ខេត្តប៉ៃលិន ៖ បន្ទាប់ពីកម្មករសំណង់ចំនួន៤នាក់ ក្នុងចំណោម៥នាក់ បានស្លាប់ដោយសារដាច់ខ្សែរ៉កធ្លាក់ពីលើអគារសណ្ឋាគារកំពស់៧ជាន់ ក្នុងចំណោម១២ជាន់ ដែលកំពុងតែសាងសង់ ស្ថិតនៅជាប់នឹងផ្លូវជាតិលេខ៥៧ ក្បែរច្រកទ្វារអន្តរជាតិព្រំ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ មានគេសង្ស័យថា មន្ទីរជំនាញអនុញ្ញាតិច្បាប់ឱ្យម្ចាស់ដីមួយចំនួនសាងសង់អគារនៅលើចំណីផ្លូវសាធារណ: ។
ប្រភពព័ត៌មានបានឱ្យដឹងថា នៅក្បែរច្រកទ្វារអន្តរជាតិព្រំកម្ពុជា-ថៃ ត្រូវបានគេសង្ស័យថា អាជ្ញាធរ និងមន្ទីរជំនាញសុរិយោដីខេត្តអនុញ្ញាតិច្បាប់ និងចេញប្លង់ឱ្យម្ចាស់ដីមួយចំនួនសាងសង់អគារធំៗនៅលើចំណីផ្លូវជាតិ ។ ប្រភពបន្តទៀតថា គេមានការព្រួយបារម្ភនៅថ្ងៃខាងមុខ បើសិនជាផ្លូវជាតិលេខ៥៧ ក្បែរច្រកទ្វារអន្តរជាតិព្រំខាងលើមានការរៀបចំធ្វើការអភិវឌ្ឍ និងពង្រីកបន្ថែមទៀត ដើម្បីឱ្យធំទូលាយគឺមិនអាចធ្វើទៅបាននោះទេ ព្រោះមានការចង្អៀតទាស់នឹងអគារដែលគេកំពុងសាងសង់ និងអគារដែលគេបានសាងសង់រួចរាល់អស់មកហើយ ដោយនៅគៀកនឹងចំណីផ្លូវជាហូរហែតែម្តង ព្រោះបើទុកផ្លូវធំខ្លាចវាចង្រៃ ។
ពាក់ព័ន្ធនឹងបញ្ហានេះ លោក សំ សារ៉េត អភិបាលស្រុកសាលាក្រៅ បានឱ្យដឹងថា ការសង់ អគារធំៗនៅក្បែរផ្លូវជាតិលេខ៥៧ ក្នុងភូមិផ្សារព្រំ មិនស្ថិតនៅលើចំណីផ្លូវនោះទេ ដោយពីមុនគឺនៅលើចំណីផ្លូវមែន តែដោយមានការសម្របសម្រួលពីលោក ហុក សុផល អតីតប្រធានមន្ទីរសុរិយោដីចាស់ ទើបបង្រួមផ្លូវឱ្យនៅតូចវិញ ហើយគេអាចធ្វើច្បាប់សង់អគារក្បែរនោះបាន ។ បើចង់ដឹងច្បាស់ជាងនេះ អាចទាក់ទងទៅអតីតប្រធានមន្ទីរសុរិយោដីខេត្ត ព្រោះកិច្ចការនេះផុតពីដៃរបស់លោកហើយ ។
ភ្នាក់ងារយើងបានទាក់ទងទៅលោក ហុក សុផល អភិបាលរងខេត្តប៉ៃលិន ដែលទើបនឹងតែងតាំងថ្មី និងជាអតីតប្រធានមន្ទីរសុរិយោដីខេត្តប៉ៃលិនដែរ តែបានបិទទូរស័ព្ទមិនអាចទាក់ទងបានឡើយ ។ ចំណែកលោក ហុង ពៅ ប្រធានស្តីទីនៃមន្ទីរសុរិយោដីខេត្តបានឱ្យដឹងដែរថា អគារទាំងអស់នៅក្បែរផ្លូវជាតិ ច្រកទ្វារអន្តរជាតិព្រំ គឺអត់មានសាងសង់នៅលើចំណីផ្លូវនោះទេ គេសុទ្ធតែមានច្បាប់ និងប្លង់ត្រឹមត្រូវអស់ហើយ ៕
ចែករំលែកព័តមាននេះ