ខេត្តពោធិ៍សាត់៖ បុរសម្នាក់ត្រូវរថយន្ដបុកយ៉ាងពេញទំហឹង បណ្ដាលឲ្យស្លាប់យ៉ាងអណោចអាធ័ម ពេលកំពុងធ្វើដំណើរបញ្ច្រាសទិសគ្នា។ ករណីគ្រោះថ្នាក់ចរាចរណ៍នេះបានកើតឡើងលើកំណាត់ផ្លូវជាតិលេខ៥ ចន្លោះគីឡូម៉ែតលេខ១៨៩ ១៩០ ស្ថិតក្នុងភូមិត្នោតទ្រេត សង្កាត់ផ្ទះព្រៃ ក្រុងពោធិ៍សាត់…
ខេត្តពោធិ៍សាត់៖ បុរសម្នាក់ត្រូវរថយន្ដបុកយ៉ាងពេញទំហឹង បណ្ដាលឲ្យស្លាប់យ៉ាងអណោចអាធ័ម ពេលកំពុងធ្វើដំណើរបញ្ច្រាសទិសគ្នា។ ករណីគ្រោះថ្នាក់ចរាចរណ៍នេះបានកើតឡើងលើកំណាត់ផ្លូវជាតិលេខ៥ ចន្លោះគីឡូម៉ែតលេខ១៨៩ ១៩០ ស្ថិតក្នុងភូមិត្នោតទ្រេត សង្កាត់ផ្ទះព្រៃ ក្រុងពោធិ៍សាត់ កាលពីវេលាម៉ោង៦និង៣០នាទីយប់ថ្ងៃទី២ ខែតុលា ឆ្នាំ២០១៨ ។
សមត្ថកិច្ចឲ្យដឹងថា ជនរងគ្រោះដែលស្លាប់ឈ្មោះ ញឹម ដាវីន ភេទប្រុស អាយុ២១ឆ្នាំ រស់នៅភូមិគក សង្កាត់ផ្ទះព្រៃ ក្រុងពោធិ៍សាត់ ។
សមត្ថកិច្ចឲ្យដឹងថា គ្រោះថ្នាក់ចរាចរណ៍នេះបង្កឡើងដោយរថយន្ដម៉ាកវីហ្គោ ពណ៌ខ្មៅពាក់ស្លាកលេខ ភ្នំពេញ ២R-៧៥៩៩ បើកបរមិនប្រកាន់ស្ដាំទៅបុកម៉ូតូម៉ាកវ៉េវអាល់ហ្វា ពណ៌ខៀវពាក់ស្លាកលេខ ពោធិ៍
សាត់ ១A-៥២៤៦ ដែលកំពុងធ្វើដំណើរក្នុងទិសដៅបញ្ច្រាសទិសគ្នា។
ទាក់ទិននឹងករណីគ្រោះថ្នាក់ចរាចរណ៍នេះសមត្ថកិច្ចឲ្យដឹងថា នៅយប់ថ្ងៃកើតហេតុនោះ គេឃើញរថយន្ដវីហ្គោធ្វើដំណើរក្នុងទិសដៅពីលិចទៅកើត ឯម៉ូតូធ្វើដំណើរពីកើតទៅលិច។ ពេលមកដល់កន្លែងកើតហេតុត្រង់ចំណុចខាងលិចទីស្នាក់ការនិងរដ្ឋាគយ(សាខាខេត្តពោធិ៍សាត់) ស្រាប់តែអ្នកបើកបររថយន្ដមិនប្រកាន់ស្ដាំ បានមកបុកអ្នកជិះម៉ូតូទាំងកម្រោលលាន់ដូចរន្ទះ បណ្ដាលឲ្យស្លាប់ភ្លាមៗនៅនឹងកន្លែងកើតហេតុ។ ភ្លាមៗនោះអ្នកបើកបររថយន្ដមិនស្គាល់អត្តសញ្ញាណ បានទុករថយន្ដនៅទីនោះហើយរត់គេចខ្លួនបាត់តែម្ដង។
បច្ចុប្បន្នសពបានប្រគល់ជូនក្រុមគ្រួសារដើម្បីយកទៅធ្វើបុណ្យតាមប្រពៃណី។ រថយន្ដរក្សាទុកនៅស្នងការដ្ឋាននគរបាលខេត្ត ចំណែកអ្នកបើកបររថយន្ត សមត្ថកិច្ចកំពុងស្រាវជ្រាវ ដើម្បីឃាត់ខ្លួនយកមកទទួលទោស និងដោះស្រាយតាមច្បាប់ ៕
ចែករំលែកព័តមាននេះ