ខេត្តបន្ទាយមានជ័យ ៖ ជនសង្ស័យ៤នាក់បងប្អូនបង្កើតដែលជាប់ពាក់ព័ន្ធករណីឃាតកម្មព្រួតវាយ និងចាក់សម្លាប់ពលករខ្មែរដូចគ្នា នៅក្រុងបាងកក ប្រទេសថៃ កាលពីយប់ថ្ងៃទី២៩ កញ្ញាឆ្នាំ២០១៨ ពេលនេះត្រូវបែកធ្លាយព័ត៌មានបន្ថែម តាមពិតគ្រួសារជនដៃដល់សុទ្ធតែជាប់ពាក់ព័ន្ធករណីឃាតកម្មសម្លាប់គេទាំងនៅស្រុកខ្មែរ…
ខេត្តបន្ទាយមានជ័យ ៖ ជនសង្ស័យ៤នាក់បងប្អូនបង្កើតដែលជាប់ពាក់ព័ន្ធករណីឃាតកម្មព្រួតវាយ និងចាក់សម្លាប់ពលករខ្មែរដូចគ្នា នៅក្រុងបាងកក ប្រទេសថៃ កាលពីយប់ថ្ងៃទី២៩ កញ្ញាឆ្នាំ២០១៨ ពេលនេះត្រូវបែកធ្លាយព័ត៌មានបន្ថែម តាមពិតគ្រួសារជនដៃដល់សុទ្ធតែជាប់ពាក់ព័ន្ធករណីឃាតកម្មសម្លាប់គេទាំងនៅស្រុកខ្មែរ និងលើទឹកដីថៃ ។
គួរបញ្ជាក់ថា ជនសង្ស័យ៤នាក់ទី១- ឈ្មោះ រ័ក្ស ហៅរ៉ី ទី២-ឈ្មោះ រ៉ា ទី៣- ឈ្មោះរ៉ូ ទី៤-ឈ្មោះ រាជ ដែលកាលពីយប់ថ្ងៃទី២៩ កញ្ញា បាននាំបងប្អូនទៅព្រួតវាយ និងចាក់ពលករខ្មែរ២នាក់ ដូចគ្នាឲ្យរងរបួសធ្ងន់ និងស្លាប់ម្នាក់ នៅឯក្រុងបាងកក ដោយសាររឿងគំនុំចាស់ កាលពី៥ឆ្នាំមុន ។
ជនរងគ្រោះក្នុងករណីនេះម្នាក់ឈ្មោះ យួន មិត ភេទប្រុស អាយុ៤១ឆ្នាំ ជាមេការសំណង់ និងមានទីលំនៅភូមិងេកងក ឃុំបន្ទាយចក្រី ស្រុកព្រះស្តេច ខេត្តព្រៃវែង (ស្លាប់) និងម្នាក់ឈ្មោះរឹទ្ធ ភេទប្រុស ជាអ្នកខេត្តព្រៃវែង (របួសធ្ងន់) ។
សពជនរងគ្រោះត្រូវបានគេបញ្ជូនមកកម្ពុជាតាមច្រកទ្វារអន្តរជាតិប៉ោយប៉ែត កាលពីព្រលប់ថ្ងៃទី០១ តុលានេះ ប្រគល់ឲ្យសាច់ញាតិ ដើម្បីយកទៅធ្វើបុណ្យនៅភូមិថ្មសិន ឃុំកូប ស្រុកអូរជ្រៅ ខេត្តបន្ទាយមានជ័យ (ផ្ទះប្រពន្ធសព) ។ ក្រោយការចុះផ្សាយលើគេហទំព័រព័ត៌មាន និងកាសែតក៏ដូចជា ទូរទស្សក្នុងស្រុកចំពោះឃាតកម្មលើទឹកដីថៃនេះ ស្រាប់តែមានបណ្តាញសង្គមហ្វេសប៊ុកមួយចំនួនបានបង្ហោះសារប្រាប់បន្ថែមថា ការពិតជនសង្ស័យខាងលើមិនត្រឹមជាប់ពាក់ព័ន្ធជាឃាតករសម្លាប់គេលើទឹកដីថៃទេ ថែមទាំងសម្លាប់បុរសម្នាក់នៅភូមិទទឹងឃុំក្បាលត្រាច ស្រុកក្រគរ ខេត្តពោធិ៍សាត កាលពីឆ្នាំ២០១៧ ម្នាក់ផងដែរ ។
ប្រភពថា ករណីឃាតកម្មសម្លាប់នៅខេត្តពោធិ៍សាត់នោះ សូម្បីឪពុកម្តាយជនសង្ស័យក៏ត្រូវបានសមត្ថកិច្ចចាប់ខ្លួនប្រគល់ឲ្យតុលាការផ្តន្ទាទោសរួចហើយ គឺជាអ្នកបញ្ជាឲ្យកូនៗកាប់សម្លាប់ជនរងគ្រោះយ៉ាងព្រៃផ្សៃ ។ ប្រភពថា ក្រោយកើតហេតុជនសង្ស័យទាំង៤នាក់ គេចខ្លួនទៅធ្វើការនៅប្រទេសថៃ លុះមានករណីឃាតកម្មសម្លាប់ជនរងគ្រោះជាលើកទី២ ទើបបែកធ្លាយថា គ្រួសារជនសង្ស័យសុទ្ធតែជាប់ពាក់ព័ន្ធអំពើឃាតកម្មសម្លាប់មនុស្សជាបន្តបន្ទាប់ហើយពេលនេះសមត្ថកិច្ចប្រម៉ាញ់ចាប់ខ្លួនផងដែរ ។
ករណីឃាតកម្មនៅខេត្តពោធិ៍សាត់នេះត្រូវបានឈ្មោះ ម៉ៃ ពន្លក ភេទប្រុស អាយុ២៥ឆ្នាំ បម្រើការងារនៅហាងលក់ទូរស័ព្ទដៃមួយកន្លែង ក្នុងផ្សារក្រគរ ខេត្តពោធិ៍សាត់ ប្រាប់តាមទូរស័ព្ទថា កាលពីថ្ងៃទី១៨ មេសា ឆ្នាំ២០១៧ បងប្រុសបង្កើតរបស់ខ្លួនឈ្មោះ ម៉ៃ សាម៉េន អាយុ៣៧ឆ្នាំ ត្រូវបានជនសង្ស័យឈ្មោះ រ៉ែន រ័ក្ស ហៅរ៉ី, រ៉ែន រ៉ា ,រ៉ែន រ៉ូ និងរ៉ែន រាជ ព្រួតវាយ និងកាប់រហូតដល់ស្លាប់នៅភូមិទទឹងឃុំក្បាលត្រាច ស្រុកក្រគរ ខេត្តពោធិ៍សាត់ ដោយមិនដឹងរឿង ។
បុរសខាងលើបន្តថា ក្នុងករណីឃាតកម្មនេះឱពុកម្តាយជនដៃដល់ក៏ត្រូវបានសមត្ថកិច្ចចាប់ខ្លួនផងដែរ ក្រោយកើតហេតុពាក់ព័ន្ធករណីជាអ្នកបញ្ជាកូនប្រុសទាំង៤នាក់ឲ្យកាប់ជនរងគ្រោះ ។ បុរសរូបនេះបន្តថា មុនកើតហេតុមានករណីវិវាទមួយកើតឡើងរវៀងអ្នកដទៃជាមួយគ្រួសារឃាតករនេះ ប៉ុន្តែក្រោយកើតហេតុគ្រួសារជនសង្ស័យចេះតែនិយាយដៀមដាម លុះជនរងគ្រោះទ្រាំមិនបានតបតមួយប្រាវ ស្រាប់តែត្រូវគ្រួសារឃាតករព្រួតគ្នាវាយកាប់ជនរងគ្រោះ រហូតដល់ស្លាប់ក្នុងថ្លុកឈាមតែម្តង ។
ករណីចោទប្រកាប់ខាងលើលោកមេប៉ុស្តិរដ្ឋបាលឃុំក្បាលត្រាច និងអធិការនគរបាលស្រុកក្រគរ មិនអាចទាក់ទងសុំការបំភ្លឺបានទេ ព្រោះមិនស្គាល់លេខទូរស័ព្ទ ។ យ៉ាងណាក៏ដោយករណីឃាតកម្មទាំង២ខាងលើសាច់ញាតិសពបានអំពាវនាវសុំឲ្យក្រសួងពាក់ព័ន្ធ ពិសេសរាជរដ្ឋាភិបាលកម្ពុជាមេត្តាសហការណ៍ជាមួយភាគីថៃធ្វើយ៉ាងណាតាមប្រម៉ាញ់ឃាត់ខ្លួនជនសង្ស័យទាំង៤នាក់យកទៅផ្តន្ទាទោសតាមផ្លូវច្បាប់ផង ៕
ចែករំលែកព័តមាននេះ