ខេត្តប៉ៃលិន ៖ សេចក្តីរាយការណ៍ពីអធិការនគរបាលស្រុកសាលាក្រៅបានឱ្យដឹងថា រហូតដល់រសៀលថ្ងៃទី១០ ខែតុលា ឆ្នាំ២០១៨នេះ បុរសជាសមាជិកក្រុមប្រឹក្សាឃុំស្ទឹងកាច់ម្នាក់ ត្រូវបានសមត្ថកិច្ចចាប់ខ្លួនបញ្ជូនទៅ តុលាការខេត្តហើយ។ បន្ទាប់ពីទទួលពាក្យបានបណ្តឹងពីប្រជាពលរដ្ឋជាឪពុកម្តាយសិស្សជិត៥០នាក់ ខណៈបុរសរូបនោះបានយកលុយគេម្នាក់ៗចំនួន១.៨០០ដុល្លារ ហើយសន្យាថានឹងឱ្យចូលក្របខណ្ឌ មន្ត្រីនគរបាលខេត្ត លុះចាំបាត់ៗអស់រយៈពេលជិត៣ឆ្នាំ មិនឃើញលទ្ធផលក៏ប្តឹងចាប់ឃាត់ខ្លួនតែម្តង។
ប្រភពព័ត៌មានពីលោក រី ដារ៉ា អធិការស្តីទីស្រុកសាលាក្រៅបានឱ្យដឹងថា បន្ទាប់ពីទទួលបញ្ជាពីថ្នាក់លើរួចមក កាលពីវេលាម៉ោង៨ និង៣០នាទីព្រឹក ថ្ងៃពុធ ០១កើត ខែភទ្របទ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១០ ខែតុលា ឆ្នាំ២០១៨ អធិការនគរបាលស្រុកសាលាក្រៅ បានដឹកនាំកន្លាំងចុះទៅធ្វើការចាប់ឃាត់ខ្លួន ជនសង្ស័យម្នាក់ ឈ្មោះ អេង ឡុង ភេទប្រុស អាយុ៥៣ឆ្នាំ ជាសមាជិកក្រុមប្រឹក្សាឃុំស្ទឹងកាច់ រស់នៅភូមិអូរបេង ឃុំស្ទឹងកាច់ ស្រុកសាលាក្រៅ ខេត្តប៉ៃលិន។
លោកបន្តទៀតថា ជនរងគ្រោះឈ្មោះ គង់ ស្រី ភេទស្រី អាយុ៥៩ឆ្នាំ ជាមេភូមិអូររអិល រស់នៅភូមិអូររអិល ឃុំស្ទឹងកាច់ ស្រុកសាលាក្រៅ ខេត្តប៉ៃលិន។ ក្រោយពីការសួរនាំជនសង្ស័យ បានទទួលស្គាល់ និងសារភាពថា ខ្លួនបានទទួលប្រាក់ពីឈ្មោះ គង់ ស្រី ចំនួន ៨៩.៥០០ដុល្លារ (ប្រាំបីម៉ឺនប្រាំបួនពាន់ប្រាំរយដុល្លារសហរដ្ឋអាមេរិចគត់) ស្មើចំនួន៤៩នាក់ ដើម្បីរត់ការចូលក្របខណ្ឌនគរបាល ខេត្តប៉ៃលិន។ ចំពោះប្រាក់ទាំងអស់នោះ ជនសង្ស័យបានយកទៅលេងល្បែង និងផឹកស៊ីអស់រលីងទៅហើយ។
លោកបញ្ជាក់ថា កាលពីឆ្នាំ២០១៦ កន្លងមក មានឪពុកម្តាយសិស្ស និងនិស្សិតនៅទូទាំងខេត្តប៉ៃលិន និងខេត្តផ្សេងៗទៀត ជិត៥០នាក់ ចង់ឱ្យកូនប្រុសស្រីរបស់ខ្លួនចូលធ្វើមន្ត្រីនគរបាលខេត្តប៉ៃលិន ហើយក៏ទាក់ទងទៅមេភូមិអូររអិលឈ្មោះ គង់ ស្រី ហើយមេភូមិក៏បានយកប្រាក់ពីសិស្សទាំងអស់នោះម្នាក់ៗ ចំនួន១.៨០០ដុល្លារ សរុបទាំងអស់ចំនួន៨៨.២០០ដុល្លារ យកទៅប្រគល់ជូនជនសង្ស័យខាងលើ ដើម្បីរត់ការឱ្យកូនៗរបស់ពួកគេចូលធ្វើមន្ត្រីនគរបាល។ បន្ទាប់ពីទទួលលុយរួច ជនសង្ស័យមិនបានយកទៅ រត់ការអ្វីនោះទេ គឺយកទៅលេងល្បែងកាស៊ីណូ និងជួបជុំមិត្តភក្តិផឹកស៊ីអស់រលីង។ ចំណែកការងារធ្វើជា មន្ត្រីនគរបាលក៏អត់បាន លុយក៏អស់ ទើបគេប្តឹងឱ្យចាប់ឃាត់ខ្លួនបញ្ជូនទៅតុលាការខេត្តតែម្តង៕
ចែករំលែកព័តមាននេះ