រាជធានីភ្នំពេញ ៖ ក្នុងពេលដែលគណនេយ្យហ្វេសប៊ុកដែលបានប្រើប្រាស់ឈ្មោះ ខេមរៈ ស្រីពៅ បានបង្ហោះរូបភាព និងខ្លឹមសារផ្សេងៗជាបន្តបន្ទាប់នោះ បងប្រុសរបស់នាងលោក ខេមរៈ ភារុណ បានស្នើសុំឲ្យម្ចាស់អ្នកកាន់ផេកនោះបញ្ឈប់សកម្មភាពរបស់ខ្លួន ត្បិតប្អូនស្រីរបស់លោកមិនមែនជាអ្នកលេងនោះឡើយ។
ការប្រកាសរបស់លោក ខេមរៈ ភារុណ នាពេលនេះបានធ្វើឡើងបន្ទាប់ពីលោក ខេមរៈ សិរីមន្ត បានដាច់ចិត្តទម្លាយពីអការៈជំងឺរបស់ ខេមរៈ ស្រីពៅ ជាសាធារណៈស្រាយចម្ងល់មហាជនពីការបាត់ខ្លួនរបស់នាងពីសិល្បៈអស់ជាច្រើនឆ្នាំមកនេះ។
បើទោះបីជាគណនេយ្យហ្វេសប៊ុកនោះបានបង្ហោះរូបភាព និងខ្លឹមសារទៅកាន់អ្នកគាំទ្រ ដោយមិនមានសកម្មភាពខុសឆ្គងណាមួយក៏ដោយ ប៉ុន្តែលោក ខេមរៈ ភារុណ នៅតែសម្តែងក្តីបារម្ភដដែល ព្រោះវាអាចធ្វើឲ្យមានការភាន់ច្រឡំពីសំណាក់ប្រិយមិត្ត។
តាមរយៈសំណេរដែលលោក ខេមរៈ ភារុណ បានបង្ហោះនោះបញ្ជាក់ថា អ្នកកាន់ផេកនេះសូមកុំព្យាយាមលេងអី ព្រោះអ្នកមិនមែនជាគាត់ (ខេមរៈ ស្រីពៅ) នាំឱ្យមានការភាន់ច្រឡំយល់ច្រឡំពីសំណាក់បងប្អូន ។ លោកបញ្ជាក់ដោយខ្លីថា រហូតមកដល់ពេលនេះប្អូនស្រីរបស់លោកមិនមានផេកហ្វេសប៊ុកណាមួយក្នុងការប្រើប្រាស់នោះឡើយ។
ជាការកត់សម្គាល់តាមរយៈការអះអាងពីសំណាក់លោក ខេមរៈ ភារុណ នាពេលនេះគឺមានន័យថា រាល់ការបង្ហោះនូវខ្លឹមសារ និងសារផ្សេងៗនៅលើផេកហ្វេសប៊ុករបស់ ខេមរៈ ស្រីពៅ នោះ គឺមិនបានឆ្លុះបញ្ចាំងនូវអ្វីដែលជាបំណងពិតរបស់នាងនោះឡើយ។
ជាធម្មតានៅលើផេកហ្វេសប៊ុករបស់តារាចម្រៀង ខេមរៈ ស្រីពៅ គេតែងឃើញមានការបង្ហោះនូវរូបភាពសកម្មភាពក្នុងសិល្បៈរបស់នាងកន្លងទៅ និងថែមទាំងបន្ថែមនូវខ្លឹមសារមួយចំនួនស្តែងពីការនឹករលឹកដល់ប្រិយមិត្តគាំទ្រ ជាពិសេសក៏បានប្រកាសពីគោលបំណងនៃការវិលចូលសិល្បៈជាថ្មីរបស់នាងផងដែរ។ ខ្លឹមសារទាំងនោះបានបង្កឲ្យមានការភាន់ច្រឡំជាបន្តបន្ទាប់ ក្នុងពេលដែលគណនេយ្យហ្វេសប៊ុកមួយនេះ គឺមិនមែនជារបស់ ខេមរៈ ស្រីពៅ ជាអ្នកលេងពិតប្រាកដឡើយ។
យ៉ាងណាក៏ដោយ ក្នុងពេលដែលមានការបង្ហោះរូបភាព និងខ្លឹមសារនោះ ផេកមួយនេះក៏បានទទួលការចាប់អារម្មណ៍ច្រើនផងដែរ ពីអ្នកគាំទ្ររបស់ ខេមរៈ ស្រីពៅ ត្បិតពួកគេទាំងនោះមានការនឹករលឹក និងចង់ឲ្យនាងវិលមកកាន់ក្បាលមេក្រូច្រៀងឡើងវិញ បន្ទាប់ពីបាត់ដំណឹងអស់ជាច្រើនឆ្នាំ៕
ចែករំលែកព័តមាននេះ