ខេត្តប៉ៃលិន ៖ ប្រជាពលរដ្ឋមានការព្រួយបារម្ភយ៉ាងខ្លាំងចំពោះភូមិ-ឃុំមានសុវត្ថិភាព ខណៈឃើញសមត្ថកិច្ចចុះបង្ក្រាបគ្រឿងញៀនដូចភ្លៀងរលឹម ។ ប៉ុន្តែរហូតមកដល់ពេលនេះនៅមានករណីប្រើប្រាស់ និងជួញដូរគ្រឿងញៀនដដែល ។
ជាពិសេសការចាប់គ្រឿងញៀនគេតែងតែដឹងថា អ្នកមានលុយឆាប់ចេញទៅផ្ទះវិញ រីឯអ្នកអត់លុយជាប់គុកយូរបន្តិចហើយមេខ្លោងជួញដូរពិតប្រាកមិនធ្លាប់ចាប់បានពោលគឺរួចខ្លួនដដែល ។ ទោះបីសកម្មភាពចាប់គ្រឿងញៀនបានតិច ឬច្រើនពួកគាត់មិនយកចិត្តទុកដាក់មើលនោះទេតែអ្វីដែលពួកគាត់ព្រួយបារម្ភបំផុតគឺកូនចៅរបស់ខ្លួននៅតាមភូមិនានាដែលនាំគ្នាប្រើប្រាស់ ។
ជាក់ស្តែងមានហេតុការណ៍ចុះបង្ក្រាបគ្រឿងញៀនមួយ បានធ្វើឡើងកាលពីវេលាម៉ោង១ និង២០នាទី រសៀលថ្ងៃទី០១ ខែតុលា ឆ្នាំ២០១៨ ស្ថិតនៅចំណុចទល់មុខស្តង់ដំឡូងមីចិន ស្ថិតនៅជាប់នឹងព្រំប្រទល់ភូមិសួស្តី សង្កាត់អូរតាវ៉ៅ ក្នុងភូមិតាគ្រក់ ឃុំត្រែង ស្រុករតនៈមណ្ឌល ខេត្តបាត់ដំបង ។
ប្រភពព័ត៌មានបានឱ្យដឹងថា នគរបាលនៃអធិការក្រុងប៉ៃលិនបានហៅជនសង្ស័យ២នាក់ទៅធ្វើការសាកសួរ និងបានធ្វើតេស្តរកសារធាតុញៀនជាលទ្ធិផលរកឃើញមានផ្ទុកនូវសារធាតុទាំងអស់ទី១-ឈ្មោះ សឿន តុលា ហៅអាក្រវិលធំ ភេទប្រុស អាយុ២៩ឆ្នាំ មុខរបរមិនពិតប្រាកដ មានទីលំនៅបច្ចុប្បន្នភូមិក្រចាប់លើ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន, ទី២-ឈ្មោះ សឿម សុភ័ក្ត្រ ភេទប្រុស អាយុ២៦ឆ្នាំ ជាកសិករ មានទីលំនៅបច្ចុប្បន្នភូមិភ្នំដំបង សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។
ប្រភពបន្តទៀតថា ក្រោយមកនគរបាលបានស្នើសុំយោបល់ពីលោកព្រះរាជអាជ្ញានៃអយ្យការអមសាលាដំបូងខេត្តប៉ៃលិនដើម្បីពន្លាតទឹកដីដោយសហការជាមួយកម្លាំងជំនាញប្រឆាំងបទល្មើសគ្រឿងញៀននៃស្នងការដ្ឋាននគរបាលខេត្តប៉ៃលិន និងកម្លាំងនៃអធិការដ្ឋាននគរបាលស្រុករតនៈមណ្ឌលចុះឆែកឆេរបន្ទប់ជួលមួយកន្លែងបានរកឃើញម្សៅក្រាមពណ៌ស (ICE) ចំនួន៣កញ្ចប់ធំ នៅចំណុចគំនរសំរាមខាងក្រោយផ្ទះ និងសម្ភារៈសម្រាប់ជក់មួយចំនួនក្នុងបន្ទប់ហើយឃាត់ខ្លួនបានជនសង្ស័យម្នាក់ជាប្រពន្ធឈ្មោះ ម៉ង់ ស្រីលីស ភេទស្រី អាយុ៣០ឆ្នាំ ជាអ្នកលក់គុយទាវមានទីលំនៅបច្ចុប្បន្នទីកន្លែងកើតហេតុខាងលើ ចំណែកម្ចាស់ផ្ទះជាប្តីបានរត់គេចខ្លួនបាត់ស្រមោល ។
បច្ចុប្បន្នជនសង្ស័យទាំងអស់ខាងលើត្រូវបានជំនាញប្រឆាំងបទល្មើសគ្រឿងញៀននៃអធិការដ្ឋាននគរបាលក្រុងប៉ៃលិនធ្វើការសាកសួរ និងកសាងសំណុំរឿងបញ្ជូនទៅតុលាការឱ្យកាត់ទោសតាមនីតិវីធី ៕
ចែករំលែកព័តមាននេះ