ខេត្តបន្ទាយមានជ័យ ៖ ដើម្បីបង្កើនធនធានជលផលក្នុងរដូវត្រីពងមន្ត្រីជំនាញសហការជាមួយកម្លាំងយោធា និងសហគមន៍នេសាទសរុបជាង៤០នាក់ដឹកនាំដោយលោក ឃូ ពៅ អភិបាលស្រុកព្រះនេត្រព្រះ ចុះបង្ក្រាបបទល្មើសនេសាទខុសច្បាប់កាប់បំផ្លាញចោលណរ៉ាវ និងឡុកត្រីចំនួន២កន្លែងប្រវែង3000ម៉ែត្រ និងធ្វើការលែងកូនត្រីរាប់ម៉ឺនក្បាល កាលពីថ្ងៃទី២៩ កញ្ញា នៅចំណុចបឹងអាឈូក និងបឹងចំការប្លង ស្ថិតក្នុងភូមិសាស្ត្រឃុំប្រាសាទ ស្រុកព្រះនេត្រព្រះ ខេត្តបន្ទាយមានជ័យ។
ហើយណរ៉ាវ2កន្លែងនោះជាប្រភេទសំណាញ់ក្រឡាញឹក និងឡុកត្រី6ឡុក ត្រូវក្រុមការងារចម្រុះបង្ក្រាបកាប់បំផ្លាញចោលនៅនឹងកន្លែង ឯត្រីតាមឡុកនីមួយៗសរុបរាប់ម៉ឺនក្បាលក៏ត្រូវបានចាក់ព្រលែងនៅនឹងកន្លែងឲ្យមានសេរីភាពភ្លាមៗផងដែរ។
ក្រុមការងារចម្រុះនេះធ្វើដំណើរតាមទូកស្មាច់ជាង20គ្រឿង ហើយខាងមន្ត្រីជលផលគេឃើញដឹកនាំដោយលោក សួន សុខម៉ៅ នាយផ្នែកខណ្ឌរដ្ឋបាលជលផលស្រុកព្រះនេត្រព្រះ/យោធា40នាក់ ដឹកនាំដោយលោកឧត្តមសេនីត្រី ជុំ សេដ្ឋា មេបញ្ជាការរងយោធាកងពលតូចថ្មើជើងលេខ51 តំណាងដ៏ខ្ពង់ខ្ពស់លោក សេង ធារិន្ទ មេបញ្ជាការកងពល និងកម្លាំងសហគមន៍នេសាទប្រចាំឃុំប្រាសាទមួយចំនួន។
លោក ឃូ ពៅ អភិបាលស្រុកព្រះនេត្រព្រះ ដែលជាប្រធានក្រុមការងារដឹកនាំចុះផ្ទាល់ប្រាប់ថា ការចុះបង្ក្រាបបទល្មើសនេសាទខុសច្បាប់ជាក់ស្តែងនេះធ្វើឡើងបន្ទាប់ពីទទួលប្រភពព័ត៌មានថា នៅតំបន់ព្រៃលិចទឹកក្នុងភូមិសាស្ត្រស្រុករបស់លោកមានបទល្មើសនេសាទខុសច្បាប់កើតឡើង។
លោកបន្តថា ការចុះពិនិត្យមើល និងឈានទៅបង្ក្រាបជាក់ស្តែងក៏បានការអនុញ្ញាត និងការណែនាំ ក៏ដូចជាបទបញ្ជាផ្ទាល់ពីលោកសួន បវរ អភិបាលនៃគណៈអភិបាលខេត្តផងដែរ។ ចំណែកម្ចាស់បទល្មើសនេសាទចំនួន10នាក់ ដែលជាអ្នកភូមិ-ឃុំព្រែកចាស់ ស្រុកឯកភ្នំ ត្រូវបានក្រុមការងារចម្រុះធ្វើការអប់រំ និងឲ្យធ្វើកិច្ចសន្យានៅនឹងកន្លែងបញ្ឈប់នូវការនេសាទខុសច្បាប់តទៅទៀត៕
ចែករំលែកព័តមាននេះ