ខេត្តកំពង់ចាម ៖ ឃាតកលាក់មុខពិតជាសាហាវដោយបានឆក់យកអាយុជីវិតរបស់ប្រជាពលរដ្ឋ២នាក់ និងរងរបួសចំនួន២នាក់ នៅក្នុងហេតុការណ៏គ្រោះថ្នាក់ចរាចរណ៏ដែលបានកើតឡើងនៅលើផ្លូវជាតិលេខ៦ ក្នុងឃុំបាធាយ និងឃុំផ្អាវ ស្រុកបាធាយ នារសៀលថ្ងៃទី០៨ ខែតុលា ឆ្នាំ២០១៨ ហើយអ្នករងរបួសត្រូវបានគេបញ្ជូនមកសង្គ្រោះនៅ មន្ទីរពេទ្យបង្អែកស្រុកផងដែរ ។
តាមប្រភពពីលោកវរសេនីយ៏ត្រី សុខ សូល អធិការរងនគរបាលស្រុកបាធាយ ទទួលផែនសណ្តាប់ធ្នាប់ប្រាប់ថា ករណីគ្រោះថ្នាក់ចរាចរណ៏នេះបានកើតឡើងនៅវេលាម៉ោង៣និង៣៥នាទីរសៀល ថ្ងៃខាងលើ
ត្រង់ចំណុចខាងជើងស្ពានលេខ៣១ ក្នុងភូមិបាធាយ ឃុំបាធាយ ស្រុកបាធាយ ដោយម៉ូតូម៉ាក C 125
ពណ៌ខ្មៅ ពាក់ផ្លាកលេខ កណ្តាល 1X-7965 បើកបរដោយឈ្មោះ សាំង គឹមសៀន ភេទប្រុស អាយុ២៥
ឆ្នាំ នៅភូមិព្រែកអញ្ចាញ ឃុំព្រែកថ្មី ស្រុកមុខកំពូល ខេត្តកណ្តាល ដោយមានឌុបមនុស្សចំនួន៣នាក់បានជិះទៅបុកគោយន្តកន្ត្រៃ ពីខាងក្រោយក្នុងទិសដៅពីត្បូងទៅជើងទិសដៅស្របគ្នា ។
លោកវរសេនីយ៏ត្រី សុខ សូល អធិការរងនគរបាលស្រុកបាធាយប្រាប់បន្តថា ហេតុការណ៏នេះបណ្តាលឲ្យអ្នកបើកបរម៉ូតូស្លាប់២នាក់ ចំណែកអ្នករងរបួស២នាក់វិញមានទី១-ឈ្មោះ ផល សុខលាភ ភេទប្រុស អាយុ២៣ឆ្នាំ នៅភូមិព្រែកអញ្ចាញ ឃុំព្រែកថ្មី ស្រុកមុខកំពូល ខេត្តកណ្តាល និងទី២-ឈ្មោះ រ៉ន រុន ភេទប្រុស អាយុ២៣ឆ្នាំ នៅភូមិជាមួយគ្នា ។
មូលហេតុគ្រោះថ្នាក់នេះដោយសារតែអ្នកបើកបរម៉ូតូខ្វះការប្រុងប្រយ័ត្ន ទើបបណ្តាលឲ្យទៅបុកគោយន្តពីក្រោយ ហើយអ្នកបើកបរគោយន្តឈ្មោះ ធន់ ពៅ ភេទប្រុស អាយុ២៩ឆ្នាំ នៅភូមិទួលដំណាក់ ឃុំចុងដូង ស្រុកបាធាយ ខេត្តកំពង់ធំ មិនរងរបួសនោះទេក្នុងហេតុការណ៏គ្រោះថ្នាក់ចរាចរណ៏នេះ ៕
ចែករំលែកព័តមាននេះ