ខេត្តពោធិ៍សាត់៖ ផ្ទះប្រជាពលរដ្ឋចំនួន៦ខ្នង ខ្លះរបើកដំបូល ខ្លះធ្លាក់ពីលើជើងតាង និងខ្លះទៀតរលំរាបដល់ដី ដោយសារឥទ្ធិពលនៃខ្យល់កន្ត្រាក់កាលពីវេលាម៉ោង៤និង៣០នាទីទៀបភ្លឺថ្ងៃទី៤ ខែតុលា ឆ្នាំ២០១៨ នៅភូមិទួលរគាំង ឃុំអូរតាប៉ោង ស្រុកបាកាន ខេត្តពោធិ៍សាត់។ ក្នុងហេតុការណ៍នេះក៍បានធ្វើឲ្យមនុស្សចំនួន៣នាក់រងរបួសធ្ងន់ និងស្រាលផងដែរ។
អាជ្ញាធរមូលដ្ឋានឲ្យដឹងថា កាលពីចន្លោះម៉ោងប្រមាណ៤ទៅ៥ទៀបភ្លឺថ្ងៃទី៤ ខែតុលា ឆ្នាំ២០១៨ នៅឃុំអូរតាប៉ោង ស្រុកបាកាន មានភ្លៀងមួយមេយ៉ាងធំលាយឡំដោយផ្លេកបន្ទោរ ខ្យល់បោកបក់ និងផ្គរលាន់យ៉ាងកក្រើកដីគួរឲ្យភ័យខ្លាចដល់ប្រជាពលរដ្ឋដែលកំពុងដេកលង់លក់នៅក្នុងផ្ទះ ។
ភ្លៀងប្រហែលតែកន្លះម៉ោងប៉ុណ្ណោះក៍រលឹមជាប់រហូតដល់ភ្លឺ ព្រមទាំងបានបង្កជាខ្យល់កន្ត្រាក់បំផ្លាញផ្ទះប្រជាពលរដ្ឋអស់ចំនួន៦ខ្នងទៀតផង។ អាជ្ញាធរឲ្យដឹងទៀតថា ផ្ទះទាំង៦ខ្នងនេះធ្វើអំពីឈើ ប្រក់ក្បឿង ប្រក់សង្កសី មានទំហំ១០ម៉ែត្រគុណនឹង១៥ម៉ែត្រ និង៤ម៉ែត្រគុណនឹង៦ម៉ែត្រ ខ្លះទ្រេត ខ្លះធ្លាក់ពីលើជើងតាង និងខ្លះទៀតរបើកដំបូលខូចខាតទាំងស្រុង។
ជាមួយគ្នានេះបានធ្វើឲ្យមនុស្សចំនួន៣នាក់របួសបែកក្បាលដោយសារក្បឿងនិងឈើរនងផ្ទះធ្លាក់ត្រូវ។
ជនរងគ្រោះទាំង៣នាក់ខាងលើរួមមាន១-ឈ្មោះ សំ ឡី ភេទស្រី អាយុ៣៥ឆ្នាំ បានរបួសធ្ងន់ ២-ឈ្មោះ ដា ភូ ភេទប្រុស អាយុ១៤ឆ្នាំ បានរងរបួសធ្ងន់ និង៣-ឈ្មោះ សាន ភក្ត្រា ភេទប្រុស អាយុ២០ឆ្នាំ បានរងរបួសស្រាល)។ ជនរងគ្រោះទាំង៣នាក់រស់នៅភូមិឃុំកើតហេតុខាងលើ បច្ចុប្បន្នកំពុងសម្រាកព្យាបាលនៅមន្ទីរពេទ្យបង្អែកស្រុកបាកាន។
សព្វថ្ងៃនេះអាកាសធាតុមានការប្រែប្រួលខុសប្លែកពីធម្មតា ជាក់ស្ដែងមកដល់រដូវវស្សានេះហើយ កន្លែងខ្លះភ្លៀងធ្លាក់ជោគជាំ ឯកន្លែងខ្លះទៀតបែរជារាំងស្ងួតទៅវិញ ធ្វើឲ្យដំណាំស្រូវរបស់ប្រជាកសិករក្រៀមស្វិត តែបើមានភ្លៀងវិញបង្កជាខ្យល់កន្ត្រាក់បំផ្លាញផ្ទះប្រជាពលរដ្ឋនិង និងរន្ទះបាញ់មនុស្សស្លាប់ជាបន្តបន្ទាប់។ ដូច្នេះសូមបងប្អូនប្រជាពលរដ្ឋមានការប្រុងប្រយ័ត្នពេលមានភ្លៀងធ្លាក់ម្ដងៗ៕
ចែករំលែកព័តមាននេះ