ខេត្តព្រៃវែង ៖ ផ្ទះទិញលក់អេតចាយចំនួន២ខ្នង ដែលសាងសង់អំពីឈើប្រក់ស័ង្កសី ខាងក្រោមថ្ម ត្រូវបានព្រះអគ្គីឆាបឆេះអស់ទាំងស្រុង ក្នុងរយៈពេលតែជាងកន្លះម៉ោងប៉ុណ្ណោះ ។ ហេតុការណ៍នេះបានកើតឡើងកាលពីវេលាម៉ោង៦និង៤០នាទីព្រឹក ថ្ងៃទី៨ តុលា នេះនៅចំណុចកែងផ្លូវបេតុងជួរមាត់ទន្លេ ក្នុងភូមិ៦ ឃុំព្រែកខ្សាយ(ខ) ស្រុកពាមរក៍ ខេត្តព្រៃវែង និងបានធ្វើអោយមានការភ្ញាក់ផ្អើល ដល់ប្រជាពលរដ្ឋ ដែលនៅជុំវិញកន្លែងកើតហេតុ រត់ចែកជើងគ្នាទាំងព្រលឹងចុងសក់តែទោះជាយ៉ាងណា ហេតុការណ៍នេះមិនបានបណ្តាលអោយនរណាម្នាក់រងរបួសឡើយ ។
សមត្ថកិច្ចបានអោយដឹងថា ផ្ទះទី១ជាប្រភេទផ្ទះឈើប្រក់សង្ក័សី ទំហំ៤ x ៧ម៉ែត្រ មានម្ចាស់ឈ្មោះ ង្វៀង យ៉ាំងបាវ ភេទស្រី អាយុ៤៩ឆ្នាំ រងការខូចខាតទាំងស្រុង, ផ្ទះទី២ជាប្រភេទផ្ទះឈើខាងលើ និងខាងក្រោមថ្ម ទំហំ៥ x ៧ម៉ែត្រ មានម្ចាស់ឈ្មោះ កាវ យ៉ាំងហាក់ អាយុ៦៥ឆ្នាំ រងការខូចខាតទាំងស្រុង ។
ប្រភពដដែលនេះបានបញ្ជាក់ថា អគ្គីភ័យនេះសមត្ថកិច្ចបានប្រើឡានទឹកបាញ់ទឹកពន្លត់អស់ចំនួ២ឡាន និងប្រើរយៈពេលអស់ជាងកន្លះម៉ោង ទើបភ្លើងត្រូវបានពន្លត់ជាស្ថាពរ ចំណែកមូលហេតុដែលបណ្តាលអោយកើតមានអគ្គីភ័យនេះឡើង គឺដោយសារតែម្ចាស់ផ្ទះឈ្មោះ ង្វៀង យ៉ាំងបាវ ដាក់ឆ្នាំងដាំទឹកក្នុងផ្ទះ ហើយដើរចោលទើបធ្វើអោយភ្លើងឆាបឆេះកើតជាអគ្គីភ័យបែបនេះ ។ ទោះជាយ៉ាងណា អគ្គីភ័យនេះមិនបានបណ្តាលអោយមាននរណាម្នាក់រងរបួសនោះទេ រីឯចំនួននៃការខូចខាត នៅមិនទាន់អាចសន្និដ្ឋានបានទេ ៕
ចែករំលែកព័តមាននេះ