ខេត្តប៉ៃលិន ៖ បុរសម្នាក់រងរបួសដៃឆ្វេងត្រូវបានមិត្តភក្តិដឹកបញ្ជូនទៅសង្គ្រោះនៅមន្ទីរពេទ្យបង្អែកខេត្ត ខណ:លេងបាល់ទាត់ជាមួយមិត្តភក្តិសុខៗ ស្រាប់តែឈ្លោះទាស់ទែងគ្នារឿងលេងបាល់ដោយប្រកែកគ្នាចុះឡើងៗក៏ទាញកាំបិតនៅក្បែរតារាងបាល់កាប់រងរបួសតែម្តង ។ ហេតុការណ៍កាប់ចាក់គ្នានៅលើបានកើតឡើងកាលពីវេលាម៉ោង៦និង៤៥នាទីល្ងាច ថ្ងៃទី០២ ខែកញ្ញា ឆ្នាំ២០១៨ ស្ថិតនៅចំណុចតារាងបាល់ទាត់ចំណានប៉ៃលិន ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ។
ប្រភពព័ត៌មានពីលោក សេម សុផល នាយប៉ុស្តិ៍នគរបាលឃុំស្ទឹងកាច់បានឱ្យដឹងថា ជនរងគ្រោះមាន ឈ្មោះ ស៊ឹម សារ៉ី ភេទប្រុស អាយុ៣២ឆ្នាំ រងរបួសដៃខាងឆ្វេង មានទីលំនៅក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។ ចំណែកជនសង្ស័យមានឈ្មោះ ឡុង ម៉េងហាវ ភេទប្រុស អាយុ១៩ឆ្នាំ រស់នៅភូមិអូពឺត សង្កាត់ទួលល្វា ក្រុងប៉ៃលិន ខេត្តប៉ៃលិន ដោយយកកាំបិតប៉័ងតោកាប់ទៅលើជនរងគ្រោះបណ្ដាលឱ្យរងរបួសតែម្តង ។
បើតាមប្រភពព័ត៌មានពីអ្នកលេងបាល់ទាត់ខាងលើបានឱ្យដឹងថា មុនពេលកើតហេតុគេឃើញក្រុមអ្នកលេងបាល់១ក្រុមមានគ្នាជាង១០នាក់បានចូលទៅលេងនៅក្នុងតារាងមួយមានយីហោ «ចំណានប៉ៃលិន» លុះបន្ទាប់ពីពួកគេនាំគ្នាលេងបានមួយសន្ទុះ ស្រាប់តែឈ្លោះប្រកែកទាស់ទែងគ្នា និងជេរគ្នាពេញតារាងបាល់តែម្តង ។ ក្រោយមកដោយសារតែជនដៃដល់ទប់កំហឹងមិនជាប់ក៏ទាញកាំបិតប៉័ងតោ ដែលស្ថិតនៅក្បែរតារាងបាល់ទាត់នោះដេញកាប់គ្នាបណ្តាលឱ្យចំបុរសម្នាក់រងរបួសតែម្តង ។
ពាក់ព័ន្ធនឹងបញ្ហានេះបច្ចុប្បន្នជនរងគ្រោះត្រូវបានសាច់ញាតិបញ្ជូនទៅសង្គ្រោះនៅមន្ទីរពេទ្យបង្អែកខេត្តប៉ៃលិនដើម្បីធ្វើការព្យាបាល រីឯជនសង្ស័យបានរត់គេចខ្លួនបាត់ស្រមោល ហើយនគរបាលកំពុងដុតដៃដុតជើងតាមស្វែងរកជនសង្ស័យមកផ្តន្ទាទោសតាមផ្លូវច្បាប់ ៕
ចែករំលែកព័តមាននេះ