ខេត្តបន្ទាយមានជ័យ ៖ មនុស្ស២នាក់បានស្លាប់ដោយសារគ្រោះថ្នាក់ចរាចរ២ករណីផ្សេងគ្នា ដែលកើតហេតុស្រុកអូរជ្រៅ និងក្រុងប៉ោយប៉ែត កាលពីថ្ងៃទី៣០ កញ្ញា ២០១៨ ។ ករណីទី១-បុរសអនាថាម្នាក់បានអង្គុយកណ្តាលផ្លូវដែកបណ្តាលឲ្យរថភ្លើងដែលបើកបរមកពីទិសខាង…
ខេត្តបន្ទាយមានជ័យ ៖ មនុស្ស២នាក់បានស្លាប់ដោយសារគ្រោះថ្នាក់ចរាចរ២ករណីផ្សេងគ្នា ដែលកើតហេតុស្រុកអូរជ្រៅ និងក្រុងប៉ោយប៉ែត កាលពីថ្ងៃទី៣០ កញ្ញា ២០១៨ ។
ករណីទី១-បុរសអនាថាម្នាក់បានអង្គុយកណ្តាលផ្លូវដែកបណ្តាលឲ្យរថភ្លើងដែលបើកបរមកពីទិសខាង
លិចបុកស្លាប់ កាលពីវេលាម៉ោង៩និង៣០នាទីព្រឹកថ្ងៃទី៣០ កញ្ញា នៅចំណុចភូមិសូរិយា ឃុំកូប ស្រុកអូរជ្រៅ។
សពត្រូវបានអាជ្ញាធរ និងសមត្ថកិច្ចដឹកយកទៅដាក់នៅបរិវេណវត្តមួយក្នុងឃុំកើតហេតុដើម្បីរងចាំក្រែងមានសាច់ញាតិមកទទួលយក។
ដោយឡែកករណីទី២-មនុស្សម្នាក់បានស្លាប់នៅនឹងកន្លែង និងមនុស្ស៣នាក់ទៀតបានរងរបួសស្រាល ដោយសាររថយន្តដឹកដីកៀម៉ូតូពេលកំពុងបត់ឆ្លងផ្លូវ កាលពីវេលារសៀលថ្ងៃទី៣០ កញ្ញា ត្រង់ចំណុចខាងកើតស្ថានីយដឹកអ្នកដំណើរស៊ូជីងប្រហែល៥០ម៉ែត្រ លើដងផ្លូវជាតិលេខ៥ ស្ថិតក្នុងភូមិអណ្តូងថ្មមាស សង្កាត់ផ្សារកណ្តាល ក្រុងប៉ោយប៉ែត ។
ជនរងគ្រោះទាំង៤នាក់រួមមាន ១-ឈ្មោះខុន ភក្ត្រា ភេទស្រី អាយុ១៦ឆ្នាំ ជាគ្រូបង្រៀននៅសាលាឯកជនអេលីហ្គែន ជាអ្នករួមដំណើរ បានស្លាប់ ២-ឈ្មោះសំ ស្រីទាវ ភេទស្រី អាយុ២១ឆ្នាំ ជាអ្នករួមដំណើរ បានរងរបួសស្រាល ៣-ឈ្មោះឌឿន ស្រីម៉ៅ ភេទស្រី អាយុ២៧ឆ្នាំ មុខរបរកម្មករសំណង់ ជាអ្នករួមដំណើរ បានរងរបួសស្រាល និង៤-ឈ្មោះម៉ៅ ស្រីអូន ភេទស្រីអាយុ២៩ឆ្នាំ ជាគ្រូបង្រៀសាលាឯកជនអេលីហ្គែន ជាអ្នកបើកបរម៉ូតូ បានរងរបួសស្រាល ។
សមត្ថកិច្ចជំនាញចរាចរក្រុងប៉ោយប៉ែតប្រាប់ថា មុនពេលកើតហេតុ ជនរងគ្រោះទាំង៤នាក់ ជិះម៉ូតូមួយគ្រឿងម៉ាកវ៉េវ ពណ៌ខៀវ គ្មានស្លាកលេខ បើកបរចេញពីអាហារដ្ឋានអូរខៃដន ពេលដល់ចំណុចផ្លូវជាតិលេខ៥ប្រុងបត់មកលិច ប៉ុន្តែដោយសាររថយន្តច្រើន ជនរងគ្រោះក៏បើកសសៀៗខាងឆ្វេងដៃ បន្ទាប់មកក៏ស៊ីញ៉ូបត់ងាករកស្តាំ លុះផុតគំនូសពាក់កណ្តាលទ្រូងផ្លូវស្រាប់តែត្រូវរថយន្តដឹកដីមួយគ្រឿងម៉ាកអុីណូ ពណ៌ស គ្មានស្លាកលេខ បើកបរក្នុងទិសដៅពីកើតទៅលិចកៀម៉ូតូជនរងគ្រោះបណ្តាលឲ្យដួល ហើយជនរងគ្រោះឈ្មោះខុន ភក្ត្រា ដែលរួមដំណើរបានធ្លាក់ខ្ទាតចូលកង់ក្រោយខាងស្តាំរថយន្ត បណ្តាលឲ្យកិនបែកក្បាលស្លាប់តែម្តង។
ក្រោយវាស់វែងនិងធ្វើកំណត់ហេតុ រថយន្ត និងម៉ូតូត្រូវបានសមត្ថកិច្ចនាំយកទៅរក្សាទុកនៅអធិការដ្ឋាននគរបាលក្រុងប៉ោយប៉ែតដើម្បីបន្តនីតិវិធី ។ ចំណែកសពត្រូវបានប្រគល់ឲ្យសាច់ញាតិដើម្បីយកទៅធ្វើបុណ្យតាមប្រពៃណី ៕
ចែករំលែកព័តមាននេះ