ខេត្តកំពង់ឆ្នាំង ៖ បុរសម្នាក់បានធ្លាយខួរស្លាប់នៅនឹងកន្លែង ចំណែកបុរសម្នាក់ទៀតបានរងរបួសស្រាលក្នុងហេតុការណ៍គ្រោះថ្នាក់ចរាចរណ៍មួយបានកើតឡើងនៅវេលាម៉ោង3និង00នាទីរសៀលថ្ងៃទី28 ខែកញ្ញា ឆ្នាំ2018 នៅតាមបណ្ដោយផ្លូវជាតិលេខ5 ត្រង់ចំណុចផ្លូវបែកចូលវត្តថ្លុកត្របែក ស្ថិតនៅក្នុងភូមិខ្វិត ឃុំពង្រ…
ខេត្តកំពង់ឆ្នាំង ៖ បុរសម្នាក់បានធ្លាយខួរស្លាប់នៅនឹងកន្លែង ចំណែកបុរសម្នាក់ទៀតបានរងរបួសស្រាលក្នុងហេតុការណ៍គ្រោះថ្នាក់ចរាចរណ៍មួយបានកើតឡើងនៅវេលាម៉ោង3និង00នាទីរសៀលថ្ងៃទី28 ខែកញ្ញា ឆ្នាំ2018 នៅតាមបណ្ដោយផ្លូវជាតិលេខ5 ត្រង់ចំណុចផ្លូវបែកចូលវត្តថ្លុកត្របែក ស្ថិតនៅក្នុងភូមិខ្វិត ឃុំពង្រ ស្រុករលាប្អៀរ ខណៈដែលជនរងគ្រោះទាំងពីរនាក់ជិះម៉ូតូគេចរថយន្តបណ្តាលអោយធ្លាក់ចូលស្នាមភ្លោះ ។
សមត្ថកិច្ចនគរបាលមូលដ្ឋានបានឲ្យដឹងថា ជនរងគ្រោះដែលបានស្លាប់បាត់បង់ជីវិតមានឈ្មោះ តុប សំអៀរ អាយុ57ឆ្នាំ មានទីលំនៅភូមិស្រះកែវ ឃុំមេលំ ស្រុកបរិបូណ៌ ចំណែកអ្នករងរបួសស្រាល និងជាអ្នកបើកម៉ូតូមានឈ្មោះ អៀង សំអុន អាយុ48ឆ្នាំ ទាំងពីរនាក់ជាបងប្អូនថ្លៃ និងមានទីលំនៅជាមួយគ្នា ។
មុនពេលកើតហេតុគេឃើញជនរងគ្រោះទាំង2នាក់ជិះម៉ូតូម៉ាកហុងដា សេ125 ស៊េរីឆ្នាំ2018 ពាក់ផ្លាកលេខ ភ្នំពេញ 1HD-0457 បើកបរតាមបណ្តោយផ្លូវជាតិលេខ៥ពីលិចទៅកើត លុះមកដល់ចំណុចកើតហេតុក៏បានគេច និងរថយន្ដមួយគ្រឿងបណ្ដាលឱ្យធ្លាក់ចូលស្នាមភ្លោះ ពេលនោះអ្នកជិះពីក្រោយឈ្មោះ តុប សំអៀរ ក៏បានផ្លោងទៅបោកក្បាលនឹងថ្ម បណ្ដាលអោយបែកក្បាលធ្លាយខួរស្លាប់នៅនឹងកន្លែង ចំណែកបុរសឈ្មោះ អៀង សំអុន ដែលជាអ្នកបើកម៉ូតូ និងត្រូវជាប្អូនថ្លៃជនរងគ្រោះ គ្រាន់តែរងរបួសស្រាលប៉ុណ្ណោះ ។
តាមប្រភពព័ត៌មានពីប្រជាពលរដ្ឋដែលបានដឹងក៏ដូចជាឈ្មោះ អៀង សំអុន បាននិយាយថា គាត់ទាំងពីរនាក់បានចេញពីកន្លែងកំសាន្តទំនប់២០ ឧសភា ក្នុងគោលបំណងទៅលេងខេត្តកំពង់ឆ្នាំង ។ ប៉ុន្តែមកដល់ចំណុចកើតហេតុស្រាប់តែមានរថយន្តមួយគ្រឿងបត់កាត់ពីមុខធ្វើឲ្យគាត់គឺគេចធ្លាក់ស្នាមភ្លោះតែម្ដង ។
យ៉ាងនេះក្តីម៉ូតូជនរងគ្រោះត្រូវបាននគរបាលប៉ុស្តិ៍រដ្ឋបាលយកទៅរក្សាទុកដើម្បីរង់ចាំការដោះស្រាយប្រសិនបើមានការប្តឹងផ្តល់គ្នា ។ ចំណែកសពជនរងគ្រោះដែលបានស្លាប់បាត់បង់ជីវិតត្រូវបានក្រុមគ្រួសារដឹកយកទៅធ្វើបុណ្យតាមប្រពៃណីនៅលំនៅឋាន ៕
ចែករំលែកព័តមាននេះ