ខេត្តកំពង់ឆ្នាំង ៖ ថវិកាចំនួន១០ម៉ឺនរៀលដែលជាអំណោយរបស់សប្បុរសជននៅរាជធានីភ្នំពេញត្រូវបានភ្នាក់ងារ កោះសន្តិភាព យកទៅប្រគល់ជូនលោកយាយអាយុ៨០ឆ្នាំដែលកំពុងតែរស់នៅឯកោរក្នុងខ្ទមកំសត់ ស្ថិតក្នុងវត្តខ្សាម ក្នុងសង្កាត់ខ្សាម ក្រុងកំពង់ឆ្នាំង កាលពីរសៀលថ្ងៃទី៣ ខែតុលា ឆ្នាំ២០១៨ ។ អំណោយនេះគឺស្របពេលរដូវបុណ្យដាក់បិណ្ឌ និងភ្ជុំបិណ្យ ដែលអាចអោយលោកយាយបានម្ហូបអាហារឆ្ងាញ់ក្នុងឱកាសបុណ្យទាននេះផងដែរ ។
ថវិកាខាងលើនេះគឺជារបស់សប្បុរសជនគឺលោក សេង គី អាជីវករលក់ទាខ្វៃនៅផ្សារច្បារអំពៅ រាជធានីភ្នំពេញ ។ លោក សេង គី និងក្រុមគ្រួសារ គឺជាសប្បុរសជនមួយរូបក្នុងការផ្ដល់ជំនួយមនុស្សធម៌ជាញឹកញាប់តាមរយៈសារព័ត៌មាន កោះសន្តិភាព ដល់ជនទុរគតជន គ្រួសារទីទាល់ក្រ ជនចាស់ជរា ស្ត្រីមេម៉ាយក្រីក្រ និងកុមារកំព្រាជាដើម ។
អំណោយខាងលើនេះត្រូវបានប្រគល់ជូនលោកយាយ ឈឿង ហុង អាយុ៨០ឆ្នាំ បច្ចុប្បន្នស្នាក់នៅក្នុងខ្ទមមួយក្នុងវត្តខ្សាម ។ លោកយាយកាលពីសង្គមចាស់គាត់មានប្តី និងមានកូនចំនួន២នាក់ រស់នៅជិតវត្តយាយទេព ក្នុងសង្កាត់ផ្សារឆ្នាំងបច្ចុប្បន្ន ។ ប៉ុន្ដែនៅក្នុងសម័យ ប៉ុល ពត ប្ដីរបស់លោកយាយ រួមទាំងកូន២នាក់ទៀត ត្រូវបានសម្លាប់ដោយទាហានខ្មែរក្រហមអស់ទៅហើយ ។
ក្រោយសម័យ រំដោះឆ្នាំ១៩៧៩ លោកយាយបានរស់នៅឯកោតែម្នាក់ឯង គ្មានកូន គ្មានប្តី ។ លុះជីវិតចុងក្រោយរបស់លោកយាយកាន់តែចាស់ នៅឆ្នាំ២០០៨ លោកយាយបានមកសុំព្រះសង្ឃ ក្នុងវត្តខ្សាម សង់ខ្ទមមួយរស់នៅ ក្នុងវត្តខ្សាមដើម្បីបានសមាទានសីល ជ្រកក្រោមម្លប់ព្រះធម៌ និងបានទទួលទានអាហារ ក្នុងវត្ត ក្នុងជីវិតចុងក្រោយរបស់លោកយាយ ។ បច្ចុប្បន្នលោក យាយមានស្មារតីមិនសូវល្អប៉ុន្មាននោះទេ ភ្លេចភ្លាំងច្រើន។
ក្នុងពេលទទួលអំណោយនោះដែរ លោកយាយក៏បានជួបម្ចាស់អំណោយគឺលោក សេង គី តាមរយៈទូរស័ព្ទដោយលោកយាយបានថ្លែងអំណរគុណដល់សប្បុរសជន និងសូមបួងសួងដល់វត្ថុស័ក្ដិសិទ្ធិក្នុងលោកសូមជួយបីបាច់ថែរក្សាលោក សេង គី និងក្រុមគ្រួសារ សូមជួបតែសុភមង្គល រកស៊ីមានបាន និងពុទ្ឋពរ ៤ ប្រការទៀត គឺអាយុៈ វណ្ណៈ សុខៈ និង ពលៈកុំបីឃ្លាងឃ្លាតឡើយ ៕
ចែករំលែកព័តមាននេះ