រាជធានីភ្នំពេញ៖ ឈុតតំណាងជាតិត្រូវបានបង្ហាញជាសាធារណៈហើយ សម្រាប់កញ្ញាឯកកម្ពុជា កញ្ញាកែវ សេងលីហួរ ក្នុងការប្រកួតបវរកញ្ញាផែនដីឆ្នាំនេះ ដែលនឹងប្រារព្ធធ្វើឡើងនាខែតុលា នៅឯទីក្រុងម៉ានីល ប្រទេសហ៊្វីលីពីន ។…
រាជធានីភ្នំពេញ៖ ឈុតតំណាងជាតិត្រូវបានបង្ហាញជាសាធារណៈហើយ សម្រាប់កញ្ញាឯកកម្ពុជា កញ្ញាកែវ សេងលីហួរ ក្នុងការប្រកួតបវរកញ្ញាផែនដីឆ្នាំនេះ ដែលនឹងប្រារព្ធធ្វើឡើងនាខែតុលា នៅឯទីក្រុងម៉ានីល ប្រទេសហ៊្វីលីពីន ។
បើយោងតាមការបង្ហោះលើផេកផ្លូវការរបស់បវរកញ្ញាផែនដីកម្ពុជា នាពេល ថ្មីៗនេះបានបង្ហាញជូននូវឈុតសម្លៀកបំពាក់ប្រពៃណីជាតិរបស់កញ្ញាឯកផែនដីកម្ពុជា២០១៨ កែវ សេងលីហួរ ។ កញ្ញាលីហួរ នឹងតំណាងព្រះរាជាណាចក្រកម្ពុជា ក្នុងការប្រកួតកញ្ញាឯកផែនដីឆ្នាំនេះ ដែលនឹងប្រារព្ធធ្វើឡើងនៅឯទីក្រុងម៉ានីល ប្រទេសហ៊្វីលីពីន ។
ទម្រង់បែបបទនៃការរចនាសម្លៀកបំពាក់ប្រពៃណីជាតិដ៏ប្រណីតនេះ រចនាឡើងដោយ Madam Botiques Amy ក្រោមប្រធានបទ «មាតាធម្មជាតិ»។ ការរចនាត្រូវបានគ្របដណ្តប់នូវអត្ថន័យដ៏ជ្រាលជ្រៅ ដែលផ្តោតសំខាន់ទៅលើនិមិត្តរូបនៃក្តីសង្ឃឹម និងការគោរពរបស់មនុស្សទូទាំងសាកល។
ឈុតសម្លៀកបំពាក់ដ៏ល្អប្រណីតនេះត្រូវបានបំផុសគំនិតដកស្រង់ចេញពីទម្រង់នៃរូបចម្លាក់ ដែលត្រូវបានចារលើផ្ទាំងសិលានៃប្រាសាទដ៏ល្បីល្បាញរបស់ព្រះរាជាណាចក្រកម្ពុជា ។ រួមបញ្ចូលជាមួយនឹងទ្រង់ទ្រាយក្បូរក្បាច់ដ៏ល្អអនេកនៃដើមឈើ ដែលត្រូវបានចារឆ្លាក់លើប្រាសាទអង្គរវត្ត ក៏ដូចជាទម្រង់នៃការរចនាតាំងពីក្រោយសម័យអង្គរ សតវត្សរ៍ទី១៥ បួករួមជាមួយគំនិតច្នៃប្រឌិតសហស្សសម័យនៃស្នាដៃកូនខ្មែរនាពេលបច្ចុប្បន្ននេះ បង្កើតចេញជាឈុត «មាតាធម្មជាតិ» នេះឡើង ។
បែបផែននៃការរចនាត្រូវបានប្រើប្រាស់នូវគំនិតកែច្នៃចេញពីវត្ថុធាតុដើមក្នុងស្រុក ដែលមានដូចជាសំពត់សូត្រ ផាមួង រួមជាមួយនិងការរចនាធ្វើដោយខ្មុក ដែលជាស្នាដៃរចនារបស់កូនខ្មែរយើងដែលមានជំនាញច្បាស់លាស់ ។
ពីក្មេងកំព្រាម្នាក់ ក្លាយជាទេពអប្សរនៃភពផែនដី ខ្សែជីវិតរបស់កញ្ញាឯកផែនដីកម្ពុជាឆ្នាំ២០១៨ កែវ សេងលីហួរ មានលក្ខណៈស្រដៀងគ្នាទៅនឹងសាច់រឿងនៃបទចម្រៀង Broadway «អានី» ដែរ ។ ខុសគ្នាត្រង់តែ មិនមានមហាសេដ្ឋី ណាមួយមកជួយសង្គ្រោះរូបកញ្ញា ចេញពីស្ថានការណ៍ដ៏លំបាកនេះទេ ។ ផ្ទុយទៅវិញគឺសេចក្តីស្រឡាញ់របស់ខ្លួនទៅលើវិស័យនៃការអប់រំ និង«ភាពស្រស់ស្អាត» ដែលបានជួយសង្គ្រោះកញ្ញា ។
កាលពីកុមារភាពកញ្ញា កែវ សេងលីហួរ ឬ លីហួរ (បើតាមគ្រួសារ និងមិត្តភក្តិរបស់កញ្ញាតែងហៅ) បានឲ្យដឹងថា ជីវិតរបស់នាងត្រូវបានកំណត់ប្រឈមទៅដោយបញ្ហា។
ដោយសារតែឪពុកម្ដាយរបស់កញ្ញាលីហួរ បានលាចាកលោកនៅមុនពេលដែលពួកគាត់អាចមើលថែទាំងរូបនាង ដូច្នេះនាងត្រូវធំដឹងក្តីឡើងនៅមណ្ឌលកុមារកំព្រា ដោយពឹងផ្អែកលើទឹកចិត្តសប្បុរសរបស់មនុស្សឯទៀត ។ កញ្ញាលីហួរបានរៀបរាប់ថា «ប្រសិនបើនឹកទៅដល់ការចងចាំដំបូងរបស់នាងខ្ញុំវិញ វាមិនមែនជាការចម្អិនម្ហូបរបស់អ្នកម្តាយ ឬក្តីស្រឡាញ់ដែលទទួលបានពីលោកឪពុកនោះឡើយ ។
នាងខ្ញុំមិនធ្លាប់ទទួលបានបទពិសោធន៍ទាំងនោះទេ ។ ការចងចាំពីកុមារភាពរបស់នាងខ្ញុំ គឺជីវិតនៅក្នុងមណ្ឌលកុមារកំព្រាមួយ ព្រោះនោះជាកន្លែងដែលនាងខ្ញុំធំដឹងក្តីឡើង» ។ តែរឿងរ៉ាវទាំងនោះមិនបានធ្វើឲ្យលីហួរ ទទួលរងតែភាពជូរចត់នៅក្នុងជីវិតនោះឡើយ ។ តាមពិតទៅកញ្ញាលីហួរតែងមានអារម្មណ៍ផ្ទុយមកវិញមួយថា វាជាបទពិសោធន៍ដែលធ្វើឱ្យនាងក្លាយជាបុគ្គលមួយរូបដូចសព្វថ្ងៃនេះ ។
«ការធំដឹងក្តីនៅក្នុងមណ្ឌលកុមារកំព្រា បានជួយនាងខ្ញុំឱ្យក្លាយជាមនុស្សសុភាពរាបសាម្នាក់ ។ ប្រសិនបើគ្មានជំនួយពីអ្នកដទៃ នាងខ្ញុំក៏មិនអាចបន្តទៅមុខបាននៅក្នុងជីវិតនេះឡើយ នោះហើយជាអ្វីដែលនាងខ្ញុំនឹងចងចាំក្នុងជីវិតទាំងមូលរបស់នាងខ្ញុំ ។ វាក៏បានធ្វើឱ្យនាងខ្ញុំមានភាពរឹងមាំផងដែរ ។ នាងខ្ញុំមិនធ្លាប់បានគិតទេថា នាងខ្ញុំនឹងមានការប្តេជ្ញាចិត្តនេះ ប្រសិនបើជីវិតមានភាពងាយស្រួលនោះ »។
លីហួរ ក៏បានរំលឹកផងដែរថា ជីវិតរបស់នាងនៅមណ្ឌលកុមារកំព្រា បាននាំខ្លួនឱ្យដឹងពីគុណតម្លៃនៃការអប់រំ និងសិល្បៈ ។ កញ្ញាបានរៀបរាប់ប្រាប់ថា “នៅឯមណ្ឌលក្មេងកំព្រា ពួកគាត់តែងបានផ្តល់ឱកាសឱ្យយើងរៀននូវភាសាអង់គ្លេស និងមុខវិជ្ជា ផ្សេងៗទៀត ។
នាងខ្ញុំក៏បានចាប់ផ្តើមរៀនសូត្រ ដោយបន្តចាប់ចិត្តស្រឡាញ់ទៅលើផ្នែកវប្បធម៌ និងសិល្បៈ ហើយជាពិសេសនោះគឺការរាំ ។ អ្វីៗទាំងអស់នេះ បានផ្តល់ជាក្តីសង្ឃឹមមួយដល់រូបនាងខ្ញុំ ក៏ដូចជាឱកាសក្នុងការបន្តប្រយុទ្ធក្នុងជីវិត»។
ដោយសារតែក្តីស្រឡាញ់របស់ខ្លួនទៅលើវប្បធម៌ និងសិល្បៈ ទីបំផុតកញ្ញាលីហួរបានចូលរួមប្រកួតបវរកញ្ញាកម្ពុជាឆ្នាំ២០១៧ ដែលជាព្រឹត្តិការណ៍មួយដែលរូបនាងផ្ទាល់បានចាត់ទុកថា ជាវេទិកាដ៏ល្អបំផុតសម្រាប់ការលើកកម្ពស់វិស័យសម្រស់ ។ កញ្ញាលីហួររៀបរាប់ប្រាប់ថា «នាងខ្ញុំបានសម្រេចចិត្តចូលរួមការប្រកួតបវរកញ្ញាកម្ពុជា ក៏ដោយសារតែ នេះជាការប្រកួតដ៏ធំបំផុតដែលផ្តោតទៅលើ សម្រស់ រួមទាំងវប្បធម៌របស់ខ្មែរយើង ។
នោះជាមូលហេតុមួយ ដែលនាពេលដែលនាងខ្ញុំទទួលជ័យលាភីលេខ២ នោះនាងខ្ញុំស្ទើរតែមិនជឿលើខ្លួនឯង ។ វាប្រៀបដូចជាក្តីសុបិនមួយ។ នាងខ្ញុំពិតជាសូមអរគុណយ៉ាងជ្រាលជ្រៅដល់អ្នកទាំងអស់គ្នា ដែលតែងតែគាំទ្ររូបនាងខ្ញុំ។ នាងខ្ញុំនឹងបន្តឲ្យអស់ពីសមត្ថភាព ដើម្បីធ្វើឱ្យអ្នកទាំងអស់គ្នា មានមោទនភាពមកលើរូបនាងខ្ញុំ»។
កាលពីខែឧសភាកន្លងទៅនេះ Arise Agency ដែលជាភ្នាក់ងាររក្សាសិទ្ធិស្លាកសញ្ញា «កញ្ញាឯកផែនដីកម្ពុជា» បានប្រកាសថា លីហួរ នឹងក្លាយជាបេក្ខនារីតំណាងផ្លូវការនៃព្រះរាជាណាចក្រកម្ពុជា នៅក្នុងកម្មវិធីប្រកួតប្រជែងលំដាប់អន្តរជាតិនេះ ។ ចាប់ពីពេលនោះមកកញលីហួរទទួលបាននូវការបណ្តុះបណ្តាល និងបានត្រៀមលក្ខណៈយ៉ាងយកចិត្តទុកដាក់សម្រាប់ការប្រកួតនេះ ។
«វាជាកិត្តិយសដ៏ធំធេងមួយសម្រាប់នាងខ្ញុំ ក្នុងការតំណាងឱ្យព្រះរាជាណាចក្រកម្ពុជានៅក្នុងការប្រកួត កញ្ញាឯកផែនដីឆ្នាំ ២០១៨ នាពេលខាងមុខនេះដែលនឹងត្រូវប្រារព្ធឡើងនៅទីក្រុងម៉ានីល ប្រទេសហ្វី៊លីពីន ។ នាងខ្ញុំមិនដឹងថាត្រូវរៀបរាប់ប្រាប់អំពីអារម្មណ៍របស់នាងខ្ញុំយ៉ាងណានោះឡើយ ។ នាងខ្ញុំពិតជាមានក្តីរំភើបយ៉ាងខ្លាំង ក៏ដូចជាមានបំណងចង់ឱ្យជនរួមជាតិរបស់នាងខ្ញុំមានមោទនភាពផងដែរ ។
នាងខ្ញុំសូមថ្លែងអំណរគុណយ៉ាងជ្រាលជ្រៅទៅដល់បងប្អូនខ្មែរទាំងអស់ ដែលបានគាំទ្រដល់រូបនាងខ្ញុំចាប់តាំងពីការចាប់ផ្តើមនៃដំណើរការប្រកួតកន្លងមក ។ អ្នកទាំងអស់គ្នានេះ ជាមូលហេតុដែលនាងខ្ញុំបន្តកិច្ចខិតខំប្រឹងប្រែងរបស់ខ្លួន នាងខ្ញុំមានបំណងចង់ឱ្យអ្នកទាំងអស់គ្នា មានមោទនភាពមកលើរូបនាងខ្ញុំ។
នាងខ្ញុំក៏មានបំណងចង់ផ្ញើសារប្រាប់ទៅកាន់យុវជនវ័យក ដែលកំពុងជួបប្រទះនូវទុក្ខពិបាកក្នុងជីវិតផងដែរថា ចូរកុំបាក់ទឹកចិត្តចូរខិតខំបន្តការសិក្សារៀនសូត្រ នោះអ្នកនឹងអាចបំពេញក្តីសុបិនរបស់ខ្លួននៅថ្ងៃណាមួយ។ នាងខ្ញុំមានភាពជឿជាក់លើអ្នកទាំងអស់គ្នា »៕
ចែករំលែកព័តមាននេះ