ទីក្រុងសេអ៊ូល ៖ រដ្ឋមន្ត្រីពាណិជ្ជកម្ម របស់កូរ៉េខាងត្បូង លោក Kim Hyun-chong បាននិយាយកាលពីថ្ងៃចន្ទមកថា កូរ៉េខាងត្បូងនឹងផ្តោតសំខាន់លើកិច្ចខំប្រឹងប្រែងដើម្បីទទួលបានការអនុគ្រោះពន្ធពីសហរដ្ឋអាមេរិកលើយានយន្តដែលនាំចូល ខណៈដែលភាគីទាំងពីរបានចុះកិច្ចព្រមព្រៀងពាណិជ្ជកម្មជាផ្លូវការ ។
លោកបានមានប្រសាសន៍ដូចនេះ បន្ទាប់ពីត្រលប់ពីការធ្វើដំណើរទៅកាន់ទីក្រុងញូវយ៉កដើម្បីចុះហត្ថលេខាលើកិច្ចព្រមព្រៀងពាណិជ្ជកម្មទ្វេភាគីដែលមានឈ្មោះថា United States–Korea Free Trade Agreement (KORUS FTA ) ។ លោកបានស្នើដល់សហរដ្ឋអាមេរិកឲ្យអនុគ្រោះពន្ធដល់យានយន្តនាំចូលពីកូរ៉េខាងត្បូង ។
លោក Kim បាននិយាយថា ៖« ខណៈដែលពួកយើងឈ្វេងយល់ពីកង្វល់របស់សហរដ្ឋអាមេរិកលើវិស័យយានយន្តក្នុងកិច្ចព្រមព្រៀងKORUS FTAថ្មី ពួកយើងនឹងខិតខំប្រឹងប្រែងដើម្បីទទួលបានការអនុគ្រោះពីពន្ធយានយន្តអាមេរិកយោងទៅតាមកិច្ចព្រមព្រៀងនេះ » ។
លោក Kim បានឲ្យដឹងទៀតថា ក្រុមពាណិជ្ជកម្មរបស់លោកបានតាមដានស្ថានការណ៍ថ្មីៗយ៉ាងដិតដល់ក្នុងការចរចារវាងសហរដ្ឋអាមេរិក កាណាដា និងប្រទេសម៉ិកស៊ិកលើវិស័យយានយន្តដើម្បីស្វែងយល់ពីផលប៉ះពាល់ដល់ការខិតខំប្រឹងប្រែងរបស់កូរ៉េខាងត្បូងដើម្បីទទួលបានការអនុគ្រោះពន្ធនេះផងដែរ ។
ខណៈដែលប្រទេសទាំងពីរបានចុះហត្ថលេខាជាផ្លូវការលើកិច្ចព្រមព្រៀងពាណិជ្ជកម្មដែលបានធ្វើវិសោដនកម្មនេះ រដ្ឋាភិបាលកូរ៉េបានផ្ញើកិច្ចព្រមព្រៀងថ្មីទៅកាន់រដ្ឋសភានៅថ្ងៃអង្គារ និងស្នើឲ្យមានការផ្តល់សច្ចាប័នដើម្បីអាចចូលជាធរមាននៅខែមករាខាងមុខនេះ។
លោកបានបន្ថែមថា ៖« ខ្ញុំជឿជាក់ថារដ្ឋសភានឹងអនុញ្ញាត(កិច្ចព្រមព្រៀងនេះ)ព្រោះវាអាចជួយគ្រប់គ្រងទំនាក់ទំនងរវាងប្រទេសទាំងពីរបានដោយស្ថិតស្ថេរ »៕
ចែករំលែកព័តមាននេះ