ម្នាក់ៗញាក់សាច់ភ័យ …ខំរត់ចេញយ៉ាងប្រសាច
- ពោធិ៍សាត់
ខេត្តពោធិ៍សាត់ ៖ ជនជាតិចិនចំនួន០៥នាក់ បានរងរបួសធ្ងន់ និងស្រាល ដោយសារផ្ទុះធុងហ្គាស ឆេះរថយន្ដមួយគ្រឿង ខណៈពេលកំពុងបើកបរ ។ ករណីនេះបានកើតឡើង…
ខេត្តពោធិ៍សាត់ ៖ ជនជាតិចិនចំនួន០៥នាក់ បានរងរបួសធ្ងន់ និងស្រាល ដោយសារផ្ទុះធុងហ្គាស
ឆេះរថយន្ដមួយគ្រឿង ខណៈពេលកំពុងបើកបរ ។ ករណីនេះបានកើតឡើង កាលពីវេលាម៉ោង២៤និង៤០នាទីយប់ ឈានចូលថ្ងៃទី២៨ ខែកញ្ញា ឆ្នាំ២០១៨ នៅលើស្ពានធ្លាម្អម កំណាត់ផ្លូវជាតិលេខ៥ ចន្លោះគីឡូម៉ែត្រលេខ១៧០ និង១៧១ ស្ថិតនៅភូមិត្រាំ ឃុំត្នោតជុំ ស្រុកក្រគរ ខេត្តពោធិ៍សាត់ ។
សមត្ថកិច្ចឲ្យដឹងថា រថយន្តដែលឆេះម៉ាក LEXUS RX300 ពណ៌ស ពាក់ស្លាកលេខ ភ្នំពេញ
2AB-4180 ធ្វើដំណើរពីបាត់ដំបងទៅភ្នំពេញ ។ អ្នកបើកបរ និងអ្នករួមដំណើរសរុបទាំងអស់មានចំនួន០៥នាក់ សុទ្ធតែជនជាតិចិន ។ ពេលធ្វើដំណើរមកដល់លើស្ពានធ្លាម្អម ស្ថិតក្នុងភូមិត្រាំ ឃុំត្នោតជុំ ស្រុកក្រគរ ស្រាប់តែឆេះទ្រលោមតែម្ដង ធ្វើឲ្យជនជាតិចិនទាំង០៥នាក់ ឈប់រថយន្ដហក់ចេញប្រសាច ។
រថយន្តបានឆេះខូចខាតទាំងស្រុង រីឯជនជាតិចិនទាំង០៥នាក់ សុទ្ធតែប្រុសៗរងរបួស ក្នុងនោះធ្ងន់០២នាក់ ហើយសុទ្ធតែមិនស្គាល់ឈ្មោះ ដោយសារពួកគេចេះនិយាយតែភាសាចិន មិនចេះភាសាអង់គ្លេស ។
ជនរងគ្រោះបានបញ្ជូនទៅព្យាបាលនៅមន្ទីរពេទ្យបង្អែកខេត្តពោធិ៍សាត់ ។ រីឯរថយន្តដែលឆេះនោះកម្លាំងនគរបាលស្រុក និងប៉ុស្តិ៍បានអូសទៅទុកនៅប៉ុស្តិ៍នគរបាលត្នោតជុំ ៕
ចែករំលែកព័តមាននេះ