រាជធានីភ្នំពេញ ៖ ជាកាដូមួយសម្រាប់បុណ្យភ្ជុំបិណ្ឌនេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានសម្រចបន្ថែម៥ដុល្លារ លើតួលេខបោះឆ្នោត ដោយក្រុមប្រឹក្សាការងារ ១៧៧ដុល្លារ ដែលធ្វើឱ្យប្រាក់ឈ្នួលអប្បបរមារបស់កម្មករនិយោជិតក្នុងវិស័យកាត់ដេរសំលៀកបំពាក់ និងស្បែកជើងកើនដល់១៨២ដុល្លារ សម្រាប់ឆ្នាំ២០១៩ ។
នេះបើតាមសេចក្តីប្រកាសរបស់ក្រសួងការងារ និងបណ្តុះបណ្តាលវិជ្ជាជីវៈនៅថ្ងៃនេះ ។ ការប្រកាសរបស់ក្រសួងការងារ និងបណ្តុះបណ្តាលវិជ្ជាជីវៈ អំពីចំនួនប្រាក់ឈ្នួលអប្បបរមា ១៨២ដុល្លារសហរដ្ឋអាមេរិក ដែលត្រូវបានដំឡើងជូនកម្មករនៅឆ្នាំក្រោយនេះ (២០១៩) បានធ្វើឡើងបន្ទាប់ពីគណៈកម្មការប្រឹក្សាការងារដែលរួមមានរាជរដ្ឋាភិបាលសហជីព និងនិយោជក បើកកិច្ចប្រជុំចុងក្រោយមួយនៅរសៀលថ្ងៃទី០៥ ខែតុលា ឆ្នាំ២០១៨ ដើម្បីបោះឆ្នោតជ្រើសរើសយកតួលេខមួយធ្វើជាគោល ក្នុងនោះសន្លឹកឆ្នោតភាគច្រើនបានបោះឆ្នោតជ្រើសរើសយកតួលេខ១៧៧ដុល្លារ ហើយបន្ទាប់មកសម្តេចតេជោ ហ៊ុន សែន បានផ្តល់អនុសាសន៍ដោយបន្ថែម៥ដុល្លារទៀត ជូនកម្មករ ដែលធ្វើឱ្យប្រាក់ឈ្នួលពួកគេកើនឡើង១៨២ដុល្លារ នៅឆ្នាំក្រោយនេះតែម្តង ។
បើតាមសេចក្តីប្រកាសរបស់ក្រសួងការងារប្រាក់ឈ្នួលអប្បបរមា១៨២ដុល្លារនេះនឹងចាប់ផ្តើមដំឡើងចាប់ពីថ្ងៃទី១ ខែមករា ឆ្នាំ២០១៩តទៅ ។ ប្រាក់ឈ្នួលអប្បបរមារបស់កម្មករនិយោជិត ក្នុងវិស័យកាត់ដេរសំលៀកបំពាក់ និងស្បែកជើងសម្រាប់ឆ្នាំ២០១៩នេះ មានការកើនឡើង១២ដុល្លារ បើធៀបនឹងឆ្នាំ២០១៨ ដែលប្រាក់ឈ្នួលរបស់កម្មករមានត្រឹម១៧០ដុល្លារប៉ុណ្ណោះ ៕
ចែករំលែកព័តមាននេះ