរបាត់ ។
ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង៩និង២០នាទីយប់ ថ្ងៃទី១០ ខែតុលា ឆ្នាំ២០១៨ តាមបណ្ដោយផ្លូវជាតិលេខ៤ ស្ថិតនៅភូមិផ្សារកំបូល សង្កាត់កំបូលខណ្ឌពោធិ៍សែនជ័យ ។
ជនរងគ្រោះដែលស្លាប់ខាងលើឈ្មោះឈឹម ចាន់រ៉ា ភេទប្រុស អាយុ២៩ឆ្នាំ មុខរបរកម្មកររោងចក្រ
ស្នាក់នៅបន្ទប់ជួលភូមិព្រៃបឹង សង្កាត់កន្ទោក ខណ្ឌពោធិ៍សែនជ័យ មានស្រុកកំណើតនៅភូមិដើមចាន់ ឃុំរមិញ ស្រុកកោះអណ្តែត ខេត្តតាកែវ។
រថយន្តបង្កម៉ាកឡិចស៊ីស NX200t ពណ៌ខ្មៅ ពាក់ស្លាកលេខ ភ្នំពេញ ២AR-៣៨៧១ បើកបរក្នុងទិសដៅពីលិចទៅកើត។ ម៉ូតូរងគ្រោះម៉ាកស្មាស ពណ៌ខៀវ ពាក់ស្លាកលេខ កណ្តាល ១E-៥៥៤៥ បើកបរក្នុងទិសដៅស្របគ្នា។
តាមប្រភពព័ត៌មានពីកន្លែងកើតហេតុបាននិយាយប្រាប់ថា នៅមុនពេលកើតហេតុគេឃើញរងគ្រោះបើកបរម៉ូតូក្នុងទិសដៅពីលិចទៅកើត ស្រាប់តែមានរថយន្តស៊េរីទំនើបមួយគ្រឿងម៉ាកឡិចស៊ីស NX200t បើកក្នុងទិសដៅពីលិចទៅកើតយ៉ាងលឿន ក្នុងទិសដៅស្របគ្នា លុះមកដល់ចំណុចកើតហេតុ ស្រាប់តែមានរថយន្តខាងលើ បានបុកពីក្រោយម៉ូតូពេញទំហឹងអូសជាង២០ម៉ែត្រ ដោយបុកពីផ្នែកខាងស្ដាំខ្ទាតទៅផ្នែកខាងឆ្វេង បណ្តាលឲ្យជនរងគ្រោះបាក់ជើងខាងឆ្វេង និងបែកក្បាលហូរឈាមស្លាប់ភ្លាមៗ ចំណែកម៉ូតូរបស់ជនរងគ្រោះបានខ្ទេចស្ទើរទាំងស្រុង។
ប្រភពព័ត៌មានបានបន្តទៀតថា ពេលបុកពីម្ខាងទៅម្ខាងហើយ រថយន្តឡិចស៊ីសខាងលើ បែកពោងសុវត្ថិភាពទាំងសង្ខាងដោយពុំមានអ្នករងរបួសឡើយ បន្ទាប់មករថយន្តខាងលើបានព្យាយាមបើកទៅមុខបានជាង១០០ម៉ែត្រ ក៏ត្រូវបានប្រជាពលរដ្ឋដេញស្ទាក់រថយន្តខាងលើដែរ តែមិនបានឃាត់អ្នកបើកបរនោះឡើយ បន្ទាប់មកអ្នកបើកបររថយន្តខាងលើបានឡើងរថយន្តមួយគ្រឿងទៀតគេចខ្លួនបាត់ទើបសមត្ថកិច្ចនគរបាលប៉ុស្តិ៍មកដល់។
បើតាមសំដីក្រុមគ្រួសាររបស់សពបានបង្ហើបប្រាប់ថា មុនពេលកើតហេតុ ជនរងគ្រោះមានជំលោះជាមួយប្រពន្ធរបស់ខ្លួនតិចតួចដែរ ទើបជិះម៉ូតូចេញពីផ្ទះឪពុកក្មេកនៅក្បែរកន្លែងកើតហេតុដើម្បីត្រឡប់ទៅបន្ទប់ជួលរបស់ខ្លូនវិញនៅសង្កាត់កន្ទោក ខណ្ឌពោធិ៍សែនជ័យ ។
ក្រោយពេលកើតហេតុ សពត្រូវបានជំនាញចរាចរណ៍ការិយាល័យផ្លូវគោករាជធានីភ្នំពេញបានប្រគល់អោយក្រុមគ្រួសារដើម្បីយកទៅធ្វើបុណ្យតាមប្រពៃណីនៅវត្តស្ងួនពេជ្រ ជិតស្រុកខាងប្រពន្ធ ។
ចំណែករថយន្តឡិចស៊ីស និងម៉ូតូរបស់ជនរងគ្រោះត្រូវបានជំនាញចរាចរណ៍ការិយាល័យផ្លូវគោករាជធានីភ្នំពេញធ្វើការវាស់វែងនិងស្ទូចយកទៅរក្សាទុករងចាំការដោះស្រាយថ្ងៃក្រោយ ៕
ចែករំលែកព័តមាននេះ