ខេត្តកំពង់ស្ពឺ ៖ បុរសម្នាក់សង្ស័យស្រវឹងបានបើកម៉ូតូបោះពួយយ៉ាងលឿន ជ្រុលចង្កូតបុកជាមួយម៉ូតូមួយគ្រឿងជិះគ្នា២នាក់ បណ្តាលឲ្យស្លាប់ម្នាក់ និងរបួសធ្ងន់២នាក់ គ្រោះថ្នាក់ចរាចរណ៍នេះ បានកើតឡើងកាលពីម៉ោង៦និង១៥នាទីល្ងាចថ្ងៃទី២៩ ខែកញ្ញា ឆ្នាំ២០១៨ តាមបណ្តោយផ្លូវជាតិលេខ៤១ ស្ថិតក្នុងភូមិបាក់ ឃុំព្រៃញាតិ ស្រុកគងពិសី។
ប្រភពព័ត៌មានពីសមត្ថកិច្ច បានឲ្យដឹងថា ម៉ូតូមួយគ្រឿងម៉ាកហុងដាឌ្រីម ធុនសេ១២៥ ស៊េរីឆ្នាំ២០១៦ ពណ៌ខ្មៅ ពាក់ស្លាកលេខ ភ្នំពេញ ១GB-៤៦៧៦ បើកបរដោយឈ្មោះយឿង សាមុត ភេទប្រុស អាយុ២៧ឆ្នាំរស់នៅភូមិនឹងងោង ឃុំទឹកល្អក់ ស្រុកគងពិសី បានរងរបួសធ្ងន់។ ចំណែកភាគី ម៉ូតូម៉ាកហុងដាឌ្រីម ធុនសេ១២៥ ស៊េរីឆ្នាំ២០១៣ពណ៌ខ្មៅ ពាក់ស្លាកលេខ កំពត ១J-២៧៣០ ដែលបើកបរដោយឈ្មោះស៊ុន ស្រីនោច ភេទស្រី អាយុ២៣ឆ្នាំ រស់នៅភូមិត្រពាំងវែង ឃុំត្រពាំងរាំង ស្រុកជុំគិរី ខេត្តកំពត បានស្លាប់នៅនឹងកន្លែងកើតហេតុ និងអ្នករួមដំណើរឈ្មោះសៀក ផានី ភេទស្រី អាយុ២៣ឆ្នាំ រស់នៅភូមិទម្រាក់ ឃុំកក់ ស្រុកបសេដ្ឋ ខេត្តកំពង់ស្ពឺ រងរបួសធ្ងន់។
ប្រភពព័ត៌មានសាក្សីនៅកន្លែងកើតហេតុ បានប្រាប់សមត្ថកិច្ចថា មុនពេលកើតហេតុ គេឃើញបុរសម្នាក់បើកបរម៉ូតូ១គ្រឿងតែម្នាក់ឯងធ្វើដំណើរតាមផ្លូវជាតិលេខ៤១ទិសដៅពីត្បូងទៅជើងដោយល្បឿនលឿនដូចហោះ សង្ស័យស្រវឹង លុះមកដល់ចន្លោះគីឡូម៉ែត្រលេខ១៩-២០ ក៏មានម៉ូតូ១គ្រឿងទៀតជិះគ្នា២នាក់ ដោយនារីម្នាក់ជាអ្នកបើកបរម៉ូតូ ចេញពីរោងចក្រក្នុងគោលបំណងឆ្ពោះទៅផ្ទះ ស្រាប់តែម៉ូតូដែលបើកបរដោយបុរសស្រវឹងនោះ ជ្រុលបុកចំពីមុខ ដួលម៉ូតូរៀងៗខ្លួន បណ្តាលឲ្យនារីម្នាក់ ជាអ្នកបើកម៉ូតូស្លាប់នៅនឹងកន្លែង ឯនារីម្នាក់ទៀតជាអ្នករួមដំណើរបានរបួសធ្ងន់ ។ ចំណែកអ្នកបើកម៉ូតូពាក់ស្លាកលេខ ភ្នំពេញ ១GB-៤៦៧៦ បានរងរបួសធ្ងន់ រីឯម៉ូតូទាំង២គ្រឿង រងការខូចខាតធ្ងន់ធ្ងរ។
ក្រោយកើតហេតុ សមត្ថកិច្ចបានចុះទៅដល់កន្លែងកើតហេតុ និងបានបញ្ជូនអ្នករងរបួសធ្ងន់ទាំង២នាក់ មកមន្ទីរពេទ្យបង្អែកខេត្ត ។ ចំណែកសពនារីរងគ្រោះ សមត្ថកិច្ចកំពុងទាក់ទងក្រុមគ្រួសារឲ្យមកទទួលយកដើម្បីធ្វើបុណ្យតាមប្រពៃណី។
វត្ថុតាងម៉ូតូទាំង២គ្រឿង ត្រូវបានសមត្ថកិច្ចនាំយកទៅរក្សាទុកនៅអធិការដ្ឋាននគរបាលស្រុក រង់ចាំដោះស្រាយនៅពេលក្រោយ៕
ចែករំលែកព័តមាននេះ